ନୂଆଦିଲ୍ଲୀ: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରଣାସୀରୁ ନିଜର ନାମାଙ୍କନ ଦାଖଲ କରିଛନ୍ତି । ଏହି ପରିପ୍ରେକ୍ଷୀରେ କଂଗ୍ରେସ ପ୍ରଧାନମନ୍ତ୍ରୀ ମୋଦିଙ୍କୁ ଶାଣିତ ଆକ୍ରମଣ କରିଛି । କଂଗ୍ରେସ ଦଳର ବରିଷ୍ଠ ନେତା ଜୟରାମ ରମେଶ ପ୍ରଧାନମନ୍ତ୍ରୀଙ୍କ ବାରଣାସୀ ଓ ଗଙ୍ଗା ନଦୀ ପ୍ରତି ଥିବା ଉତ୍ତରଦାୟିତ୍ବକୁ ନେଇ ପ୍ରଶ୍ନ କରିଛନ୍ତି । ରମେଶ ସୋସିଆଲ ମିଡିଆ ଏକସରେ ମୁଖ୍ୟତଃ ୩ ଟି ପ୍ରସଙ୍ଗକୁ ନେଇ ପ୍ରଶ୍ନ କରିଛନ୍ତି । ୨୦ ହଜାର କୋଟି ଟଙ୍କା ଖର୍ଚ୍ଚ ହେବା ସତ୍ତ୍ବେ ଗଙ୍ଗା ନଦୀ ଦିନକୁ ଦିନ କାହିଁକି ଦୂଷିତ ହେବାରେ ଲାଗିଛି ଓ ପ୍ରଧାନମନ୍ତ୍ରୀ ମୋଦି ପୋଷ୍ୟ ଗ୍ରାମ ଭାବେ ବାରଣାସୀର ଗାଁ ଗୁଡିକୁ ନେଇଥିବା ବେଳେ ଅଣଦେଖା କାହିଁକି କରୁଛନ୍ତି ବୋଲି କଂଗ୍ରେସ ପ୍ରଶ୍ନ କରିଛି । ଏହା ସହିତ ବାରଣାସୀରେ ଥିବା ଗାନ୍ଧୀଙ୍କ ବିରାସତ ବା ସ୍ମୃତିକୁ ଧ୍ବଂସ କରିବା ନେଇ ପ୍ରଧାନମନ୍ତ୍ରୀ ମୋଦିଙ୍କ ଆଭିମୁଖ୍ୟ ପ୍ରତି ପ୍ରଶ୍ନ କରିଛନ୍ତି ଜୟରାମ ।
ଜୟରାମ କହିଛନ୍ତି, 'ଯେବେ ମୋଦି ୨୦୧୪ ରେ ବାରଣାସୀ ଆସିଥିରେ ସେତେବେଳେ ସେ ଗଙ୍ଗା ମାତା ତାଙ୍କୁ ଡାକିଛନ୍ତି ବୋଲି କହିବା ସହ ଗଙ୍ଗା ନଦୀକୁ ପ୍ରଦୂଷଣ ମୁକ୍ତ କରିବା ନେଇ ଶପଥ କରିଥିଲେ । ପୂର୍ବରୁ ଥିବା ଅପରେସନ ଗଙ୍ଗାକୁ ବଦଳାଇ ନମାମି ଗଙ୍ଗେ ନାମକରଣ କରିଥିଲେ । ଦଶ ବର୍ଷ ପରେ ୨୦ ହଜାର କୋଟିରୁ ଉର୍ଦ୍ଧ୍ବ ଟଙ୍କା ବ୍ୟୟ ହୋଇଥିଲେ ମଧ୍ୟ ପ୍ରଦୂଷଣର ସ୍ତର ୫୧ରୁ ବଢି ୬୬ ହୋଇଛି । ସେହିଭଳି ୭୧ ପ୍ରତିଶତ ମନିଟରି ଷ୍ଟେସନ ମଧ୍ୟ ଗଙ୍ଗାରେ କ୍ଷତିକାରକ ଓ ଆଣ୍ଟିବାୟୋଟିକ ପ୍ରତିରୋଧକ ବ୍ୟାକ୍ଟେରିଆ ବୃଦ୍ଧି ସମ୍ପର୍କରେ ରିପୋର୍ଟ ଦେଇଛନ୍ତି ।' ଦେଶର ଟିକସଦାତାଙ୍କର ୨୦ ହଜାର କୋଟି ଟଙ୍କା କୁଆଡେ ଗଲା ବୋଲି ପ୍ରଶ୍ନ କରିଛନ୍ତି ଜୟରାମ । ଏପରିକି ଏଥି ପାଇଁ ଦୁର୍ନୀତି ଓ କୁପରିଚାଳନା ଦାୟୀ। ବାରଣାସୀର ଲୋକର କିଭଳି ଗଙ୍ଗା ମାତାଙ୍କ ନାଁ ରେ ଜୁମଲା କରିଥିବା ଲୋକ ଉପରେ ଭରସା କରିପାରିବେ ବୋଲି କହିଛି ଜୟରାମ ।
ଏହା ମଧ୍ୟ ପଢନ୍ତୁ .... ‘ମା’ ଗଙ୍ଗା ମୋତେ କୋଳେଇ ନେଇଛି’: ବାରାଣସୀରେ ନାମାଙ୍କନ ଭରିଲେ ପ୍ରଧାନମନ୍ତ୍ରୀ - PM MODI FILES NOMINATION
