ଭୁବନେଶ୍ବର: ବଡ଼ ପରଦାକୁ ଆସିବ ଓଡ଼ିଆ ଚଳଚ୍ଚିତ୍ର 'ଶାନ୍ତି ଆପାର୍ଟମେଣ୍ଟ' । ଏହା ପୂର୍ବରୁ ମୁକ୍ତିଲାଭ କରିଛି 'ଶାନ୍ତି ଆପାର୍ଟମେଣ୍ଟ'ର ମ୍ୟୁଜିକ୍ ଓ ଟ୍ରେଲର । କ୍ରାଇମ ଥ୍ରୀଲରକୁ ନେଇ ଭିନ୍ନ ଏକ ମୌଳିକ କାହାଣୀ ସହ ପ୍ରସ୍ତୁତ ହୋଇଥିବା ନୂଆ ଓଡ଼ିଆ ଚଳଚ୍ଚିତ୍ର ‘ଶାନ୍ତି ଆପାର୍ଟମେଣ୍ଟ’ର ଟ୍ରେଲର ଆଜି ସନ୍ଧ୍ୟାରେ ଏସପ୍ଲାନେଡ୍ ଲନଠାରେ ରିଲିଜ ହୋଇଯାଇଛି । ଏହି ଫିଲ୍ମରେ ଦ୍ବୀପନ୍ବିତ ଦାସମହାପାତ୍ର, ଶୁଭାଶିଷ, ରାଗିଣୀ, ଆଲିଆ, ବରଦା, ସନ୍ତୁ ପ୍ରସନ୍ନଜିତ, ଶକ୍ତି, ରାକ୍ଷୀ, ଅନୁଷ୍କା ପ୍ରମୁଖ କଳାକାର ଭାବେ ଅଭିନୟ କରିଛନ୍ତି।
ତେବେ 'ଶାନ୍ତି ଆପାର୍ଟମେଣ୍ଟ' ଚଳଚ୍ଚିତ୍ରରେ ରହସ୍ୟ, ରୋମାଞ୍ଚ ଭରି ରହିଛି । ଯାହାକି ଦର୍ଶକଙ୍କୁ ନିଶ୍ଚୟ ପ୍ରଭାବିତ କରିବ ବୋଲି ନିର୍ଦ୍ଦେଶକ ଅଶ୍ବିନୀ ତ୍ରିପାଠୀ କହିଛନ୍ତି । ଚଳଚ୍ଚିତ୍ରଟିରେ ଭରପୁର ମନୋରଞ୍ଜନ ରହିଥିବା କହିଛନ୍ତି ପ୍ରଯୋଜିକା ତଥା ଅଭିନେତ୍ରୀ ରାଗିଣୀ । ଏହାର କାର୍ଯ୍ୟକାରୀ ପ୍ରଯୋଜକ ଅଛନ୍ତି ଅଭିଜିତ । ଫିଲ୍ମଟିର କାହାଣୀ ଏବଂ ଚିତ୍ରନାଟ୍ୟ ସହିତ ନିର୍ଦ୍ଦେଶନାର ଦାୟିତ୍ଵ ତୁଲାଇଛନ୍ତି ଅଶ୍ବିନୀ ତ୍ରିପାଠୀ । ସେହିପରି ସଂଳାପ ଦାୟିତ୍ବରେ ଅଛନ୍ତି ଆଗଧାଡ଼ିର ସଂଳାପକାର ତଥା ନାଟ୍ୟକାର ଡ. ଦୀପକ ଜେନା । ସନ୍ଦୀପ ପଣ୍ଡା ସଂଗୀତ ନିର୍ଦ୍ଦେଶନା ଦେଇଛନ୍ତି । ଏହାସହ କଣ୍ଠଦାନ କରିଛନ୍ତି ହ୍ୟୁମାନ ସାଗର, ଅନନ୍ୟା ଶ୍ରୀତମ ନନ୍ଦ, ଅର୍ପିତା ଚୌଧୁରୀ, ସ୍ବୟମ ପାଢ଼ୀ । ସେହିପରି ସଂଗୀତ ନିର୍ଦ୍ଦେଶକ ନିଜେ ସନ୍ଦୀପ ପଣ୍ଡା ପ୍ରଚ୍ଛଦପଟ ଗାୟକ ଭାବେ ଏଥିରେ ସାମିଲ ରହିଛନ୍ତି ।
ଏହା ମଧ୍ୟ ପଢନ୍ତୁ...ଜନ୍ମଦିନରେ ଫ୍ୟାନ୍ସଙ୍କୁ ଭେଟି ଦେଲେ ବରୁଣ ତେଜ, ଆଗାମୀ ଫିଲ୍ମ 'ମଟକା'ର ଟିଜର ରିଲିଜ
ଏହା ମଧ୍ୟ ପଢନ୍ତୁ...ଖୁବଶୀଘ୍ର ପରଦାକୁ ଆସୁଛି 'ଗୋଲମାଲ ୫', କନଫର୍ମ କଲେ ରୋହିତ ଶେଟ୍ଟୀ
"ଏହି ସିନେମାଟି ଅଭିନେତା ଶୁଭାଶିଷଙ୍କୁ ଏକ ଭିନ୍ନ ଚରିତ୍ରରେ ପ୍ରତିପାଦିତ କରିଥିବାବେଳେ ଆପାର୍ଟମେଣ୍ଟରେ ହେଉଥିବା ବିଭିନ୍ନ ରହସ୍ୟମୟ ଘଟଣାର ପର୍ଦ୍ଦାଫାସ ହୋଇଛି । ବିଶେଷ କରି ସହରର ବିଭିନ୍ନ ଆପାର୍ଟମେଣ୍ଟ ଗୁଡ଼ିକରେ ବିଭିନ୍ନ ପ୍ରକାର ଅପରାଧ ଘଟୁଛି । ଏପରିକି ନିକଟରେ ରହୁଥିବା ଲୋକମାନେ ମଧ୍ୟ ଏହାର ସୁରାକ ପାଇପାରୁନାହାନ୍ତି । କିଭଳି ଭାବେ ପାଖ ଲୋକଙ୍କୁ ବି ଏହା ଜଣାପଡୁନି ? କାହିଁକି ଏଭଳି ହେଉଛି ? ଏ ବିଷୟରେ ମଧ୍ୟ ଏକ ସୁନ୍ଦର ବାର୍ତ୍ତା ରହିଛି । ତେଣୁ ଓଡ଼ିଶାର ମୌଳିକ କାହାଣୀକୁ ନେଇ ପ୍ରସ୍ତୁତ ଏହି ଚଳଚ୍ଚିତ୍ର ଓଡ଼ିଆ ଦର୍ଶକଙ୍କ ମନକୁ ଛୁଇଁବ" ବୋଲି କହିଛନ୍ତି ନିର୍ଦ୍ଦେଶକ ଅଶ୍ୱିନୀ ତ୍ରିପାଠୀ । ତେବେ ସିନେମାଟି ଫେବ୍ରୁଆରୀ ୨ ତାରିଖରେ ବଡ଼ ପରଦାରେ ରିଲିଜ ହେବ ।
ଇଟିଭି ଭାରତ, ଭୁବନେଶ୍ବର
