मुंबई : उबाठा खासदार संजय राऊत यांनी संतोष देशमुख हत्याकांडावरुन मंत्री धनंजय मुंडे यांच्यावर हल्लाबोल केला आहे. "सरकारमधील अनेक मंत्री थेट माफियाशी संबंधित आहेत. मात्र त्यांच्यावर कारवाई करण्याची अजित पवार आणि मुख्यमंत्री देवेंद्र फडणवीस यांना हिंमत होत नाही," असा हल्लाबोल त्यांनी केला. यावेळी संजय राऊत यांनी खासदार फोडाफोडीवरुनही टीका केली, शरद पवार आणि उद्धव ठाकरे यांना सोडून जाणारे नेते हे रावणाचे वंशज असल्याची टीकाही यावेळी संजय राऊतांनी केली. दुसरीकडं शरद पवार यांनी राष्ट्रीय स्वयंसेवक संघाच्या बुथ मॅनेजमेंटचं कौतुक केलं, याबाबत संजय राऊत यांना माध्यम प्रतिनिधींनी विचारलं. यावर "प्रत्येक बुथवर घोटाळा झाला आहे. राष्ट्रीय स्वयंसेवक संघाचं बुथ मॅनेजमेंट घोटाळ्याचं होतं, त्यामुळे मी त्याचं कौतुक करणार नाही," अशी टीकाही संजय राऊत यांनी यावेळी केली.
अमित शाहांना खूश करण्यासाठी खासदार फोडाफोडी : शरदचंद्र पवार राष्ट्रवादी काँग्रेस पक्षाचे नेते शरद पवार यांच्या 7 खासदारांना अजित पवार यांच्या राष्ट्रवादी काँग्रेसचे प्रदेशाध्यक्ष सुनिल तटकरे यांनी दिल्याचा आरोप करण्यात येत आहे. बाप लेकींना सोडून राष्ट्रवादीत या, असा प्रस्ताव सुनिल तटकरे यांनी दिल्याचा आरोप जितेंद्र आव्हाड यांनी केला. यावरुन खासदार संजय राऊत यांनी सोडून जाणाऱ्या नेत्यांवर हल्लाबोल केला. "अमित शाहांना खूश करण्यासाठी खासदार फोडाफोडी करण्यात येत आहे. विधानसभेच्या निवडणुकीत ईव्हीएमच्या भरोश्यावर जिंकली. मात्र आता खासदार फोडले तरच, केंद्रात मंत्रिपद मिळेल, अशी ऑफर त्यांना अमित शाहांनी दिली, त्यामुळे खासदार फोडाफोडी करण्यात येत आहे. मात्र शरद पवार आणि उद्धव ठाकरे यांना सोडून जाणारे नेते हे रावणाचे वंशज आहेत," अशी जोरदार टीका संजय राऊतांनी केली.
आरएसएसचं बुथ मॅनेजमेंट घोटाळ्याचं : ज्येष्ठ नेते शरद पवार यांनी राष्ट्रीय स्वयंसेवक संघाचं विधानसभा निवडणूक 2024 मध्ये बुथ मॅनेजमेंट जोरदार होतं. निवडणुकीचं सूत्रं संघाच्या स्वयंसेवकांनी हाती घेतल्यानं भाजपाला फायदा झाला. मात्र दुसरीकडं विरोधक गाफिल राहिले, त्यामुळे फटका बसला, असं शरद पवार यांनी सांगितलं. त्याबाबत खासदार संजय राऊत यांना विचारलं असता, त्यांनी याबाबत मोठं भाष्य केलं. "आरएसएसनं बुथ मॅनेजमेंट चांगलं केलं. मात्र प्रत्येक बुथवर गैरप्रकार झाला, प्रत्येक बुथवर मतं वाढली आहेत. त्यामुळेचं झालेलं मतदान आणि प्रत्यक्ष झालेलं मतदान यामध्ये प्रचंड तफावत आहे. त्यामुळे मला आरएसएसच्या बुथ मॅनेजमेंटचं मला कौतुक वाटत नाही," असं त्यांनी सांगितलं. "गाफिल कोणीच नव्हतं, उलट आम्हाला विजयाची खात्री होती. शरद पवार, सुप्रिया सुळे यांनीही कष्ट घेतले. युगेंद्र पवार फिरत होते, मग गाफिल कोण होतं," असा सवालही त्यांनी यावेळी केला.
हेही वाचा :
- भाजपा लोकशाहीच्या मुळावर उठलेला पक्ष; अरविंद केजरीवालांना देशद्रोही ठरवण्याचा काँग्रेसचा प्रयत्न चुकीचा, संजय राऊतांचा हल्लाबोल
- तुम्ही अर्बन नक्षलवाद्यांचे कमांडर; संजय राऊतांची मुख्यमंत्री देवेंद्र फडणवीसांवर जहरी टीका, आयोगावर बोलताना जीभ घसरली
- बीडमधील एक आरोपी मंत्रिमंडळात; एडिट आणि क्रेडिटचा फंडा आमच्याकडे नाही, संजय राऊतांचं टीकास्त्र
