ନୂଆଦିଲ୍ଲୀ/କୋଲକାତା: ପଶ୍ଚିମବଙ୍ଗ ଆସାନସୋଲ ଆସନରୁ ବିଜେପି ଟିକେଟ ପାଇଥିବା ଭୋଜପୁରୀ ଅଭିନେତା ପବନ ସିଂ ନିର୍ବାଚନ ନ ଲଢିବାକୁ ଘୋଷଣା କରିଛନ୍ତି । ଗତକାଲି ଭାରତୀୟ ଜନତା ପାର୍ଟି ଘୋଷଣା କରିଥିବା ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକାରେ ଆସାନସୋଲ ଲୋକସଭା ଆସନ ପାଇଁ ପବନଙ୍କୁ ଟିକେଟ ମିଳିଥିଲା । ଆଜି ସେ ନିର୍ବାଚନ ଲଢିବେ ନାହିଁ ବୋଲି ଟ୍ବିଟ କରିଛନ୍ତି । ପାର୍ଟି ମୁଖ୍ୟ ଜେପି ନଡ୍ଡାଙ୍କୁ ଟ୍ୟାଗ କରି ପବନ ଲେଖିଛନ୍ତି, ଟିକେଟ ଦେଇଥିବାରୁ ଦଳକୁ ଧନ୍ୟବାଦ । ମାତ୍ର କିଛି କାରଣବଶତଃ ସେ ଚଳିତ ନିର୍ବାଚନ ଲଢିପାରିବେ ନାହିଁ । ତେବେ ସେ କେଉଁ କାରଣ ପାଇଁ ନିର୍ବାଚନ ଲଢିବେ ନାହିଁ, ସେ ନେଇ କୌଣସି କାରଣ ଦର୍ଶାଇନାହାନ୍ତି । ଗତକାଲି ବିଜେପି ପ୍ରାର୍ଥୀ ଘୋଷଣା କରିବା ପରେ ଟିଏମସିର ରାଜ୍ୟସଭା ସାଂସଦ ସାଗରିକା ଘୋଷ ପବନଙ୍କୁ ମହିଳା ବିରୋଧୀ ପୋଷ୍ଟର ମାମଲାରେ ସମାଲୋଚନା କରିଥିଲେ ।
ପଶ୍ଚିମବଙ୍ଗ ଅନ୍ୟତମ ପ୍ରମୁଖ ଆସନ ହେଉଛି ଆସାନସୋଲ । ଏବେ ଏହି ଆସନରେ ତୃଣମୂଳ କଂଗ୍ରେସରୁ ଶତ୍ରୁଘ୍ନ ସିହ୍ନା ସାଂସଦ ରହିଛନ୍ତି । ଏହି ଆସନ ପୂର୍ବରୁ ଭାରତୀୟ ଜନତା ପାର୍ଟି ଦଖଲରେ ଥିଲା । ବାବୁଲ ସୁପ୍ରିୟୋ ଏହି ଆସନରୁ ବିଜେପି ଟିକେଟରେ ଜିତି କେନ୍ଦ୍ରରେ ମନ୍ତ୍ରୀ ମଧ୍ୟ ହୋଇଥିଲେ । ପରେ ରାଜ୍ୟ ବିଧାନସଭା ନିର୍ବାଚନ ପରେ ସେ ଭାରତୀୟ ଜନତା ପାର୍ଟିରୁ ଇସ୍ତଫା ଦେଇଥିଲେ । ଏହି ଆସନରେ ଉପନିର୍ବାଚନ ହୋଇଥିଲା । ରାଜ୍ୟରେ ଶାସନରେ ଥିବା ତୃଣମୂଳ କଂଗ୍ରେସ ବରିଷ୍ଠ ଅଭିନେତା ଶତ୍ରୁଘ୍ନ ସିହ୍ନାଙ୍କୁ ଲଢାଇଥିଲା । ସିହ୍ନା ବିଜୟୀ ମଧ୍ୟ ହୋଇଥିଲେ ।
ଏହା ମଧ୍ୟ ପଢନ୍ତୁ :- ଛତିଶଗଡରେ ମାଓବାଦୀ ଓ ଯବାନ ମଧ୍ୟରେ ଏନକାଉଣ୍ଟର, କନଷ୍ଟେବଳ ଶହୀଦ
ଏବେ ଚଳିତ ନିର୍ବାଚନରେ ବିଜେପି ଏହି ଆସନରେ ସ୍ଥାନୀୟ ଲୋକପ୍ରିୟ ଅଭିନେତା ପବନଙ୍କୁ ଟିକେଟ ଦେଇଥିଲା । ଟିଏମସି ପୁଣି ଥରେ ଶତ୍ରୁଘ୍ନଙ୍କୁ ପାର୍ଥୀ କରିଥିଲେ ଦୁଇ କଳାକାରଙ୍କ ମଧ୍ୟରେ ଲଢେଇ ଦେଖିବାକୁ ମିଳିଥାନ୍ତା । ହେଲେ ଏହାପୂର୍ବରୁ ଗତକାଲି ଟିକେଟ ପାଇଥିବା ପବନ ଆଜି ନିର୍ବାଚନ ଲଢିବାକୁ ମନା କରିଦେଇଛନ୍ତି । ତାଙ୍କ ନିଷ୍ପତ୍ତି ସମ୍ପର୍କରେ ବିଜେପି କୌଣସି ପ୍ରତିକ୍ରିୟା ରଖିନଥିବା ବେଳେ ତାଙ୍କୁ ଦିଲ୍ଲୀ ଡକରା ହୋଇଥିବା ସୂତ୍ରରୁ ସୂଚନା ମିଳିଛି । ଗତକାଲି ପ୍ରଥମ ପର୍ଯ୍ୟାୟରେ ଭାରତୀୟ ଜନତା ପାର୍ଟି 18 ରାଜ୍ୟରୁ ମୋଟ 195 ପ୍ରାର୍ଥୀଙ୍କ ନାମଘୋଷଣା କରିଥିଲା । ଅଣବିଜେପି ଶାସିତ ତଥା ମମତା ବାନାର୍ଜୀଙ୍କ ସହ କଡା ମୁକାବିଲା ଥିବା ପଶ୍ଚିମବଙ୍ଗରେ ବିଜେପି 20 ଆସନ ଘୋଷଣା କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
