ठाणे Body found in Kalyan Nagar road : दादर रेल्वे स्थानकात एका पिशवीत मृतदेह सापडल्याची घटना ताजी असतानाच कल्याणजवळील कचऱ्याच्या ढीगात एका वृद्ध इसमाचा मृतदेह पोत्यात सापडल्यानं परिसरात खळबळ उडाली आहे. कल्यान-नगर मार्गावर वरप गावातील गावदेवी मैदानाशेजारील कचराकुंडीत ही घटना घडलीय. या प्रकरणी पोलिसांनी अज्ञात व्यक्तीविरुद्ध कल्याण ग्रामीण पोलीस ठाण्यात खूनासह इतर कलमांखाली गुन्हा दाखल केलाय.
कचऱ्यात आढळला मृतदेह : पोलिसांनी दिलेल्या माहितीनुसार, 15 ऑगस्ट रोजी सकाळच्या सुमारास कल्याण-मुरबाड मार्गावरील वरप गावात खुल्या भूखंडावरील कचरा पट्टीत एका वयोवृद्ध व्यक्तीचा मृतदेह आढळला. हा मृतदेह एका निळा रंगाच्या (लगेज) बॅगेत होता. भूखंडावर पसरलेल्या कचऱ्यात ही बॅग पडली होती. लघुशंका करण्यासाठी आलेल्या तरुणाला ही बॅग दिसली होती. त्यानं बॅग उघडली असता त्याला बॅगेत मृतदेह असल्याचं निदर्शनास आलं. याबाबत त्यांनं तात्काळ कल्याण ग्रामीण पोलिसांना घटनेची माहिती दिली.
घटनेचा कसून तपास : घटनेची माहिती मिळताच पोलीस ठाण्याचे वरिष्ठ पोलीस निरीक्षक सुरेश कदम यांच्या पथकानं घटनास्थळी धाव घेत मृतदेह ताब्यात घेतला. त्यानंतर मृतदेह शवविच्छेदनासाठी मध्यवर्ती रुग्णालयात पाठवण्यात आला. घटनेचं गांभीर्य ओळखून ठाणे ग्रामीणचे पोलीस अधीक्षक डॉ. स्वामी, उप पोलीस अधीक्षक जगदीश शिंदे यांनी घटनास्थळी भेट देत तपासाबाबत मार्गदर्शन केलं. तसंच या मृतदेहाची ओळख पटवण्यासाठी आतापर्यंत परिसरातील तसंच कल्याण- मुरबाड मार्गावरील शंभरहून अधिक सीसीटीव्ही फुटेज पोलिसांनी तपासले आहेत. घटनास्थळी श्वानपथकानं, ठाणे गुन्हे शाखेचे पथक तसंच कल्याण ग्रामीण पोलीस पथकानं मृतदेहाची ओळख पटवण्यासाठी परिसरात तपास सुरू केलाय, अशी माहिती वरिष्ठ पोलीस निरीक्षक सुरेश कदम यांनी दिलीय.
हेही वाचा-
