ହାଇଦ୍ରାବାଦ: ଆସନ୍ତୁ ଜାଣିବା ଦେଶର ଏମିତି 5ଟି ରାଜ୍ୟ ବିଷୟରେ, ଯେଉଁଠି ପ୍ରତିବର୍ଷ ପ୍ରକୃତିର ପ୍ରଳୟ ଦେଖିବାକୁ ମିଳେ । ଅନେକ ସମୟରେ ଏହି ରାଜ୍ୟଗୁଡିକରେ ବାତ୍ୟା ବହୁ କ୍ଷୟକ୍ଷତି କରିଛି ।
ଓଡ଼ିଶା:
29 ଅକ୍ଟୋବର 1999ରେ ଓଡ଼ିଶାକୁ ଆସିଥିଲା ମହାବାତ୍ୟା । ଯେଉଁଥିରେ 270 କିଲୋମିଟର ବେଗରେ ପବନ ବହିବା ସହ ସବୁକିଛି ଉଡ଼ାଇ ନେଇଥିଲା । ପାଖାପାଖି 10 ହଜାର ଲୋକଙ୍କ ଜୀବନ ଯାଇଥିଲା। ଏହାପରେ ବିଗତ ବର୍ଷମାନଙ୍କରେ ଫାଇଲିନ, ଫନି ଏବଂ ୟସ ଭଳି ବାତ୍ୟା ଓଡ଼ିଶାକୁ ଆସିଛି । ବାଲେଶ୍ବର, କେନ୍ଦ୍ରାପଡ଼ା, ଜଗତସିଂହପୁର, ଗଞ୍ଜାମ, ପୁରୀ ଏବଂ ଭଦ୍ରକ ଭଳି ଜିଲ୍ଲା ବିଶେଷ କରି ପ୍ରଭାବିତ ହୋଇଥାଏ । ତେବେ ଚଳିତ ବର୍ଷ ପୁଣି ଘାରିଛି ବାତ୍ୟା 'ଦାନା' ଚିନ୍ତା । ବଳ ଗୋଟାଉଛି ସାମ୍ଭାବ୍ୟ ବାତ୍ୟା ‘ଦାନା’ । ଲଘୁଚାପ ସୃଷ୍ଟି ହୋଇଥିବାବେଳେ ୨୩ରୁ ବର୍ଷା ବଢ଼ିବା। ଏନେଇ ୪ ଜିଲ୍ଲାକୁ ପାଣିପାଗ ବିଭାଗ ରେଡ୍ ଆଲର୍ଟ ଜାରି କରିଛି ।
- ୨୯ ଅକ୍ଟୋବର ୧୯୯୯ ମହାବାତ୍ୟା
- ୨୭୦ କିଲୋମିଟରରୁ ଅଧିକ ବେଗରେ ପବନ
- ୧୦ ହଜାର ଲୋକଙ୍କ ଜୀବନ ଯାଇଥିଲା
ଆନ୍ଧ୍ରପ୍ରଦେଶ:
ଆନ୍ଧ୍ରପ୍ରଦେଶରେ ମଧ୍ୟ ପ୍ରକୃତିର ତାଣ୍ଡବ ଦେଖିବାକୁ ମିଳେ । ଅର୍ଥାତ ଅନେକ ସମୟରେ ଏଠାରେ ରହିଥାଏ ବାତ୍ୟାର ଭୟ । ରିପୋର୍ଟ ଅନୁସାରେ, ଏହି ରାଜ୍ୟକୁ ପ୍ରତିବର୍ଷ ପ୍ରାୟ 2 ରୁ 3ଟି ବାତ୍ୟା ଆସିଥିବାର ନଜିର ରହିଛି । 2018ରେ ବାତ୍ୟା ତିତିଲି ଯୋଗୁ ଆନ୍ଧ୍ରପ୍ରଦେଶ ବେଶ ପ୍ରଭାବିତ ହୋଇଥିଲା। ବାତ୍ୟା ଯୋଗୁ ନେଲ୍ଲୋର, ପୂର୍ବ ଗୋଦାବରୀ ଓ କୃଷ୍ଣା ଜିଲ୍ଲାରେ ବିଶେଷ ଭାବରେ ପ୍ରଭାବିତ ହୋଇଥାଏ।
- ୨୦୧୮ରେ ବାତ୍ୟା ତିତିଲି
- ଆନ୍ଧ୍ରପ୍ରଦେଶ ପ୍ରଭାବିତ
- ନେଲ୍ଲୋର, ପୂର୍ବ ଗୋଦାବରୀ ଓ କୃଷ୍ଣା ଜିଲ୍ଲା କ୍ଷତିଗ୍ରସ୍ତ
ତାମିଲନାଡୁ:
ହୀନ୍ଦ ମହାସାଗରରେ 2008 ମସିହାରେ ହୋଇଥିଲା ବାତ୍ୟା 'ନିଶା'। ଏହାର କରାଳ ରୂପ ଏଯାଏଁ ରାଜ୍ୟବାସୀଙ୍କ ମନରୁ ଲିଭିନାହିଁ । ଏହି ବାତ୍ୟା ଯୋଗୁଁ ପ୍ରାୟ 200 ଲୋକଙ୍କ ଜୀବନ ଯାଇଥିଲା । ଏହାସହ ତାମିଲନାଡୁରେ ପ୍ରତିବର୍ଷ ପାଖାପାଖି 5-6 ବାତ୍ୟା ଆସିବାର ଭୟ ରହିଥାଏ। ପୁଡ୍ଡୁକୁଟ୍ଟୟୀ, କଡଲୋର, କାଞ୍ଚିପୁରମ, ତିରୁୱରର, ନାଗାପତିନମ, ଚେନ୍ନାଇ, ରାମନାଥପୁରମ ଏବଂ ତିରୁନରୱେଲି ଆଦି ଜିଲ୍ଲା ପ୍ରଭାବିତ ହୋଇଥାଏ। ଗତବର୍ଷ ବାତ୍ୟା ମିଚୌଙ୍ଗ ତାମିଲନାଡୁରେ ତାଣ୍ଡବ ରଚିଥିଲା ।
- ୨୦୦୮ରେ ବାତ୍ୟା 'ନିଶା'
- ୨୦୦ ଲୋକଙ୍କ ଜୀବନ ଯାଇଥିଲା
ପଶ୍ଚିମବଙ୍ଗ:
11 ନଭେମ୍ବର 1970 ମସିହାରେ ସବୁଠୁ ଭୟଙ୍କର ବାତ୍ୟା 'ଭୋଳା' ପଶ୍ଚିମବଙ୍ଗରେ ଲ୍ୟାଣ୍ଡଫଲ କରିଥିଲା । ଯେଉଁଥିରେ ଲକ୍ଷ ଲକ୍ଷ ଲୋକଙ୍କ ଜୀବନ ଯାଇଥିଲା । ଏହି ରାଜ୍ୟର ଭୌଗୋଳିକ ସ୍ଥିତି ଏପରି ଯେ ଅଧିକାଂଶ ସମୟରେ ବାତ୍ୟାର ଆଶଙ୍କା ଘନେଇଥାଏ ।
- ୧୯୭୦ ନଭେମ୍ବର ୧୧ରେ ବାତ୍ୟା 'ଭୋଳା' ପଶ୍ଚିମବଙ୍ଗରେ ଲ୍ୟାଣ୍ଡଫଲ କରିଥିଲା
- ଏଥିରେ ଲକ୍ଷ ଲକ୍ଷ ଲୋକଙ୍କ ଜୀବନ ଯାଇଥିଲା
ପୁଡୁଚେରୀ:
2011ରେ ଏଠାରେ ହୋଇଥିବା ବାତ୍ୟାରେ 20 ରୁ ଉର୍ଦ୍ଧ୍ବ ଲୋକଙ୍କ ଜୀବନ ନେଇଥିଲା । ସେହିପରି 2018ରେ ବାତ୍ୟା 'ଗାଜା' ଏଠାରେ ତାଣ୍ଡବ ରଚିଥିଲା। ସେହିପରି ପୁଡୁଚେରୀକୁ ଅନେକ ସମୟରେ ବାତ୍ୟାର ସମ୍ମୁଖୀନ ହେବାକୁ ପଡ଼ିଥାଏ ।
- ୨୦୧୧ ବାତ୍ୟା ନେଇଥିଲା ୨୦ରୁ ଅଧିକ ଲୋକଙ୍କ ଜୀବନ
- ୨୦୧୮ରେ ବାତ୍ୟା 'ଗାଜା' ତାଣ୍ଡବ ରଚିଥିଲା
