पुणे Pune Police Bust Drug Racket : ड्रग्ज विक्रीचं आंतरराष्ट्रीय कनेक्शन समोर आलंय. पुण्यात सापडलेल्या ड्रग्जची विक्री देशातील विविध भागात तसंच परदेशात होणार होती, अशी माहिती आता समोर आलीय. 19 फेब्रुवारीला पुणे पोलिसांनी (Pune Police) मोठी कारवाई करत तीन ड्रग्ज पेडलरला अटक केली होती. त्यावेळी त्यांच्याकडून चार कोटी रुपयांचं ड्रग्ज जप्त केलं होतं. आता त्या आरोपींच्या घराची झडती घेतली असता, तब्बल 100 कोटी रुपयांचं ड्रग्ज आढलून आलंय.
पुणे पोलिसांची कारवाई : पुणे पोलिसांनी 100 कोटी रुपयांपेक्षा अधिक किंमतीचं ड्रग्ज जप्त केलंय. पुणे पोलिसांच्या गुन्हे शाखेनं केलेल्या या कारवाईत 52 किलो पेक्षा अधिक मेफेड्रॉन (एमडी- Mephedrone) आढळून आलाय. आंतरराष्ट्रीय बाजारात एका किलो एमडीची किंमत 2 कोटी रुपये आहे. हे पकडलेलं एमडी ड्रग्ज मुंबईला पाठवण्यात येणार होतं, अशी माहिती समोर येत आहे.
सोमवारीसुद्धा केली होती कारवाई : पुणे पोलिसांच्या गुन्हे शाखेनं सोमवारी 3 जणांना अटक केली होती. वैभव माने, अजय कारोसिया, हैदर शेख असे या तीन आरोपींची नावे आहेत. यातील माने आणि हैदर यांच्याविरोधात ड्रग्जची तस्करी केल्याप्रकरणी याआधीही गुन्हे दाखल आहेत. वैभव माने आणि हैदर शेख हे मागील वर्षी येरवडा कारागृहातून बाहेर आले आहेत. तेव्हापासून या दोघांनी ड्रग्जची विक्री करण्यास पुन्हा सुरुवात केली असल्याची माहिती मिळत आहे.
पत्र्याच्या गोडाऊनमध्ये ठेवलं होतं ड्रग्ज : याबाबत पोलिसांनी दिलेल्या माहितीनुसार, सोमवारी अटक करण्यात आलेल्या तीन आरोपींपैकी हैदर शेखची कसून चौकशी करण्यात आली. त्यानंतर तो राहत असलेल्या विश्रांतवाडी येथे पोलिसांकडून झडती घेतली असता, त्याच्या घरातून क्रिस्टल पावडर स्वरुपातील ५०० ग्रॅम एमडी मिळून आलंय. तसंच त्याच्या झाडाझडतीमध्ये एक चावी आढळून आली होती. चावीबाबत त्याच्याकडं अधिक तपास केला असता, ती चावी विश्रांतवाडी परिसरात असलेल्या एका पत्र्याच्या गोडाऊनची असल्याचं समजलं. तिथंही पोलिसांनी छापा टाकला.
७५० ग्रॅम वजनाचं एमडी आढळलं : विश्रांतवाडी परिसरातील गोडाऊनची पाहणी केली असता, त्यामध्ये ७५० ग्रॅम वजनाचा एमडी आढळून आला. तसंच त्या ठिकाणी २०० ते ३०० संशयास्पद पोती होती. त्यामध्ये सुरुवातीला मीठ असल्याचं आढळून आलं होतं. परंतु, त्यातील अनेक पोत्यांमध्ये एमडी असल्याचं स्पष्ट झालंय. यातील किती पोत्यांमध्ये एमडी आहे किंवा नाही याबाबत गुन्हे शाखेचे अधिकारी तपास करत आहेत.
विश्रांतवाडी येथील पत्र्याच्या गोडाऊनमध्ये साठवणूक केलेला एमडी पदार्थ, प्लॅस्टिकचे मोकळे पॅकेट, एक इलेक्ट्रॉनिक वजनकाटा आणि एक चावी आढळून आली. हा ड्रग्जसाठा परदेशी नागरिकांना पुरवला असल्याचं प्राथमिक तपासात समोर आलंय. पुणे पोलिसांकडून परदेशी नागरिकाचा शोध सुरू आहे - अमितेश कुमार, पोलीस आयुक्त, पुणे
आंतरराष्ट्रीय कनेक्शन? : मेफेड्रॉन पदार्थ कोणाकडून आणला? याबाबत आरोपी हैदर शेख याच्याकडं विचारणा करण्यात आली. त्यानंतर हा एमडी पदार्थ परदेशी नागरिकानं विक्रीकरिता दिला असल्याचं सांगितलं. आरोपी हैदरकडून मेफेड्रॉन तसंच दोन मोबाईल हॅण्डसेट असा ऐवज जप्त केलाय. याबाबत सविस्तर तपास पोलीस करत आहेत.
हेही वाचा -
- पुणे पोलिसांची 'ड्रग्स मुक्त पुणे' ही प्राथमिकता, 4 कोटीचे ड्रग्स जप्त - पुणे पोलीस आयुक्त
- Mumbai Crime : एनसीबीची मोठी कारवाई! मुंबईच्या हॉटेलमधून 15 कोटींचे ड्रग्स जप्त, 2 विदेशी नागरिकांना अटक
- MD drugs seized : सोलापूरला पुन्हा ड्रग्जचा अड्डा ; ड्रग्ज डीलर छोटूच्या उत्तरप्रदेशातून आवळल्या मुसक्या, एक कोटींचं एमडी ड्रग्स जप्त
