ହାଇଦ୍ରାବାଦ: କାଶ୍ମୀରରେ ନିର୍ବାଚନ ଡ୍ୟୁଟି ସାରି ଫେରୁଥିବା ବେଳେ ସୀମା ସୁରକ୍ଷା ବଳ (BSF)ର ଏକ ବସ ଖାଇକୁ ଖସିପଡିଛି । ଏଥିରେ 3 ଜଣ ଯବାନ ଶହୀଦ ହୋଇଥିବା ବେଳେ 30ରୁ ଅଧିକ ଆହତ ହୋଇଛନ୍ତି । ଆହତଙ୍କ ମଧ୍ୟରେ 6ଜଣ ଗୁରୁତର ରହିଥିବାରୁ ମୃତ୍ୟୁସଂଖ୍ୟା ବଢିବାର ମଧ୍ୟ ଯଥେଷ୍ଟ ଆଶଙ୍କା ରହଛି । ସମସ୍ତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ଗତକାଲି (ଶୁକ୍ରବାର) ସଂଧ୍ୟାରେ କାଶ୍ମୀରର ବଡଗାମ ଅନ୍ତର୍ଗତ ବ୍ରେଲଓ୍ବାଟର ହୋଲ ଏରିଆରେ ଏହି ଦୁର୍ଘଟଣା ଘଟିଛି । ବସଟି ଭାରସାମ୍ୟ ହରାଇ ଗଭୀର ଖାଇକୁ ଖସି ପଡିଥିବା ସନ୍ଦେହ କରାଯାଉଛି ।
- ଖାଇକୁ ଖସିଲା ଯବାନଙ୍କୁ ନେଇ ଯାଉଥିବା ବସ:-
ସୂଚନା ଅନୁସାରେ, ଏହି ଘରୋଇ ବସରେ ପ୍ରାୟ 35ଜଣ ବିଏସଏଫ ଯବାନ ଥିଲେ । ଗାଡିଟି ଖାନ ସାହିବ ଓ୍ବାଟରହୋଲ ପୋଲିସ ଷ୍ଟେସନ ଅଭିମୁଖେ ବାହାରିଥିଲେ । ଏହାକୁ ଜଣେ ସିଭିଲିଆନ ଡ୍ରାଇଭର ଚଳାଉଥିଲେ । ସଂଧ୍ୟା ପ୍ରାୟ 5ଟା ସମୟରେ ଥାନାର ପ୍ରାୟ 6ଶହ ମିଟର ଦୂରରେ ବସଟି ଭାରସାମ୍ୟ ହରାଇ ଏକ ରାସ୍ତାକଡ ଖାଇକୁ ଖସି ପଡିଥିଲା । ତୁରନ୍ତ ସିଆରପିଏଫ, ପୋଲିସ ଓ ସ୍ଥାନୀୟ ଲୋକେ ଉଦ୍ଧାର ଅପରେସନ ଆରମ୍ଭ କରି ଆହତଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ । ସେଠାରେ 3 ଜଣଙ୍କୁ ମୃତ ଘୋଷଣା କରାଯାଇଥିଲା । ଅନ୍ୟ ଆହତ ଯବାନମାନେ ଏବେ ଚିକିତ୍ସାଧୀନ ରହିଛନ୍ତି ।
#WATCH | J&K: 32 BSF personnel injured and 3 lost their lives after their bus rolled down a hilly road and fell into a gorge in Brell Waterhail area of Central Kashmir's Budgam district. Driver of the bus also injured.
— ANI (@ANI) September 20, 2024
Visuals from outside Shri Maharaja Hari Singh Hospital in… pic.twitter.com/s1BvFv6mWN
- ନିର୍ବାଚନ ପାଇଁ ଘାଟିରେ ଅଦ୍ଭୁତପୂର୍ବ ସୁରକ୍ଷା ବ୍ୟବସ୍ଥା:-
କାଶ୍ମୀରରେ ବିଧାନସଭା ନିର୍ବାଚନ ପାଇଁ ବ୍ୟାପକ ସୁରକ୍ଷା ବଳ ମୁତୟନ ହୋଇଛନ୍ତି । ତିନୋଟି ପର୍ଯ୍ୟାୟରେ ଶେଷ ହେବାକୁ ଥିବା ବିଧାନସଭା ନିର୍ବାଚନର ପ୍ରଥମ ପର୍ୟ୍ୟାୟ ମତଦାନ ଶେଷ ହୋଇସାରିଛି । 18 ତାରିଖରେ ପ୍ରଥମ ପର୍ଯ୍ୟାୟରେ 24 ଆସନ ପାଇଁ ଭୋଟ ପଡିଛି । 25 ତାରିଖରେ ଦ୍ବିତୀୟ ପର୍ଯ୍ୟାୟ ଭୋଟିଂ ହେବ । ନିର୍ବାଚନ ପାଇଁ ବିଭିନ୍ନ ସ୍ଥାନରେ ଫୋର୍ସ ମୁତୟନକୁ ବୃଦ୍ଧି କରାଯାଇଛି । ସୀମା ସୁରକ୍ଷା ବଳ, କେନ୍ଦ୍ରୀୟ ରିଜର୍ଭ ଫୋର୍ସ ଓ ସ୍ଥାନୀୟ ପୋଲିସ ସହ ସ୍ଥଳସେନାର ଯବାନମାନେ ମଧ୍ୟ ବିଭିନ୍ନ ସ୍ଥାନରେ ନିୟୋଜିତ ହୋଇଛନ୍ତି । ପ୍ରଥମ ପର୍ଯ୍ୟାୟ ମତଦାନ ବେଳେ କୌଣସି ହିଂସା କିମ୍ବା ଆତଙ୍କୀ କାର୍ଯ୍ୟକଳାପ ସାମ୍ନାକୁ ଆସିନି । 2014 ପରେ ପ୍ରାୟ 10 ବର୍ଷ ଘାଟିରେ ନିର୍ବାଚନ ଅନୁଷ୍ଠିତ ହେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
