नवी दिल्ली SC YouTube Channel Hack : भारताच्या सर्वोच्च न्यायालयाचं अधिकृत यूट्यूब चॅनल शुक्रवारी हॅक करण्यात आलं. चॅनलवर क्रिप्टोकरन्सी XRP ची जाहिरात दाखवली गेली. XRP क्रिप्टोकरन्सी यूएस-आधारित कंपनी रिपल लॅब्सनं विकसित केली आहे. सर्वोच्च न्यायालय घटनात्मक सार्वजनिक हिताच्या प्रकरणांची सुनावणी थेट प्रवाहित करण्यासाठी YouTube चॅनेल वापरतं. अलीकडेच, कोलकात्याच्या आरजी कार मेडिकल कॉलेज आणि हॉस्पिटलमधील महिला प्रशिक्षणार्थी डॉक्टरच्या बलात्कार आणि हत्या प्रकरणाची सुनावणी सर्वोच्च न्यायालयाच्या यूट्यूब चॅनेलवर थेट प्रक्षेपित करण्यात आली.
चॅनलवर 'XRP चा व्हिडिओ : सर्वोच्च न्यायालयाच्या YouTube चॅनेलवर अपलोड केलेल्या शेवटच्या सुनावणीचा व्हिडिओ हॅकर्सनी खाजगी बनवला होता. हॅक झालेल्या चॅनलवर 'XRP किंमत अंदाज' नावाचा एक रिक्त व्हिडिओ सध्या चालू आहे. सुप्रीम कोर्टाच्या एका वरिष्ठ अधिकाऱ्यानं सांगितलं की, नेमकं काय झालं, याबद्दल आम्हाला खात्री नाही. मात्र, संकेतस्थळाशी छेडछाड झाल्याचं दिसून येत आहे. ते म्हणाले की शुक्रवारी सकाळी सर्वोच्च न्यायालयाच्या अधिकृत यूट्यूब चॅनेलवर ही समस्या उघडकीस आली. सर्वोच्च न्यायालयाच्या आयटी टीमनं एनआयसी (नॅशनल इन्फॉर्मेटिक्स सेंटर) कडं ती सोडवण्यासाठी मदत मागितली आहे.
YouTube चॅनेलला लक्ष्य : आजकाल, हॅकर्स मोठ्या प्रमाणावर लोकप्रिय YouTube चॅनेलला लक्ष्य करत आहेत. तत्कालीन CJI UU ललित यांच्या अध्यक्षतेखालील पूर्ण न्यायालयाच्या बैठकीत प्रमुख सुनावणीचे थेट प्रसारण करण्याचा सर्वानुमतं निर्णय घेण्यात आला होता. या अंतर्गत, सर्वोच्च न्यायालयानं 2018 मध्ये निर्णय घेतला की सर्व घटनापीठांच्या सुनावणी यूट्यूब चॅनेलवर थेट प्रसारित केल्या जातील. 27 सप्टेंबर 2022 रोजी सर्वोच्च न्यायालयाच्या कामकाजाचं थेट प्रक्षेपण प्रथमच झालं, जेव्हा तत्कालीन CJI NV रमणा यांनी त्यांच्या निवृत्तीच्या दिवशी 5 प्रकरणांमध्ये निकाल दिला.
