ଅଯୋଧ୍ୟା: ବଲିଉଡ ମେଗାଷ୍ଟାର ଅମିତାଭ ବଚ୍ଚନ ଆଜି ଅର୍ଥାତ୍ ଶୁକ୍ରବାର ଦିନ ଅଯୋଧ୍ୟାରେ ପହଞ୍ଚି ରାମଲାଲାଙ୍କ ମନ୍ଦିର ପରିଦର୍ଶନ କରିଛନ୍ତି । ଏହି ସମୟରେ ବିଗ୍ ବି ପ୍ରଭୁ ରାମଲାଲାଙ୍କୁ ଏକ ସୁନା ହାର ଦାନ କରିଛନ୍ତି । ପରେ ସେ ଡିଭିଜନାଲ କମିଶନରଙ୍କ ବାସଭବନରେ ପହଞ୍ଚିଥିଲେ । ଏହା ପରେ ସେ ସିଭିଲ୍ ଲାଇନ୍ସରେ ଏକ ଅଳଙ୍କାର ଶୋ'ରୁମ୍ ଉଦଘାଟନ କରିବେ ବୋଲି ଜଣାପଡିଛି । ଏହି ସମୟର ଅନେକ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।
କହିରଖୁଛୁ ଯେ, ଜାନୁଆରୀ ୨୨ରେ ଅମିତାଭ ବଚ୍ଚନ, ପୁଅ ତଥା ଅଭିନେତା ଅଭିଷେକ ବଚ୍ଚନଙ୍କ ସହ ରାମଲାଲାଙ୍କ ପ୍ରାଣ ପ୍ରତିଷ୍ଠା ଅବସରରେ ସାମିଲ ହୋଇଥିଲେ । ସେ ଆଜି ଅଯୋଧ୍ୟା ପହଞ୍ଚି ପୁଣିଥରେ ରାମଲାଲାଙ୍କ ଦର୍ଶନ କରିଛନ୍ତି । ତେବେ ଏହି ସମୟରେ ସେ କଡ଼ା ସୁରକ୍ଷା ମଧ୍ୟରେ ସେ ରାମ ମନ୍ଦିରରେ ପହଞ୍ଚି ରାମଲାଲାଙ୍କୁ ପୂଜାର୍ଚ୍ଚନା କରିଥିଲେ। ଏଥିସହ ସେ ରାମଲାଲାଙ୍କୁ ଏକ ସୁନା ହାର ଦାନ କରିଛନ୍ତି । ଏଥିପାଇଁ ଆଚାର୍ଯ୍ୟ ସତ୍ୟେନ୍ଦ୍ର ଦାସ ତାଙ୍କୁ ଧନ୍ୟବାଦ ଜଣାଇଛନ୍ତି । ସେଠାରୁ ପୂଜା କରିବା ପରେ ସେ ଡିଭିଜନାଲ କମିଶନରଙ୍କ ବାସଭବନରେ ପହଞ୍ଚିଥିଲେ।
ସୂଚନା ଥାଉ କି, ଅମିତାଭ ବଚ୍ଚନ ବର୍ତ୍ତମାନ ଦ୍ବିତୀୟ ଥର ପାଇଁ ରାମଲାଲାଙ୍କ ଦର୍ଶନ କରିଛନ୍ତି । ପୂର୍ବରୁ ସେ ପ୍ରାଣ ପ୍ରତିଷ୍ଠା ଦିନ ରାମ ମନ୍ଦିର ଦର୍ଶନ କରିଥିବା ବେଳେ ସୋସିଆଲ ମିଡିଆରେ ଫଟୋ ସେୟାର କରି ମନ୍ଦିରର ଝଲକ ଦେଖାଇଥିଲେ । ଏହି ସମୟରେ ଅମିତାଭ, ଅଭିଷେକଙ୍କ ବ୍ୟତୀତ, ଅମ୍ବାନୀ ପରିବାର, ରଣବୀର କପୁର, ଆଲିଆ ଭଟ୍ଟ, ସଂଜୟ ଲୀଲା ବଂଶାଲୀ, ବିକି କୌଶଲ, କ୍ୟାଟ୍ରିନା କୈଫ, ରାଜକୁମାରୀ ହିରାନୀ, ଅନୁପମ ଖେର, ରଜନୀକାନ୍ତ, ଚିରଞ୍ଜୀବୀ, ରାମ ଚରଣ ଭଳି ଅନେକ ସେଲିବ୍ରିଟି ସାମିଲ ହୋଇଥିଲେ ।
ଏହା ମଧ୍ୟ ପଢନ୍ତୁ: ଅଯୋଧ୍ୟାରେ ଜାଗା କିଣିଲେ ଅମିତାଭ ବଚ୍ଚନ, ଦାମ୍ ଜାଣିଲେ ଉଡିଯିବ ହୋସ୍
ସୂଚନାଯୋଗ୍ୟ ଯେ, ଅମିତାଭ ବଚ୍ଚନ ଅଯୋଧ୍ୟାରେ ଜମି ମଧ୍ୟ କିଣିଛନ୍ତି । ରାମ ମନ୍ଦିରଠାରୁ ସେ କିଣିଥିବା ଜାଗା ମାତ୍ର ୧୫ ମିନିଟ ଦୂରତା ରହିଛି । ଏହି ଫ୍ଲଟର ଦାମ ପ୍ରାୟ ୧୪.୫ କୋଟି ଟଙ୍କା ଅଟେ ବୋଲି ଜଣାପଡିଛି । ସେପଟେ ବିଗ୍ ବିଙ୍କ ଆଗାମୀ ଫିଲ୍ମ ବିଷୟରେ କହିବାକୁ ଗଲେ, ଆଗାମୀ ଫିଲ୍ମ ପ୍ରଭାସଙ୍କ ସହ 'କଲ୍କି 2898 AD'ରେ ନଜର ଆସିବେ । ଏହି ଫିଲ୍ମ ଚଳିତ ବର୍ଷ ମେ ୯ରେ ରିଲିଜ ହେବ । ଏଥିସହ ରଜନୀକାନ୍ତଙ୍କ ସହ 'ଥଲାଇୱର୍ 170' ମଧ୍ୟ ରହିଛି ।
