ଭୁବନେଶ୍ୱର: ଅକ୍ଟୋବର ୯ ତାରିଖ ଦଶହରାରେ ମୁକ୍ତିଲାଭ କରିବ ବହୁ ଚର୍ଚ୍ଚିତ ଓଡ଼ିଆ ଚଳଚିତ୍ର 'କର୍ମ'। ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି । ଏହି ଫିଲ୍ମରେ ସୁପରଷ୍ଟାର ଅନୁଭବ ମହାନ୍ତି ଏବଂ ସୂର୍ଯ୍ୟମୟୀ ମହାପାତ୍ରଙ୍କ ଭଳି ଅନେକ ଷ୍ଟାରକାଷ୍ଟଙ୍କୁ ଦେଖିବାକୁ ମିଳିବ । ଏପରି ସମୟରେ ଏହି ଫିଲ୍ମ ସହ ବଡ଼ ପରଦାରେ ଡେବ୍ୟୁ କରିବାକୁ ଯାଉଛନ୍ତି ରିଲ୍ସ ଏବଂ ମ୍ୟୁଡିକ ଆଲବମରୁ ଲୋକପ୍ରିୟତା ହାସଲ କରିଥିବା ଅଭିନେତା ମନ୍ମୟ ଦେ । ସେ ଏହି ପିଲ୍ମ ସହ ବଡ଼ ପରଦାରେ ପ୍ରଥମ ଥର ନଜର ଆସିବାକୁ ଥିବା ବେଳେ ଫିଲ୍ମକୁ ନେଇ ସେ ବେଶ ଆଶାବାଦୀ ଥିବା କହିଛନ୍ତି ।
ଏହି ଅଭିନେତ୍ରୀ ସହ ନଜର ଆସିବେ ମନ୍ମୟ ଦେ
ମନ୍ମୟ ଦେ ଏହି ଫିଲ୍ମରେ ଅଭିନେତ୍ରୀ ଦିବ୍ୟା ମହାନ୍ତିଙ୍କ ସହ ନଜର ଆସିବେ । ଗତକାଲି ଫିଲ୍ମର ଗୀତ 'ଧିତାଙ୍ଗ ଧିତାଙ୍ଗ' ରିଲିଜ ହୋଇଛି । ଯେଉଁଥିରେ ଉଭୟଙ୍କ ଲଭ କେମେଷ୍ଟ୍ରି ଦେଖିବାକୁ ମିଳିଛି । ଏହି ଗୀତକୁ 85 ହଜାରରୁ ଅଧିକ ଲୋକ ଦେଖିସାରିଲେଣି । ଲୋକେ ଏହାକୁ ବେଶ ପସନ୍ଦ କରିଛନ୍ତି । ତେବେ ମନ୍ମୟ ଦେ, ଦିବ୍ୟା ମହାନ୍ତି ଏହି ଫିଲ୍ମ ସହ ପ୍ରଥମ ଥର ସ୍କ୍ରିନ ସେୟାର କରିବା ସହ ଅନୁପମ ପଟ୍ଟନାୟକଙ୍କ ସହ ମଧ୍ୟ ପ୍ରଥମ ଥର ପାଇଁ କାମ କରୁଛନ୍ତି ।
'କର୍ମ' ଫିଲ୍ମର ଷ୍ଟାରକାଷ୍ଟ
ଅନୁପମ ପଟ୍ଟନାୟକଙ୍କ ବ୍ୟାନରରେ ପ୍ରସ୍ତୁତ ନୂଆ ଚଳଚ୍ଚିତ୍ର 'କର୍ମ'ରେ ନିର୍ଦ୍ଦେଶନା ଦେଇଛନ୍ତି ନିର୍ଦ୍ଦେଶକ ଅନୁପମ ପଟ୍ଟନାୟକ । କାର୍ଯ୍ୟକାରୀ ପ୍ରଯୋଜକ ଭାବେ ବର୍ଷା ପଟ୍ଟନାୟକ କାର୍ଯ୍ୟ କରୁଥିବା ବେଳେ ଫିଲ୍ମକୁ ଶବ୍ଦରେ ସଜେଇଛନ୍ତି ଲେଖକ ମାନସ ପଢ଼ିଆରୀ । ଫିଲ୍ମରେ ମନ୍ମୟ ଓ ଦିବ୍ୟା ସମେତ ସୁପରଷ୍ଟାର ଅନୁଭବ ମହାନ୍ତି ମୁଖ୍ୟ ଚରିତ୍ରରେ ନଜର ଆସିବାକୁ ଥିବା ବେଳେ ତାଙ୍କ ବିପକ୍ଷରେ ଅଭିନେତ୍ରୀ ସୂର୍ଯ୍ୟମୟୀ ମହାପାତ୍ର ନଜର ଆସିବେ । ଏହି ଫିଲ୍ମରେ ପ୍ରଥମ ଥର ପାଇଁ ଅନୁଭବ ଓ ସୂର୍ଯ୍ୟମୟୀଙ୍କ ଯୋଡି ରୋମାନ୍ସ କରୁଥିବା ଦେଖିବାକୁ ମିଳିବ । ଅନ୍ୟ ଭୂମିକାରେ ଜୟ ପ୍ରକାଶ, ନିଶାନ୍ତ ମଜିଠିଆ ଉଦିତ ଗୁରୁ ରହିଥିବା ବେଳେ ସନୋଜ ମଧ୍ୟ ଏହି ଫିଲ୍ମ ସହ ବଡ଼ ପରଦାରେ ଡେବ୍ୟୁ କରିବାକୁ ଯାଉଛନ୍ତି ।
ଏହା ମଧ୍ୟ ପଢନ୍ତୁ: ଅନୁଭବଙ୍କ ସହ କାମ କରିବା ମୋ ପାଇଁ ସୌଭାଗ୍ୟ: ସୂର୍ଯ୍ୟମୟୀ
'କର୍ମ' ଫିଲ୍ମର କାହାଣୀ କ'ଣ ?
'କର୍ମ' ଅର୍ଥାତ କର୍ମର ଫଳ, ଯାହା ଆମେ କରିଥାଉ ସେହି ମୁତାବିକ ଆମକୁ ଫଳ ମିଳିଥାଏ । ସେପଟେ ଫିଲ୍ମ କର୍ମର ଫାଷ୍ଟ ଲୁକ ଓ ଟିଜର ବେଶ ଲୋକପ୍ରିୟତା ଅର୍ଜନ କରିଥିବା ବେଳେ ଫିଲ୍ମରେ ଥିବା ୪ ଟି ଗୀତରୁ 'ଚିରିଙ୍ଗ ଚିରିଙ୍ଗ' ଏବେ ବେଶ ଚର୍ଚ୍ଚାରେ ରହିଛି । ଏହି ଗୀତ ବର୍ତ୍ତମାନ ଲୋକଙ୍କ ବେଶ ପସନ୍ଦର ଗୀତ ପାଲଟିଛି । ଯାହା ଟ୍ରେଡିଂରେ ରହିଛି । ସେହିପରି ଦିବ୍ୟା ଓ ମନ୍ମୟଙ୍କ ଯୋଡିକୁ ନେଇ 'ଧିତାଙ୍ଗ ଧିତାଙ୍ଗ' ରିଲିଜ ହୋଇଥିବା ବେଳେ ଏହି ଗୀତକୁ ବି ଦର୍ଶକ ଭଲପାଇବା ଦେବେ ବୋଲି କହିଛନ୍ତି ଉଭୟ ଦିବ୍ୟା ଓ ମନ୍ମୟ । ତେବେ ନୂଆ ପୁରୁଣା କଳାକାରଙ୍କ ସମିଶ୍ରଣର କାହାଣୀଟି ଦର୍ଶକଙ୍କୁ ବେଶ ଭଲ ଲାଗିବ ବୋଲି କହିଛି ପ୍ରଯୋଜନା ସଂସ୍ଥା ।
ଏହା ମଧ୍ୟ ପଢନ୍ତୁ: ଓଡ଼ିଆ ଫିଲ୍ମ 'କର୍ମ' ଟିଜର ରିଲିଜ; ପ୍ରଥମ ଥର ଅନସ୍କ୍ରିନ ରୋମାନ୍ସ କରିବେ ଅନୁଭବ-ସୂର୍ଯ୍ୟମୟୀ
ଇଟିଭି ଭାରତ, ଭୁବନେଶ୍ୱର
