ନୂଆଦିଲ୍ଲୀ: ଅପରିବର୍ତ୍ତିତ ରହିଲା ଟିକସ ବ୍ୟବସ୍ଥା । ଟିକସ ବ୍ୟବସ୍ଥାରେ କୌଣସି ପରିବର୍ତ୍ତନ ହେବନି । ଆଜି ଅନ୍ତରୀଣ ବଜେଟ ଉପସ୍ଥାପନ ଅବସରରେ ଏହି ଘୋଷଣା କରିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ଆଗକୁ ଲୋକସଭା ନିର୍ବାଚନ ଥିବାରୁ ଆୟକର ସୀମାଛାଡ ଉପରେ ସମସ୍ତଙ୍କ ନଜର ରହିଥିଲା । ମାତ୍ର ପ୍ରଚଳିତ ଟିକସ ବ୍ୟବସ୍ଥାକୁ ଅପରିବର୍ତ୍ତିତ ରଖାଯାଇଛି । ଗତ ଥରର ଆୟକର ସ୍ଲାବ ଏଥର ଲାଗୁ ହେବ । ଅର୍ଥାତ୍ ପୂର୍ବଭଳି ୭ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ କୌଣସି ଟିକସ ଦେବାକୁ ପଡିବ ନାହିଁ ବୋଲି ଅର୍ଥମନ୍ତ୍ରୀ ଘୋଷଣା କରିଛନ୍ତି ।
ଆୟକର ଛାଡ଼ ସୀମା ଅପରିବର୍ତ୍ତିତ: ଏହା ଅନ୍ତରୀଣ ବଜେଟ ହୋଇଥିବାରୁ ଟିକସ ବ୍ୟବସ୍ଥାରେ କୌଣସି ପରିବର୍ତ୍ତନ କରାଯାଇନି । ନିର୍ବାଚନ ପରେ ନୂଆ ସରକାର ପୂର୍ଣ୍ଣାଙ୍ଗ ବଜେଟରେ ଆୟକର ଛାଡ ସୀମା ସମ୍ପର୍କିତ ବଡ଼ ନିଷ୍ପତ୍ତି ନେଇପାରନ୍ତି । ତେବେ ଟ୍ୟାକ୍ସ ରିଟର୍ଣ୍ଣ ଫାଇଲ ସହଜ ଓ ସରଳ କରାଯିବ । ଡାଇରେକ୍ଟ ଟ୍ୟାକ୍ସ ଓ ଇନଡାଇରେକ୍ଟ ଟ୍ୟାକ୍ସ ଅପରିବର୍ତ୍ତିତ ରହିବ । କର୍ପୋରେଟ ଟିକସ ହାର ୩୦ ପ୍ରତିଶତରୁ ୨୫ ପ୍ରତିଶତକୁ ହ୍ରାସ କରାଯିବା ନେଇ ଘୋଷଣା କରିଛନ୍ତି ଅର୍ଥମନ୍ତ୍ରୀ । ସେହିପରି ବିତ୍ତୀୟ ନିୟଣ୍ଟକୁ 4.5%କୁ ହ୍ରାସ କରିବାକୁ ସରକାର ଲକ୍ଷ୍ୟ ରଖିଛନ୍ତି । ୨୦୨୩-୨୫ ବର୍ଷରେ ବିତ୍ତୀୟ ନିଅଣ୍ଟ ୫.୧ ପ୍ରତିଶତ ହ୍ରାସ ହେବା ଲକ୍ଷ୍ୟ ରଖାଯାଇଛି ।
