ଲକ୍ଷ୍ନୌ: ସ୍କୁଲ ନିକଟରେ ଥିବା ମଦ ଦୋକାନକୁ ହଟାଇବା ପାଇଁ ବିଭିନ୍ନ ସମୟରେ ମମଲା କୋର୍ଟରେ ପହଞ୍ଚିଥିବା ଘଟଣା ଆମେ ଅନେକ ସମୟରେ ଶୁଣିଛନ୍ତି । ହେଲେ ଉତ୍ତର ପ୍ରଦେଶ କାନପୁର ସମାନ ଅଭିଯୋଗ ଓ ମାମଲା ସହ ସାମାନ୍ୟ ବ୍ୟତିକ୍ରମ ଦେଖିବାକୁ ମିଳିଛି । ଜଣେ ମାତ୍ର 5 ବର୍ଷୀୟ ଶିଶୁ ଛାତ୍ର ସ୍କୁଲ ନିକଟରେ ଥିବା ମଦ ଦୋକାନ ହଟାଇବା ଆବେଦନ ସହ ଆହ୍ଲାବାଦ ହାଇକୋର୍ଟଙ୍କ ଦ୍ବାରସ୍ଥ ହୋଇଛନ୍ତି ।
ତେବେ କୋର୍ଟ ଏହି ଶିଶୁଟିର ନାମରେ ଦାଖଲ ଜନସ୍ବାର୍ଥ ମାମଲାକୁ ବିଚାରଯୋଗ୍ୟ ଭାବେ ଗ୍ରହଣ କରିବା ସହ ରାଜ୍ୟ ଅବକାରୀ ବିଭାଗକୁ ନୋଟିସ ଜାରି କରିଛନ୍ତି । ବିଦ୍ୟାଳୟ ନିକଟବର୍ତ୍ତୀ ଏରିଆରେ କିପରି ମଦଦୋକାନ ଖୋଲିବା ପାଇଁ ସରକାରୀ ଅନୁମତି ମିଳିଲା ଓ ଏହା ପ୍ରଦାନ କରିବା ବେଳେ ସମସ୍ତ ସର୍ତ୍ତାବଳୀ ଅନୁପାଳନ କରାଯାଇଛି କି ନାହିଁ, ସେନେଇ ଅବକାରୀ ବିଭାଗ କୋର୍ଟରେ ସତ୍ୟପାଠ ଦାଖଲ କରିବ । ଗତକାଲି (23 ଫେବୃଆରୀ) ରେ ହାଇକୋର୍ଟରେ ଏହି ମାମଲାର ଶୁଣାଣି ହେବା ପରେ ପରବର୍ତ୍ତୀ ତାରିଖ 13 ମାର୍ଚ୍ଚ ପାଇଁ ସ୍ଥିର କରାଯାଇଛି । ଏହି ଘଟଣା ଏବେ ସମଗ୍ର ରାଜ୍ୟରେ ଚର୍ଚ୍ଚା ସୃଷ୍ଟି କରିଛି ।
ତେବେ ସୂଚନା ଅନୁସାରେ, ଏହି ଜନସ୍ବାର୍ଥ ମାମଲା ଦାଖଲ କରିଥିବା ଛାତ୍ରଙ୍କ ନାମ ଅଥର୍ବ । ସେ ଏବେ ଆଜାଦ ନଗର ଏମ.ଆର ଜୟପୁରିଆ ସ୍କୁଲର LKG ଛାତ୍ର । ରତନ ସଦନ ଆଜାଦ ନାଗର ନିବାସୀ ପାଞ୍ଚ ବର୍ଷୀୟ ଅଥର୍ବ ଦୀକ୍ଷିତ ତାଙ୍କ ଓକିଲ ପିତା ପ୍ରସନ୍ନ ଦୀକ୍ଷିତଙ୍କ ମାଧ୍ୟମରେ ହାଇକୋର୍ଟରେ ଏହି ଜନସ୍ବାର୍ଥ ମାମଲା(ପିଏଲ) ଦାଖଲ କରିଛନ୍ତି । କୋର୍ଟ ଗତକାଲି ଏହାର ଶୁଣାଣି କରିଛନ୍ତି । ଏହି ମାମଲାରେ ରାଜ୍ୟ ଅବକାରୀ ବିଭାଗର ମୁଖ୍ୟ ସଚିବ, ଲକ୍ଷ୍ନୌ ଏକ୍ସାଇଜ୍ କମିଶନର, କାନପୁର ନଗର ଡିଏମ (ଲାଇସେନ୍ସ ପ୍ରାଧିକରଣ) ଏକ୍ସାଇଜ୍ ଅଫିସର କାନପୁର ଏବଂ ସମ୍ପୃକ୍ତ ମଦ ବିକ୍ରେତା ଜୟେନ୍ଦ୍ର କୁମାରଙ୍କୁ ପକ୍ଷ ଭାବେ ଦର୍ଶାଯାଇଛି ।
