ନୂଆଦିଲ୍ଲୀ: କାଶ୍ମୀରର ଅତିରିକ୍ତ ପୋଲିସ୍ ମହାନିର୍ଦ୍ଦେଶକ ଦାୟିତ୍ବରେ ଥିବା ଓଡିଆ ‘ଆଇପିଏସ’ ଅଧିକାରୀ ରଶ୍ମୀ ରଞ୍ଜନ ସ୍ବାଇଁଙ୍କୁ ଡିଜିପି ଭାବେ ନିଯୁକ୍ତ କରିଛନ୍ତି କେନ୍ଦ୍ର ସରକାର । ଆଜି ଗୃହ ମନ୍ତ୍ରଣାଳୟ ବିଜ୍ଞପ୍ତି ଜାରି କରି ଏହି ସୂଚନା ଦେଇଛି । 1991 ବ୍ୟାଚର AGMUT କ୍ୟାଡରର ଭାରତୀୟ ପୋଲିସ ସେବା ଅଧିକାରୀ ରଶ୍ମୀ ରଞ୍ଜନ ଗତବର୍ଷ ନଭେମ୍ବରରେ ଜମ୍ମୁ କାଶ୍ମୀର ଅତିରିକ୍ତ ଡିଜିପି ଭାବେ ଦିଲବାଗ ସିଂଙ୍କଠାରୁ ଦାୟିତ୍ବ ଗ୍ରହଣ କରିଥିଲେ । ଏବେ ତାଙ୍କୁ ରାଜ୍ୟ ପୋଲିସର ଏହି ସର୍ବୋଚ୍ଚ ପଦରେ ନିୟମିତ ନିଯୁକ୍ତି ମିଳିଛି । ସେ ଚଳିତବର୍ଷ (2024) ସେପ୍ଟେମ୍ବର 30 ତାରିଖ ପର୍ଯ୍ୟନ୍ତ ଏହି ଦାୟିତ୍ବରେ ରହିବେ ।
- ରଶ୍ମୀ ରଞ୍ଜନଙ୍କ ସର୍ଭିସ୍ କ୍ୟାରିୟର:-
1991 ବ୍ୟାଚର ଭାରତୀୟ ପୋଲିସ ସେବା (IPS) ଅଧିକାରୀ ହେଉଛନ୍ତି ରଶ୍ମୀ ରଞ୍ଜନ । ସେ କେନ୍ଦ୍ରଶାସିତ ଅଞ୍ଚଳ ଓ ଉତ୍ତର-ପୂର୍ବ ରାଜ୍ୟ ପାଇଁ ସ୍ବତନ୍ତ୍ର ଭାବେ ଥିବା ‘AGMUT’ କ୍ୟାଡରର ଅଧିକାରୀ । ସେ ପୋଲିସ ସେବାରେ ଅନେକ ବର୍ଷ କାଶ୍ମୀରରେ କାଟିଛନ୍ତି । ପୋଲିସ ମହାନିର୍ଦ୍ଦେଶକ ଭାବେ ଦାୟିତ୍ବ ଗ୍ରହଣ କରିବା ପୂର୍ବରେ ସେ କାଶ୍ମୀର ପୋଲିସରେ ଏକାଧିକ ଉଚ୍ଚପଦସ୍ଥ ପଦବୀରେ ସଫଳତାର ସହ କାର୍ଯ୍ୟ କରିବାର ଅଭିଜ୍ଞତା ମଧ୍ୟ ରଖିଛନ୍ତି ।
- SDPOରୁ ଆରମ୍ଭ କରିଥିଲେ ଚାକିରି:-
1991ରେ ଆଇପିଏସ ପାଇବା ପରେ SDPO ଭାବେ ଚାକିରି ଆରମ୍ଭ କରିଥିବା ରଶ୍ମୀ ରଞ୍ଜନ କାର୍ଗିଲ, ପୁଞ୍ଚ, ରାମବାନ ପରି କାଶ୍ମୀରର ଆତଙ୍କବାଦପ୍ରବଣ ତଥା ଆହ୍ବାନପୂର୍ଣ୍ଣ ଜିଲ୍ଲାରେ ଏସପି ଭାବେ କାର୍ଯ୍ୟ କରିଥିଲେ । ଏହାପରେ ସେ ଏସଏସପି ପାହ୍ୟା ସହ ଭିଜିଲାନ୍ସ ଡିଆଇଜି ଭାବେ ମଧ୍ୟ କାର୍ଯ୍ୟ କରିଛନ୍ତି । 2006ରୁ ସେ କେନ୍ଦ୍ରୀୟ ଡେପୁଟେସନରେ ଯାଇ ଅନେକ ଗୁରୁଦାୟିତ୍ବ ସମ୍ଭାଳିଥିଲେ । 2020ରେ ସେ ପୁଣି କାଶ୍ମୀର ପୋଲିସ ବିଭାଗକୁ ଫେରିବା ସହ ଅପରାଧିକ ଅନୁସନ୍ଧାନ ସଂସ୍ଥା (CID)ର ମୁଖ୍ୟ ଭାବେ ଦାୟିତ୍ବ ଗ୍ରହଣ କରିଥିଲେ । ଗତବର୍ଷ (2023) ନଭେମ୍ବରରେ ତାଙ୍କୁ ଜମ୍ମୁ କାଶ୍ମୀର ପୋଲିସର ଅତିରିକ୍ତ ମହାନିର୍ଦ୍ଦେଶକ ଭାବେ ଦାୟିତ୍ବରେ ଅବସ୍ଥାପିତ କରାଯାଇଥିଲା ।
- ଘାଟିରେ ବଢିଛି ଆତଙ୍କୀ ଆହ୍ବାନ:
ନିକଟରେ ଘାଟିରେ ଏକାଧିକ ଅନୁପ୍ରବେଶ ଓ ଆତଙ୍କୀ ଆକ୍ରମଣ ଘଟଣା ସାମ୍ନାକୁ ଆସିଛି । ଏହିକ୍ରମରେ କେନ୍ଦ୍ର ସରକାର ବଡ ପଦକ୍ଷେପ ମଧ୍ୟ ଗ୍ରହଣ କରିଛନ୍ତି । ସୀମା ସୁରକ୍ଷା ବଳ (ବିଏସଏଫ) ମହାନିର୍ଦ୍ଦେଶକ ନିତୀନ ଅଗ୍ରଓ୍ବାଲ ଓ ସ୍ବତନ୍ତ୍ର ମହାନିର୍ଦ୍ଦେଶକ ଓ୍ବାଇ.ବି ଖୁରାନିଆଙ୍କୁ ତୁରନ୍ତ ପଦରୁ ପ୍ରତ୍ୟାହାର କରାଯାଇ କେନ୍ଦ୍ରୀୟ ଡେପୁଟେସନ ସରିବା ପୂର୍ବରୁ ରାଜ୍ୟ କ୍ୟାଡରକୁ ଫେରାଇଛି କେନ୍ଦ୍ର । ଏହି କାର୍ଯ୍ୟାନୁଷ୍ଠାନ, କାଶ୍ମୀରରେ ଆତଙ୍କୀ କାର୍ଯ୍ୟକଳାପ ବୃଦ୍ଧି ପାଇଁ ହୋଇଥିବା ଚର୍ଚ୍ଚା ହେଉଛି । ‘ବିଏସଏଫ’ ସ୍ବତନ୍ତ୍ର ଡିଜି ଥିବା ଓଡିଶା କ୍ୟାଡର ଅଧିକାରୀ ଓ୍ବାଇ.ବି ଖୁରାନିଆ ରାଜ୍ୟ କ୍ୟାଡରକୁ ଫେରିଛନ୍ତି । ଉତ୍ତର ପ୍ରଦେଶ କ୍ୟାଡର ଅଧିକାରୀ ଦଲଜିତ ସିଂ ଚୌଧୁରୀ ‘ବିଏସଏଫ’ର ନୂତନ ଡିଜିପି ହୋଇଛନ୍ତି ।
ରଶ୍ମୀ ରଞ୍ଜନଙ୍କ ସାମ୍ନାରେ ଚ୍ୟାଲେଞ୍ଜ:-
ଆଜି ଏହିକ୍ରମରେ ଜମ୍ମୁ କାଶ୍ମୀର ପୋଲିସ ଡିଜିପି ଭାବେ ଆଇପିଏସ ରଶ୍ମୀ ରଞ୍ଜନ ସ୍ବାଇଁଙ୍କୁ ନିଯୁକ୍ତ କରିଛି କେନ୍ଦ୍ର । ଆଗକୁ ଘାଟିରେ ବହୁପ୍ରତୀକ୍ଷିତ ବିଧାନସଭା ନିର୍ବାଚନ ମଧ୍ୟ ହେବାକୁ ଯାଉଛି । ଶୀତଦିନ ଆରମ୍ଭରୁ ନିୟନ୍ତ୍ରଣ ରେଖାରେ ପାକିସ୍ତାନ ପ୍ରେରିତ ଆତଙ୍କବାଦୀଙ୍କ ଅନୁପ୍ରବେଶ ବୃଦ୍ଧି ପାଇବ । ଘାଟିରେ ଟାର୍ଗେଟକିଲିଂ ରୋକିବା ଓ ଆଗାମୀ ଦିନରେ ହେବାକୁ ଥିବା ବିଧାନସଭା ନିର୍ବାଚନ ପରିଚାଳନା ଅଧିକାରୀ ସ୍ବାଇଁଙ୍କ ପାଇଁ ଦକ୍ଷତାର ଆହ୍ବାନ ହେବାକୁ ଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
