ମୁମ୍ବାଇ: ବଲିଉଡ ଅଭିନେତାଙ୍କ କ୍ରେଜ ବହୁତ ଥାଏ । ସାରା ଦେଶରେ ସେମାନଙ୍କ ଫ୍ୟାନ ଫଲୋଇଂ ମଧ୍ୟ ଢେର ଅଧିକ । ନିଜ ପ୍ରିୟ ତାରକାଙ୍କ ଗୋଟିଏ ଝଲକ ପାଇବାକୁ ଫ୍ୟାନ୍ସ କିଛି ବି କରିବାକୁ ପଛାଇନଥାନ୍ତି । ଏହାରି ମଧ୍ୟରେ ବର୍ତ୍ତମାନ ସେଭଳି ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ଜଣେ ଜବରା ଫ୍ୟାନ ସାଇକେଲରେ ଉତ୍ତରପ୍ରଦେଶର ଝାନ୍ସିରୁ ମୁମ୍ବାଇ ଯାତ୍ରା କରି ତାଙ୍କର ପ୍ରିୟ ତାରକା ହ୍ୟାଣ୍ଡସମ ହଙ୍କ ଅଭିନେତା କାର୍ତ୍ତିକ ଆର୍ଯ୍ୟନଙ୍କୁ ଭେଟିଥିଲେ । ମୁମ୍ବାଇରେ ପହଞ୍ଚିବା ପାଇଁ ଆର୍ଯ୍ୟନଙ୍କ ସେହି ଫ୍ୟାନ ସାଇକେଲରେ 1100 କିଲୋମିଟରରୁ ଅଧିକ ଯାତ୍ରା କରିଥିଲେ । ଫ୍ୟାନ୍ସଙ୍କ ସହ ଭେଟିବା ପରେ ଅଭିନେତା ତାଙ୍କ ଭଲମନ୍ଦ ବିଷୟରେ ପଚାରି ବୁଝିଥିଲେ ଏବଂ ତାଙ୍କ ସହ ଫଟୋ ଉଠାଇଥିଲେ ।
ଯେତେବେଳେ ଏହି ପ୍ରଶଂସକ କାର୍ତ୍ତିକଙ୍କୁ ଭେଟିଲେ ସେ ତାଙ୍କ ପାଦ ଛୁଇଁଥିଲେ । ଏହାପରେ କାର୍ତ୍ତିକ ତାଙ୍କୁ ଆଲିଙ୍ଗନ କରି ଯାତ୍ରା ବିଷୟରେ ପଚାରିଥିଲେ । ଏନେଇ ଫ୍ୟାନ ଜଣକ କହିଥିଲେ ଯେ, ତାଙ୍କୁ ଭେଟିବା ପାଇଁ ସେ ଝାନ୍ସିରୁ ମୁମ୍ବାଇ ପର୍ଯ୍ୟନ୍ତ 1100 କିଲୋମିଟର ସାଇକେଲ ଚଳାଇଛନ୍ତି । କାର୍ତ୍ତିକ ଏହା ଶୁଣି ଆଶ୍ଚର୍ଯ୍ୟ ହୋଇ ତାଙ୍କୁ ଆଲିଙ୍ଗନ କରିଥିଲେ । ତେବେ ଏହି ଯାତ୍ରା ଶେଷ କରିବାକୁ ତାଙ୍କୁ 9 ଦିନ ସମୟ ଲାଗିଥିବା ପ୍ରଶଂସକ କହିଛନ୍ତି ।
ଏହା ମଧ୍ୟ ପଢନ୍ତୁ- କାର୍ତ୍ତିକ ଆର୍ଯ୍ୟନଙ୍କୁ ଦେଖି ବେକାବୁ ହେଲେ ଫ୍ୟାନ୍ସ, ଭାଙ୍ଗିଦେଲେ ବ୍ୟାରିକେଡ୍
କାର୍ତ୍ତିକ ଆର୍ଯ୍ୟନଙ୍କ ୱାର୍କପ୍ରଣ୍ଟ ବିଷୟରେ କହିବାକୁ ଗଲେ, କାର୍ତ୍ତିକଙ୍କୁ ଆଗାମୀ ଫିଲ୍ମ 'ଚନ୍ଦୁ ଚମ୍ପିଆନ'ରେ ଦେଖିବାକୁ ମିଳିବ । ଏହି ଫିଲ୍ମ କ୍ରୀଡ଼ା ଡ୍ରାମାରେ ଭରପୁର ଜଣେ କ୍ରୀଡ଼ାବିତଙ୍କ ବାସ୍ତବ ଜୀବନର କାହାଣୀ ଉପରେ ଆଧାରିତ । ଏହି ଚଳଚ୍ଚିତ୍ରଟି ଭାରତର ପ୍ରଥମ ପାରାଲିମ୍ପିକ୍ ସ୍ୱର୍ଣ୍ଣ ପଦକ ବିଜେତା ମୁରଲୀକାନ୍ତ ପେଟକରଙ୍କ ବାୟୋପିକ୍ ଅଟେ । କାର୍ତ୍ତିକ ଆର୍ଯ୍ୟନଙ୍କୁ ପ୍ରଥମ ଥର ପାଇଁ ଏକ କ୍ରୀଡ଼ା ଡ୍ରାମା ଫିଲ୍ମରେ ଦେଖିବାକୁ ମିଳିବ । ତେବେ ଏହି ଫିଲ୍ମ 14 ଜୁନ୍ 2024ରେ ମୁକ୍ତିଲାଭ କରିବ । ଏହାବ୍ୟତୀତ ସେ 'ଆଶିକି 3' ଏବଂ ନିର୍ଦ୍ଦେଶକ ହଂସଲ ମେହେତ୍ତାଙ୍କ ଫିଲ୍ମ 'କ୍ୟାପଟେନ୍ ଇଣ୍ଡିଆ' ଏବଂ 'ଭୁଲ ଭୁଲେୟା-୩'ରେ ମଧ୍ୟ ନଜର ଆସିବେ ।
