छत्रपती संभाजीनगर Stone Pelted On Police : मुकुंदवाडी रेल्वे स्टेशन (Mukundwadi Railway Station) जवळील विश्रांती नगर इथलं अतिक्रमण हटवताना जमावानं दगडफेक केली. महापालिका आणि पोलिसांच्या पथकावर नागरिकांनी अचानक दगडफेक केल्यानं परिसरात काही काळ तणाव निर्माण झाला. जमाव पांगवण्यासाठी पोलिसांनी अश्रूधुराच्या नळकांड्या फोडल्या. या घटनेत महापालिका अधिकाऱ्यांसह दहा पोलीस जखमी झाले आहेत.
जमावानं केला हल्ला : याबाबत मिळालेली माहिती अशी की, शहरात मुकुंदवाडी रेल्वे स्टेशन परिसरात असणाऱ्या विश्रांत नगर इथं अनाधिकृत अतिक्रमण करण्यात आलं होतं. अतिक्रमण काढण्यासाठी महापालिका प्रशासन पोलिसांच्या मोठ्या फौज फाट्यासह तिथं दाखल झालं होतं. तेव्हा स्थानिक नागरिकांनी त्याला विरोध करत रस्त्यावरच ठिय्या केला. यावेळी महिला मोठ्या संख्येनं रस्त्यावर उतरल्या होत्या. अतिक्रमण काढण्यासाठी महापालिका प्रशासन कर्मचाऱ्यांसह पाच ते सहा जेसीबी, अग्निशामक दलाच्या गाड्या, दंगल नियंत्रण पथक यासह मोठा फौजफाटा घटनास्थळावर तैनात करण्यात आला होता. कारवाई सुरू करताना जमावानं दगडफेक करण्यास सुरू केल्यानं वातावरणात तणाव निर्माण झाला होता.
मनपानं काढल्या १२५ मालमत्ता : बुधवारी विश्रांती नगर ते झेंडा चौक रस्त्यावर अतिक्रमण काढण्यासाठी आठ तासाचा वेळ लागला. जवळपास १२५ मालमत्ता निष्कासित केल्या. कारवाई दरम्यान नागरिकांनी केलेल्या दगडफेकीत महापालिका इमारत निरीक्षक रामेश्वर सुरासे यांच्यासह, दहा पोलीस कर्मचारी जखमी झाले आहेत. महापालिका उर्वरित कारवाई गुरुवारीही सुरू ठेवणार असल्याची माहिती, मनपाचे उपायुक्त सौरव जौशी यांनी दिली.
संसार वाचवण्यासाठी धावाधाव : सुमारे दोनशे ते सव्वादोनशे घरांवर ही कारवाई होणार आहे. या भागात हातावर पोट असलेले सर्वसामान्य नागरिक राहतात. महापालिकेची कारवाई सुरू होताच संसार वाचवण्यासाठी त्यांची पळापळ सुरू झाली होती. सर्वत्र आक्रोश सुरू होता. लहान मुलं, महिला अक्षरक्षः डोळ्यातून अश्रू गाळत आपला संसार वाचवण्याचा प्रयत्न करत होते.
हेही वाचा -
