ନୂଆଦିଲ୍ଲୀ: ପ୍ରଥମ ମୌସୁମୀ ବର୍ଷାରେ ବେହାଲ ଦିଲ୍ଲୀ । ପାଣିରେ ଭାସୁଛି ଜାତୀୟ ରାଜଧାନୀ । ଚାରିଆଡେ ଜଳାର୍ଣ୍ଣବ ସ୍ଥିତି । ରାସ୍ତାଘାଟ ଠାରୁ ଆରମ୍ଭ କରି ବସ୍ତି ଓ ଭିଆଇପି ଅଞ୍ଚଳ ଯାଏଁ ସବୁଠି ଆଣ୍ଠୁଏ ଉଚ୍ଚର ପାଣି ଚାଲୁଛି । ଗାଡି ଗଡିବା ତ ଦୂରରେ କଥା, ଚାଲିକି ଯିବା ବି ମୁସ୍କିଲ ହୋଇଯାଇଛି । କିଛି ସ୍ଥାନରେ ମେଟ୍ରୋ ଚଳାଚଳ ମଧ୍ୟ ପ୍ରଭାବିତ ହୋଇଛି । ସାଧାରଣ ଲୋକଙ୍କଠୁ ନେଇ ରାଜନେତାଙ୍କ ଘରେ ବି ବର୍ଷା ପାଣି ଲହଡି ମାରୁଛି । ଯାହାଫଳରେ ସାଧାରଣ ଜୀବନଯାତ୍ରା ଏକପ୍ରକାର ଠପ୍ ହୋଇଯାଇଛି । ସହରରେ ଏଭଳି ଜଳବନ୍ଦୀ ସମସ୍ୟାକୁ ଦୃଷ୍ଟିରେ ରଖି ଆଜି ଦିଲ୍ଲୀ ସରକାର ସଚିବାଳୟରେ ଜରୁରୀ ବୈଠକ କରିଛନ୍ତି । ଏଥିରେ ସମସ୍ତ କ୍ୟାବିନେଟ ମନ୍ତ୍ରୀ ଏବଂ ବିଭାଗୀୟ ଅଧିକାରୀମାନେ ଉପସ୍ଥିତ ରହିଛନ୍ତି । ସେପଟେ ଦିଲ୍ଲୀ ଉପରାଜ୍ୟପାଳ ଭିକେ ସକ୍ସେନା ସ୍ଥିତିର ସମୀକ୍ଷା କରିବା ପରେ ୨୪ ଘଣ୍ଟିଆ ଏମର୍ଜେନ୍ସି କଣ୍ଟ୍ରୋଲ ରୁମ ସ୍ଥାପନ ପାଇଁ ନିର୍ଦ୍ଦେଶ ଦେଇଛନ୍ତି ।
ଦିଲ୍ଲୀରେ ଗୁରୁବାର ରାତିରୁ ଶୁକ୍ରବାର ସକାଳ ଯାଏ ହୋଇଥିବା ବର୍ଷା ଗତ ୮୮ ବର୍ଷର ରେକର୍ଡ ଭାଙ୍କିଛି । ପାଣିପାଗ ବିଭାଗ ଅନୁସାରେ, ଆଜି ସକାଳ ୮ଟା ୩୦ ସୁଦ୍ଧା ୨୨୮ ମିଲିମିଟର ବର୍ଷ ହୋଇଛି । ଏହାପୂର୍ବରୁ ୧୯୩୬ରେ ଦିଲ୍ଲୀରେ ଏମିତି ବର୍ଷା ହୋଇଥିଲା । ବିଶେଷକରି ପୁରୁଣା ଦିଲ୍ଲୀ, ପୂର୍ବ, ଉତ୍ତର ପୂର୍ବ, ଦକ୍ଷିଣ ଓ ଉତ୍ତର-ପଶ୍ଚିମ ଦିଲ୍ଲୀରେ ଅଧିକ ଜଳବନ୍ଦୀ ସମସ୍ୟା ସାମ୍ନାକୁ ଆସିଛି । ରାସ୍ତାଘାଟ ନଦୀର ଭ୍ରମ ସୃଷ୍ଟି କରୁଥିବାବେଳେ ସ୍ଥିତି ଅତ୍ୟନ୍ତ ସାଂଘାତିକ ରହିଛି ।
#WATCH | Delhi: Potters who sell clay products on the footpath in Paharganj area, suffer losses as heavy rains wash away their products. pic.twitter.com/zs7G9HeRGl
— ANI (@ANI) June 28, 2024
ଆଜି ବି ପ୍ରବଳ ବର୍ଷା ଜାରି ରହିଥିବାରୁ ଦିଲ୍ଲୀ, ଗୁରୁଗାଓଁ ଓ ନୋଏଡାର ଅନେକ ଅଞ୍ଚଳରେ ଜଳବନ୍ଦୀ ଯୋଗୁଁ ଗୁରୁତର ଟ୍ରାଫିକ ସମସ୍ୟା ସୃଷ୍ଟି ହୋଇଛି । ନୋଏଡା ଅଞ୍ଚଳରେ ମୌସୁମୀ ବେଳେ ଯେମିତି ଜଳବନ୍ଦୀ ସମସ୍ୟା ନହୁଏ ସେଥିପାଇଁ ନୋଏଡା ପ୍ରାଧିକରଣ ପ୍ରତିବର୍ଷ କୋଟି କୋଟି ଟଙ୍କା ଖର୍ଚ୍ଚ କରିଥାଏ । ଏହାସତ୍ତ୍ବେ ସବୁ ବର୍ଷାରେ ଗୁରୁତର ଜଳବନ୍ଦୀ ସ୍ଥିତି ସୃଷ୍ଟି ହେଉଛି ।
ଦିଲ୍ଲୀରେ ମୂଷଳଧାରାରେ ବର୍ଷା ଯୋଗୁଁ କେବଳ ସାଧାରଣ ଜନତା ନୁହଁନ୍ତି ନେତାମନ୍ତ୍ରୀଙ୍କୁ ମଧ୍ୟ ନାହିଁ ନଥିବା ସମସ୍ୟା ଭୋଗିବାକୁ ପଡୁଛି । କଂଗ୍ରେସ ସାଂସଦ ଶଶି ଥରରୁ 'ଏକ୍ସ'ରେ କହିଛନ୍ତି, ସକାଳୁ ଉଠିଲା ବେଳକୁ ତାଙ୍କ ଘରେ ଏକ ଫୁଟ ଉଚ୍ଚର ପାଣି ଚାଲୁଥିଲା । ଏହାଯୋଗୁଁ ଘରର କାର୍ପେଟ ସହ ତଳେ ଥିବା ସମସ୍ତ ଆସବାବପତ୍ର ନଷ୍ଟ ହୋଇଯାଇଛି । ସେହିପରି ନ୍ୟୁଜ ଏଜେନ୍ସି ଏଏନଆଇ ଦ୍ବାରା ପୋଷ୍ଟ ଏକ ଭିଡିଓରେ ସମାଜବାଦୀ ପାର୍ଟି ସାଂସଦ ରାମ ଗୋପାଳ ଯାଦବଙ୍କୁ ତାଙ୍କର କର୍ମଚାରୀ ପାଣିରେ ଟେକି ଟେକି ନେଉଥିବା ଦେଖିବାକୁ ମିଳୁଛି । ଏନେଇ ସାଂସଦ କହିଛନ୍ତି, ମୁଁ ସଂସଦ ଯିବାକୁ ଏମିତି କରିବାକୁ ପଡିଛି । ପାଣି ଜମି ରହିଥିବାରୁ ମୋ କର୍ମଚାରୀମାନେ କାର୍ ଯାଏଁ ଟେକିକି ନେଇଥିଲେ ।
ଆଉ ଏକ ଭିଡିଓରେ ଦେଖାଯାଇଛି, ଦିଲ୍ଲୀ ଆଜାଦ ମାର୍କେଟ ଅଞ୍ଚଳରେ ଏକ ଅଣ୍ଡରପାସ୍ ତଳେ ଗୋଟିଏ ଯାତ୍ରୀବାହୀ ବସ୍ ଫସି ରହିଛି । ଏକ ରଶି ସାହାଯ୍ୟରେ ବସ ଭିତରୁ ଯାତ୍ରୀମାନଙ୍କୁ ବାହାର କରାଯାଉଛି ।
ଏହାରି ମଧ୍ୟରେ ଆଜି ସକାଳେ ଦିଲ୍ଲୀର ଇନ୍ଦିରାଗାନ୍ଧୀ ଅନ୍ତର୍ଜାତୀୟ ବିମାନ ବନ୍ଦରର ଟର୍ମିନାଲ-୧ ଛାତ ଭୁଶୁଡି ପଡିଥିଲା । ପ୍ରବଳ ବର୍ଷା ଯୋଗୁଁ ଘଟିଥିବା ଏହି ଅଘଟଣରେ ଜଣଙ୍କ ମୃତ୍ୟୁ ହୋଇଥିବାବେଳେ ଅତିକମରେ ୬ ଜଣ ଆହତ ହୋଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
