ମୁମ୍ବାଇ: ଲୋକସଭା ନିର୍ବାଚନର ପଞ୍ଚମ ପର୍ଯ୍ୟାୟ ପାଇଁ ମତଦାନ ସୋମବାର (ମେ ୨୦) ଜାରି ରହିଛି । ମହାରାଷ୍ଟ୍ର, ଉତ୍ତରପ୍ରଦେଶ ସମେତ ୬ ଟି ରାଜ୍ୟ ଓ ୨ ଟି କେନ୍ଦ୍ର ଶାସିତ ଅଞ୍ଚଳର ମୋଟ ୪୯ ଟି ଆସନ ପାଇଁ ମତଦାନ ଅନୁଷ୍ଠିତ ହୋଇଯାଇଛି । ଏହି ପରିପ୍ରେକ୍ଷୀରେ ମହାରାଷ୍ଟ୍ର ପାଇଁ ବି-ଟାଉନ ସେଲିବ୍ରିଟିମାନେ ମତଦାନ ବୁଥରେ ପହଞ୍ଚି ଭୋଟିଂ କରିଛନ୍ତି । ଅକ୍ଷୟ କୁମାର, ଫରହାନ ଅଖତର, ରାଜକୁମାର ରାଓ, ଜାହ୍ନବୀ କପୁର, ସାନିଆ ମଲହୋତ୍ରାଙ୍କ ପରି ସେଲିବ୍ରିଟି ମୁମ୍ୱାଇର ବିଭିନ୍ନ ମତଦାନ କେନ୍ଦ୍ରରେ ଭୋଟ ଦେଇଛନ୍ତି । ଯାହାର ଫଟୋ ଏବେ ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।
ଅକ୍ଷୟ କୁମାର ଦେଲେ ଭୋଟ: ବଲିଉଡ ତାରକା ଅକ୍ଷୟ କୁମାର ମୁମ୍ବାଇର ଜୁହୁ ସ୍ଥିତ ମତଦାନ କେନ୍ଦ୍ରରେ ଧାଡ଼ିରେ ଛିଡ଼ା ହୋଇ ଭୋଟ ଦେଇଛନ୍ତି । ଏହା ପରେ ସେ ଗଣମାଧ୍ୟମ ସହ କଥାବାର୍ତ୍ତା ବେଳେ ଖିଲାଡି କୁମାର କହିଛନ୍ତି, ''ମୁଁ ଚାହୁଁଛି ମୋର ଭାରତ ବିକାଶ ଏବଂ ଶକ୍ତିଶାଳୀ ହେଉ । ଏହାକୁ ଧ୍ୟାନରେ ରଖି ମୁଁ ଭୋଟ୍ ଦେଲି । ଯାହା ଅନୁଭବ କରୁଛନ୍ତି ତାକୁ ନେଇ ସାରା ଭାରତବାସୀ ଭୋଟ ଦେବା ଉଚିତ । ମୁଁ ଭାବୁଛି ଏଥର ଭୋଟ ପ୍ରତିଶତ ଭଲ ହେବ ।''
ରାଜକୁମାର ରାଓ ଏବଂ ଜାହ୍ନବୀ କପୁର ଦେଲେ ଭୋଟ୍: 'ମିଷ୍ଟର ଆଣ୍ଡ ମିସେସ ମାହି' ଫେମ ତାରକା ରାଜକୁମାର ରାଓ ଏବଂ ଜାହ୍ନବୀ କପୁର ମଧ୍ୟ ମୁମ୍ୱାଇର ଏକ ମତଦାନ କେନ୍ଦ୍ରରେ ଭୋଟ ଦେଇଛନ୍ତି । ଏହି ସମୟରେ ଅଭିନେତା ରାଜକୁମାର ରାଓ ଗଣମାଧ୍ୟମ ସହ କଥାବାର୍ତ୍ତା କରି କହିଛନ୍ତି, ''ମୁଁ ବହୁତ ଖୁସି ଯେ ନିର୍ବାଚନ ଆୟୋଗ ମୋତେ ଜାତୀୟ ଆଇକନ୍ ଭାବରେ ବାଛିଲେ । ଏହା ଆମ ଦେଶ ପ୍ରତି ଏକ ବଡ ଦାୟିତ୍ୱ । ଆମ ମାଧ୍ୟମରେ, ଯଦି ଲୋକମାନେ ପ୍ରଭାବିତ ହୋଇପାରିବେ ତେବେ ନିଶ୍ଚିତ ଭାବରେ ଏହା ହେଉଛି ସବୁଠାରୁ ବଡ ଜିନିଷ । ଯାହା ଆମେ ଲୋକଙ୍କୁ ଭୋଟ୍ ଦେବାର ମହତ୍ତ୍ୱ ବିଷୟରେ ଅବଗତ କରାଇବା । ଏଣୁ ମୁଁ ସମସ୍ତଙ୍କୁ ନିବେଦନ କରୁଛି ଦୟାକରି ବାହାରକୁ ଆସି ଭୋଟ୍ ଦିଅନ୍ତୁ ।''
ଫରହାନ ଖାନ ତାଙ୍କ ପରିବାର ସହ ଦେଲେ ଭୋଟ: ବଲିଉଡ ଅଭିନେତା ତଥା ନିର୍ମାତା ଫରହାନ ଅଖତର ଏବଂ ଉଭଣୀ ତଥା ନିର୍ଦ୍ଦେଶକ ଜୋୟା ଅଖତର ନିଜ ପରିବାର ସହ ମୁମ୍ବାଇର ଏକ ମତଦାନ ବୁଥରେ ଭୋଟ୍ ଦେଇଛନ୍ତି । ଏହି ସମୟରେ ପୁରା ପରିବାର ପାପାରାଜିଙ୍କୁ ପୋଜ ଦେଇଥିବା ବେଳେ ଲୋକଙ୍କୁ ଭୋଟ୍ ଦେବାକୁ ମଧ୍ୟ ନିବେଦନ କରିଛନ୍ତି । ସେହିପରି ବଲିଉଡ ଅଭିନେତ୍ରୀ ତବୁ, ସାନିଆ ମଲହୋତ୍ରା, ଭେଟେରାନ ଅଭିନେତଚ୍ରୀ ଶୋଭା ଖୋଟଙ୍କ ସମେତ ଅନେକ ସେଲିବ୍ରିଟି ମଧ୍ୟ ମୁମ୍ୱାଇରେ ନିଜ ମତ ସାବ୍ୟସ୍ତ କରିଛନ୍ତି ।
ଏହା ମଧ୍ୟ ପଢନ୍ତୁ: ଲୋକସଭା ନିର୍ବାଚନ 2024; ଦେଶରେ 5ମ ପର୍ଯ୍ୟାୟ ମତଦାନ, ମୈଦାନରେ 695 ଯୋଦ୍ଧା
ବ୍ୟୁରୋ ରିପୋର୍ଟ, ଇଟିଭି ଭାରତ
