ନୂଆଦିଲ୍ଲୀ: ଲୋକସଭା ନିର୍ବାଚନରେ ବିଜୟୀ ପରେ ଆସନ୍ତା ୯ ତାରିଖରେ ତୃତୀୟ ଥର ପ୍ରଧାନମନ୍ତ୍ରୀ ଭାବେ ଶପଥ ନେବେ ନରେନ୍ଦ୍ର ମୋଦି । ଦେଶରେ ଆରମ୍ଭ ହେବ ମୋଦି ସରକାର ୩.୦ । ମୋଦିଙ୍କ ଶପଥ ଗ୍ରହଣ ସମାରୋହକୁ ମହାଆଡମ୍ବରପୂର୍ଣ୍ଣ କରିବାକୁ ଯୋଜନା କରାଯାଉଛି ।ଏଥିପାଇଁ ବାଂଲାଦେଶ, ଭୁଟାନଠାରୁ ଆରମ୍ଭ କରି ଶ୍ରୀଲଙ୍କା ପର୍ଯ୍ୟନ୍ତ ବିଭିନ୍ନ ରାଷ୍ଟ୍ରମୁଖ୍ୟଙ୍କୁ ସମାରୋହରେ ନିମନ୍ତ୍ରଣ କରାଯାଇଛି । ଏହାପୂର୍ବରୁ ଆଜି (ଶୁକ୍ରବାର) ଏନଡିଏର ସଂସଦୀୟ ସଦସ୍ୟ ବୈଠକ ବସିବ । ଏଥିରେ ସାଂସଦମାନଙ୍କ ମଧ୍ୟରେ ମନ୍ତ୍ରଣାଳୟ ବଣ୍ଟନ ନେଇ ଚର୍ଚ୍ଚା ହୋଇପାରେ । ଏହାପରେ ଏନଡିଏ ନେତାମାନେ ରାଷ୍ଟ୍ରପତିଙ୍କୁ ଭେଟି ସରକାର ଗଢିବାକୁ ଦାବି ଜଣାଇବେ ।
ଲୋକସଭା ନିର୍ବାଚନରେ ବିଜେପି ଏକାକୀ ସ୍ପଷ୍ଟ ବହୁମତ ହାସଲ କରିବାରେ ଅକ୍ଷମ ହୋଇଛି । ସରକାର ଗଠନ ପାଇଁ ତାକୁ ଏନଡିଏର ଦୁଇ ପ୍ରମୁଖ ସହଯୋଗୀ ଦଳ ଜେଡିୟୁ ଏବଂ ଟିଡିପି ଉପରେ ନିର୍ଭର ହେବାକୁ ପଡୁଛି । ଏବେ ଏହି ଦୁଇ ଦଳ କେନ୍ଦ୍ର କ୍ୟାବିନେଟରେ କେତେକ ଗୁରୁତ୍ବପୂର୍ଣ୍ଣ ବିଭାଗ ଦାବି କରିଛନ୍ତି । ବାଚସ୍ପତି, ଗୃହ, ଅର୍ଥ ଏବଂ ରେଳ ଆଦି ବିଭାଗ ସେମାନେ ଚାହୁଁଥିବା ଜଣାପଡିଛି । ତେଣୁ ମନ୍ତ୍ରୀମଣ୍ଡଳ ତାଲିକା ଚୂଡାନ୍ତ ହୋଇନଥିବାରୁ ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବକୁ ଗୋଟିଏ ଦିନ ଘୁଞ୍ଚାଇ ଦିଆଯାଇଛି ।
ଆସନ୍ତା ଜୁନ ୮ ତାରିଖରେ ଶପଥ ଗ୍ରହଣ ଥିଲା । ହେଲେ ଏବେ ଆସନ୍ତା ୯ ତାରିଖ ସନ୍ଧ୍ୟାରେ ରାଷ୍ଟ୍ରପତି ଭବନରେ ଶପଥ ଗ୍ରହଣ ସମାରୋହର ଆୟୋଜିତ ହେବ । ସେହିଦିନ କେନ୍ଦ୍ର ମନ୍ତ୍ରୀମଣ୍ଡଳ ମଧ୍ୟ ଶପଥ ନେଇପାରେ ବୋଲି କୁହାଯାଉଛି । ତେବେ ଆଜି ବସିବାକୁ ଥିବା ଏନଡିଏ ବୈଠକରେ ଯୋଗ ଦେବାକୁ ଚନ୍ଦ୍ରବାବୁ ନାଇଡୁ ୩ ଦିନିଆ ଦିଲ୍ଲୀ ଗସ୍ତରେ ଯାଇଛନ୍ତି ଏବଂ ଏଥିରେ ଉପସ୍ଥିତ ରହିବାକୁ ଟିଡିପିର ସବୁ ସାଂସଦଙ୍କୁ ମଧ୍ୟ ଡକାଇଛନ୍ତି ।
ଏହାପୂର୍ବରୁ ଗତ ୫ ତାରିଖରେ ମୋଦିଙ୍କ ବାସଭବନରେ ଏନଡିଏ ବୈଠକ ବସିଥିଲା । ଏଥିରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର, ଚନ୍ଦ୍ରବାବୁ ନାଇଡୁ, ଏକାନାଥ ସିନ୍ଦେ, ଚିରାଗ ପାଶୱାନ ପ୍ରମୁଖ ଉପସ୍ଥିତ ରହିଥିଲେ । ବୈଠକରେ ମୋଦି ଏନଡିଏ ନେତା ଭାବେ ନିର୍ବାଚିତ ହୋଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
