ନୂଆଦିଲ୍ଲୀ: ବଳିଷ୍ଠ ହେଉଛି ଭାରତ ଫ୍ରାନ୍ସ ବନ୍ଧୁତ୍ବ । ସମୃଦ୍ଧ ହେଉଛି ଉଭୟ ଦେଶର ସମ୍ପର୍କ । ପରସ୍ପର ପ୍ରତି ସମ୍ମାନ ଶ୍ରଦ୍ଧା, ସମର୍ଥନ ଓ ବିଶ୍ବାସ ଆହୁରି ଗଭୀର । ବିଶ୍ବର ପରିସ୍ଥିତି ଅନୁସାରେ ଉଭୟ ଦେଶ ନେଉଛନ୍ତି ଏକାଧିକ ଦୃଢ ନିଷ୍ପତି । ସାଧାରଣତନ୍ତ୍ର ଦିବସ 2024ରେ ମୁଖ୍ୟ ଅତିଥି ଭାବେ ଫ୍ରାନ୍ସ ରାଷ୍ଟ୍ରପତି ଭାରତ ଗସ୍ତରେ ଥିବାବେଳେ ହୋଇଛି ଏକାଧିକ ଚୁକ୍ତି । ହେଲିକ୍ୟାପ୍ଟର ଠାରୁ ହତିଆର, ବ୍ୟବସାୟ ଠାରୁ ବଟଲିଂ ପ୍ଲାଣ୍ଟ, ଭିତ୍ତିଭୂମି ଠାରୁ ଭୌଗୋଳିକ ସୀମା ଯାଏଁ ହୋଇଛି ବୁଝାମଣା ।
ଅଧିକ ପଢନ୍ତୁ- ଫ୍ରାନ୍ସର 4 ଜଣ ବିଶିଷ୍ଟ ବ୍ୟକ୍ତିଙ୍କୁ ପଦ୍ମ ସମ୍ମାନ, ସୁଦୃଢ ହେଉଛି ସମ୍ପର୍କ
ବିଦେଶ ମନ୍ତ୍ରଣାଳୟ ପକ୍ଷରୁ ମିଳିଥିବା ସୂଚନା ଅନୁସାରେ ଫ୍ରାନ୍ସ ରାଷ୍ଟ୍ରପତିଙ୍କ ଭାରତ ଗସ୍ତ ଅବସରରେ ଉଭୟ ଦେଶ ମଧ୍ୟରେ ସେନା ହାର୍ଡୱେରର କୋ ଡିଜାଇନିଙ୍ଗ, କୋ ଡେଭଲପମେଣ୍ଟ ଓ କୋ ପ୍ରୋଡକସନ ପାଇଁ ସହମତି ହୋଇଛି । ଉଭୟ ଦେଶ ପ୍ରତିରକ୍ଷା କ୍ଷେତ୍ରରେ ଏକ ନୂଆ ରୋଡ ମ୍ୟାପ ଉପରେ କାମ କରିବେ । ଉଭୟ ଦେଶ ମିଳିତ ଭାବେ ଏକ ମଲ୍ଟି ମିଶନ ହେଲିକ୍ୟାପ୍ଟର ପ୍ରୋଡକସନ କ୍ଷେତ୍ରରେ କାମ କରିବେ । ଭାରତରେ ଫାଇଟର ଜେଟ ଇଞ୍ଜିଂନ ନିର୍ମାଣ ପାଇଁ ଫ୍ରାନ୍ସ ସମସ୍ତ ପ୍ରକାର ବୈଷୟିକ ସହାୟତା ଯୋଗାଇ ଦେବ । ଏହା ବ୍ୟତୀତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରୋନ ଏକାଧିକ ପ୍ରସଙ୍ଗରେ ଆଲୋଚନା କରିଥିଲେ ।
ସେହିପରି ଭାରତ ଫ୍ରାନ୍ସ ମଧ୍ୟରେ ପ୍ରତିରକ୍ଷା, ମହାକାଶ, ଉପଗ୍ରହ ଉତକ୍ଷେପଣ, ସ୍ବଚ୍ଛ ଇନ୍ଧନ, ମିଳିତ ଗବେଷଣା, ସ୍ବାସ୍ଥ୍ୟ ଭିତ୍ତିଭୂମି କ୍ଷେତ୍ରରେ ସହଯୋଗ ପାଇଁ ମଧ୍ୟ ବୁଝାମଣା ହୋଇଛି । ଖାଲି ଏତିକି ନୁହେଁ ଫ୍ରାନ୍ସରେ ଅଧ୍ୟଯନ ପାଇଁ ଭାରତୀୟ ଛାତ୍ରଙ୍କ ଭିସାକୁ ଆହୁରି ସରଳ କରିବେ ଫ୍ରାନ୍ସ ସରକାର ।
ବୈଦେଶିକ ସଚିବ ବିନୟ କ୍ବାତ୍ରା ଦେଇଥିବା ସୂଚନା ଅନୁସାରେ ଉଭୟ ଦେଶ ଏୟାରବସ ହେଲିକେପ୍ଟର ନିର୍ମାଣ ପାଇଁ ମଧ୍ୟ ବୁଝାମଣା ହେଉଛି । ଏହା ପୁଣି ମେକ ଇନ ଇଣ୍ଡିଆ ଅନ୍ତର୍ଗତ ଭାରତରେ ନିର୍ମାଣ ହେବ । ଭାରତରେ H-125 ହେଲିକେପ୍ଟର ଉତ୍ପାଦନ ହେବ । ଏଥିପାଇଁ ଭାରତକୁ ଫ୍ରାନ୍ସ ସମସ୍ତ ବୈଷୟିକ ସହାୟତା ଯୋଗାଇ ଦେବ । H-125 ହେଲିକେପ୍ଟରର ପ୍ରଥମ ଉତ୍ପାଦନ 2026 ମସିହା ସୁଦ୍ଧା ହେବ । ଏଥିରେ 6 ଜଣ ବସିବା ପାଇଁ ବ୍ୟବସ୍ଥା ରହିବ ।
ସେହିଭଳି ଉଭୟ ଦେଶ ପ୍ରତିରକ୍ଷା, ବାଣିଜ୍ୟ, ଶକ୍ତି, ଏଆଇ, ସାଇବର ଅପରାଧ, ସମୁଦ୍ରିକ ବ୍ୟବସାୟ, ସ୍ଥଳସେନା ପାଇଁ ଅତ୍ୟାଧୁନିକ ଅସ୍ତ୍ରଶସ୍ତ୍ର, ଅଟୋମେଟିକ ପରିଚାଳନା ଗାଡି, ରୋବୋଟିକ୍ସ ଭଳି କ୍ଷେତ୍ରରେ ବୁଝାମଣା ହୋଇଛି । ଯାହା ଭାରତର ବିକାଶ ପାଇଁ ବେଶ ସହାୟକ ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
