ନୂଆଦିଲ୍ଲୀ: ସାଧାରଣ ନିର୍ବାଚନ ପୂର୍ବରୁ ଏବେ ସାରା ଦେଶରେ ଚର୍ଚ୍ଚାର କେନ୍ଦ୍ରରେ ରହିଛି ମୋଦି ସରକାରଙ୍କ ଦ୍ବାରା କାର୍ଯ୍ୟକାରୀ ହୋଇଥିବା ନିର୍ବାଚନୀ ବଣ୍ଡ ଯୋଜନା । ଏହାକୁ ରଦ୍ଦ କରିବା ଓ କେତେ ସଂଖ୍ୟକ ବଣ୍ଡ ବିକ୍ରି ହୋଇଛି, ସେ ସମ୍ପର୍କରେ ତଥ୍ୟ ଦାଖଲ କରିବାକୁ ସୁପ୍ରିମକୋର୍ଟ ଷ୍ଟେଟବ୍ୟାଙ୍କକୁ ନିର୍ଦ୍ଦେଶ ଦେଇଥିଲେ । କୋର୍ଟଙ୍କ ନିର୍ଦ୍ଦେଶ ଅନୁସାରେ, ଷ୍ଟେଟବ୍ୟାଙ୍କ ମଧ୍ୟ ନିର୍ବାଚନ କମିଶନଙ୍କ ନିକଟରେ ଏହି ତଥ୍ୟ ଗତକାଲି ଦାଖଲ କରିସାରିଛି । ଏହାକୁ ସଠିକ ସମୟରେ ସାର୍ବଜନୀନ କରାଯିବା ନେଇ କହିଛନ୍ତି ମୁଖ୍ୟ ନିର୍ବାଚନ କମିଶନର ରାଜୀବ କୁମାର ।
ଆଜି ସାଧାରଣ ନିର୍ବାଚନ ପ୍ରସ୍ତୁତି ସମୀକ୍ଷା କରିବା ପାଇଁ ଜମ୍ମୁ କାଶ୍ମୀର ଗସ୍ତରେ ଥିବା ମୁଖ୍ୟ ନିର୍ବାଚନ କମିଶନର କହିଛନ୍ତି, ଷ୍ଟେଟବ୍ୟାଙ୍କଠାରୁ ତଥ୍ୟ ହସ୍ତଗତ ହୋଇଛି । କୋର୍ଟଙ୍କ ନିର୍ଦ୍ଦେଶ ମୁତାବକ ସେମାନେ ସଠିକ ସମୟରେ ଆୟୋଗ ନିକଟରେ ତଥ୍ୟ ଦାଖଲ କରିଛନ୍ତି । ଏହାକୁ ତର୍ଜମା କରାଯାଉଛି । ସଠିକ ସମୟରେ ଏହାକୁ ସାଧାରଣ ଜନତାଙ୍କ ଅବଗତି ପାଇଁ ସାର୍ବଜନୀନ ମଧ୍ୟ କରାଯିବ । ଆହୁରି ମଧ୍ୟ ରାଜୀବ କହିଛନ୍ତି, ଦେଶରେ ସ୍ବଚ୍ଛ ଓ ଅବାଧ ନିର୍ବାଚନ ପାଇଁ ତମାମ ବ୍ୟବସ୍ଥା ଗ୍ରହଣ କରାଯାଇଛି । ଦେଶବାସୀଙ୍କୁ ଆୟୋଗଙ୍କ ପକ୍ଷରୁ ଅନୁରୋଧ କରାଯାଉଛି, ସେମାନେ ସକ୍ରିୟତାରେ ମତଦାନରେ ଅଂଶଗ୍ରହଣ କରନ୍ତୁ ।
ସୂଚନା ଅନୁସାରେ, ନିର୍ବାଚନୀ ବଣ୍ଡ ମାମଲାରେ ଫେବୃଆରୀ 15 ତାରିଖରେ ଶୁଣାଣି କରି ଐତିହାସିକ ରାୟ ଦେଇଥିଲେ ସର୍ବୋଚ୍ଚ ନ୍ୟାୟାଳୟ । ମୋଦି ସରକାରଙ୍କ ଦ୍ବାରା ଲାଗୁ କରାଯାଇଥିବା ଏହି ଯୋଜନାର କାର୍ଯ୍ୟକାରିତା ଅସାମ୍ବିଧାନିକ ଓ ସୂଚନା ଅଧିକାର ଅଧିନିୟମର ବିରୋଧୀ ବୋଲି କୋର୍ଟ ସ୍ପଷ୍ଟ କରିଥିଲେ । ଷ୍ଟେଟବ୍ୟାଙ୍କ ତୁରନ୍ତ ଏହି ‘ନିର୍ବାଚନ ବଣ୍ଡ’ ବ୍ୟବସ୍ଥା ବନ୍ଦ କରିବା ସହ 2019 ପରଠାରୁ କେତେ ସଂଖ୍ୟକ ବଣ୍ଡ ବିକ୍ରି ହୋଇଛି ଓ କେଉଁ ରାଜନୈତିକ ଦଳକୁ କେତେ ପରିମାଣର ଦାନ ମିଳିଛି ସେ ସମ୍ପର୍କରେ ମାର୍ଚ୍ଚ 6 ତାରିଖ ସୁଦ୍ଧା ତଥ୍ୟ ଦାଖଲ କରିବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ ।
ଏହା ମଧ୍ୟ ପଢନ୍ତୁ :- ‘କେବଳ ଭୋଟବ୍ୟାଙ୍କ ପାଇଁ CAA ଲାଗୁ କଲା ବିଜେପି, ଦେଶରେ ହିଂସା ଓ ଅପରାଧ ବଢିବ’
ତେବେ କୋର୍ଟଙ୍କ ଛାଟ ପରେ ଷ୍ଟେଟବ୍ୟାଙ୍କ ଦାଖଲ କରିଥିବା ତଥ୍ୟ ଅନୁସାରେ, 2019 ମସିହା ଏପ୍ରିଲ 1 ତାରିଖରୁ 2024 ମସିହା ଫେବୃଆରୀ 15 ତାରିଖ ମଧ୍ୟରେ ସମୁଦାୟ 22,217 ନିର୍ବାଚନ ବଣ୍ଡ କ୍ରୟ କରାଯାଇଛି । ସେଥିମଧ୍ୟରୁ 22,030ଟି ବଣ୍ଡ ଇନକ୍ୟାସ ହୋଇଛି । ଅବଶିଷ୍ଟ ପ୍ରଧାନମନ୍ତ୍ରୀ ରିଲିଫ ପାଣ୍ଠିକୁ ଯାଇଥିବା ସୂଚନା ରହିଛି । ଏହି ପ୍ରାପ୍ତ ତଥ୍ୟକୁ କୋର୍ଟଙ୍କ ନିର୍ଦ୍ଦେଶ ଅନୁସାରେ, ନିର୍ବାଚନ ଆୟୋଗ ନିଜ ଅଫିସିଆଲ ଓ୍ବେବ-ସାଇଟରେ ଅପଲୋଡ କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
