ଲକ୍ଷ୍ନୌ: ଦୁଇ ଦିନିଆ ବାରଣାସୀ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗତକାଲି (ଗୁରୁବାର) ରାତିରେ ଫ୍ଲାଏ ଓଭର ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚାଲି ଚାଲି ଯାଉଥିବା ଦେଖିବାକୁ ମିଳିଛି । ହଠାତ୍ କାରରୁ ବାହାରି ମୋଦି ଏଭଳି ଚାଲି ଚାଲି ଯିବା ଦୃଶ୍ୟ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଏପରିକି ସେହି ସମୟରେ ସେଠାରେ ଉପସ୍ଥିତ ଥିବା ପୋଲିସ ମଧ୍ୟ ଦୌଡ଼ିବାକୁ ଲାଗିଥିଲେ । ପ୍ରଧାନମନ୍ତ୍ରୀଙ୍କ ପଛକୁ ରହିଥିଲେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ସୂଚନା ଅନୁସାରେ, ଗତକାଲି ରାତିରେ ବାରଣାସୀ ପହଞ୍ଚିଥିଲେ ପ୍ରଧାନମନ୍ତ୍ରୀ ମୋଦି। ସେଠାରେ ତାଙ୍କୁ ଭବ୍ୟ ସ୍ବାଗତ କରାଯାଇଥିଲା । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ତାଙ୍କ ସହ ଉପସ୍ଥିତ ଥିଲେ ।
ପ୍ରଥମେ ବାବତପୁର ସ୍ଥିତ ଲାଲ ବାହାଦୂର ଶାସ୍ତ୍ରୀ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିଥିଲେ ପ୍ରଧାନମନ୍ତ୍ରୀ । ଏହାପରେ ସେଠାରୁ 25 କିଲୋମିଟର ଦୂରରେ ଅବସ୍ଥିତ ଗେଷ୍ଟ ହାଉସକୁ ସଡ଼କପଥରେ ଯାତ୍ରା କରୁଥିଲେ । ସେହି ସମୟରେ ପୁଷ୍ପ ବୃଷ୍ଟି କରାଯାଇ ମୋଦିଙ୍କୁ ଭବ୍ୟ ସ୍ବାଗତ କରାଯାଇଥିଲା । ସ୍ଥାନୀୟଲୋକେ ନିଜ ନିଜ ବାଲକୋନିରୁ ମୋଦିଙ୍କୁ ଦେଖୁଥିବାବେଳେ ସେମାନଙ୍କୁ ଅଭିବାଦନ ଜଣାଇଥିଲେ ପ୍ରଧାନମନ୍ତ୍ରୀ । ତେବେ ଯିବା ବାଟରେ ଘଟିଥିଲା ଆଶ୍ଚର୍ଯ୍ୟଜନକ ଘଟଣା । ପୁଲୱରିଆ ଫ୍ଲାଏ ଓଭର ଉପରେ ଗାଡ଼ି ରଖି ହଠାତ ବାହାରକୁ ବାହାରିଥିଲେ ପ୍ରଧାନମନ୍ତ୍ରୀ । ଯାହା ଦେଖିବା ପରେ ସେଠାରେ ଉପସ୍ଥିତ ଥିବା ପୋଲିସ ଅଧିକାରୀମାନେ ଦୌଡ଼ିବାକୁ ଲାଗିଥିଲେ । ଏହାପରେ ସେହି ଓଭର ବ୍ରିଜ ଉପରେ ପ୍ରଧାନମମନ୍ତ୍ରୀ ମୋଦି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ ଧୀରେ ଧୀରେ ପାଦରେ ଚାଲି ଚାଲି ଯାଇଥିଲେ ।
ଏହା ମଧ୍ୟ ପଢନ୍ତୁ...ଜମ୍ମୁରେ 'ଆର୍ଟିକିଲ ୩୭୦' ଫିଲ୍ମ ବିଷୟରେ କହିଲେ ମୋଦି, କୃତଜ୍ଞତା ଜଣାଇଲେ ୟାମୀ
ସୂଚନା ଅନୁସାରେ, ଫୁଲୱରିଆ ଫ୍ଲାଇଓଭରର ନିର୍ମାଣ କାମ 2018 ମସିହାରେ ଆରମ୍ଭ ହୋଇଥିଲା । ଗତ ବର୍ଷ ଅର୍ଥାତ୍ 2023ରେ ସରିଥିଲା ନିର୍ମାଣ । ଗତ ଡିସେମ୍ବରରେ ପ୍ରଧାନମନ୍ତ୍ରୀ ଏହାକୁ ଲୋକାର୍ପଣ କରିଥିଲେ । ବାବତପୁର ବିମାନବନ୍ଦର ଓ ଗାଜିପୁର ସମେତ ଅନ୍ୟ ଜିଲ୍ଲାରୁ ବାରଣାସୀକୁ ଯିବା ପାଇଁ ପୂର୍ବରୁ ଅଧିକ ସମୟ ଲାଗୁଥିଲା । ହେଲେ ଏହି ବ୍ରିଜ ନିର୍ମାଣ ପରେ ପାଖାପାଖି 45 ମିନିଟ୍ କମ୍ ସମୟ ଲାଗୁଥିବା ଜଣାପଡ଼ିଛି । ତେବେ ଏୟାରପୋର୍ଟରୁ ଆସିବା ପରେ ଏହି ରାସ୍ତା ଦେଇ ବନାରସ ଲୋକୋମୋଟିଭ ୱାର୍କସପ୍ ଅଭିମୁଖେ ଯାତ୍ରା କରିଥିଲେ ଉଭୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ପ୍ରଧାନମନ୍ତ୍ରୀ ଆଗରେ ଯାଉଥିବାବେଳେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ତାଙ୍କ ପଛେ ପଛେ ଯାଉଥିବାର ଦୃଶ୍ୟ ଦେଖିବାକୁ ମିଳିଥିଲା । ପାଖାପାଖି 5-7ମିନିଟ ଧରି ଏହି ଫ୍ଲାଏ ଓଭର ଉପରେ ପାଦରେ ଚାଲି ଚାଲି ଯାଉଥିବା ନଜର ଆସିଥିଲେ ପ୍ରଧାନମନ୍ତ୍ରୀ ମୋଦି ।
