पाववड्याची चव लय न्यारी; गरमागरम देतोय दारोदारी फिरून घरोघरी, शिर्डीच्या पठ्ठ्याची चर्चा - Shirdi Pav Wada Special Story

Shirdi Pav Wada Special Story : ऑनलाईन फूड डिलिव्हरीच्या जमान्यात सध्या आपण जगत आहोत. एका क्लिकवर आपल्या दारात जेवणाची ऑर्डर येते. त्यामुळं जीवन हे सहज, सोपं आणि सुककर झालंय. मात्र, ऑनलाईन मागवलेलं जेवण हे कधी व कसं बनवलं जातं याची गॅरंटी कोणीही घेत नाही. अशातच एका पठ्ठ्यानं दारोदारी जात आपल्यासमोरच ताजं आणि खुमासदार पदार्थ बनवून देण्यास सुरुवात केली. वाचा स्पेशल रिपोर्ट....

अहमदनगर (शिर्डी) Shirdi Pav Wada Special Story : राहाता तालुक्यातल्या वाकडी येथील तरुण हा मोटार सायकलवरून थेट शेतीच्या बांधावर, वस्तीत आणि लोकांच्या दारोदारी जात पाववडा विकत आपल्या कुटुंबाचा उदरनिर्वाह करतोय. पाहुयात "ई टीव्ही भारत"च्या स्पेशल रिपोर्टमध्ये या तरुणाची प्रेरणादायी कहाणी.

तरुणाची प्रेरणादायी कहाणी : आजचं युग हे डिजिटल युग बनलंय. प्रत्येकाकडं स्मार्टफोन असल्यामुळं ऑनलाईन म्हणजेच घरपोच खाद्यपदार्थांची विक्री वाढत आहे. मात्र, आजही ग्रामीण भागात वाड्या-वस्त्यांमध्ये राहणाऱ्या लोकांना खाद्यपदार्थांची चव चाखायची असेल, तर गावातील चौकात जावं लागतं. ग्रामीण भागात राहणाऱ्या लोकांची हीच समस्या लक्षात घेऊन अहमदनगर जिल्ह्यातील राहाता तालुक्यातील वाकडी गावातील हा तरुण आपल्या मोटार सायकलवरुन घरोघरी, गावोगावी जाऊन हातभट्टीच्या सहाय्यानं गरम पाववडा तयार करुन विकत आहे.

शेताच्या बांधापर्यंत जाऊन पाववडा विक्री : शिर्डीजवळ वाकडी हे छोटेसं गाव आहे. या गावातील सर्व घरं वाड्या- वस्तीवर विखुरलेली आहेत. याच गावात राहणारा राजेंद्र रसाळ हा तरुण पारंपरिक मातीकामाचा व्यवसाय करत होता. मात्र, जारच्या पाण्याची मागणी दिवसेंदिवस वाढू लागल्यानं त्याचा मातीकामाचा व्यवसाय अडचणीत आला. त्यामुळं कुटुंबाचा आर्थिक गाडा कसा खेचायचा? असा पेच राजेंद्रसमोर होता. गावापासून दूर जाऊन व्यवसाय करायचा तर त्यासाठी दुकानाचं भाडं, मालासाठी लागणारं भांडवल कुठून आणायचं या चितेंत राजेंद्र होता. एकेदिवशी गावात पाववडा खाताना राजेंद्रला हाच पाववडा घरोघरी विकण्याची कल्पना सुचली. त्यानं आपल्या जुन्या मोटार सायकलला ब्रेकेट (बॉक्स) बनवून त्यावर हातभट्टी बसवली आणि थेट दारोदरी, वाड्या-वस्तीत आणि शेताच्या बांधापर्यंत जाऊन पाववडा विक्रीचा व्यवसाय त्यानं सुरू केला.

महिलावर्ग समाधानी : राजेंद्र हा वाकडी गावाजवळ राहतो. तो रोज सकाळी लवकर उठून पाववडासाठी मसाला तयार करतो आणि सर्व साहित्य घेऊन गावाच्या आजूबाजूच्या वस्त्यांमध्ये पाववडा विकण्यासाठी फिरतो. थेट वस्तीत आणि शेताच्या बांधावर गरम पाववडा मिळत असल्यामुळं राजेंद्र हा गावात चांगलाच प्रसिद्ध झालाय. ग्रामीण भागात मोलमजुरी करणाऱ्या महिला आणि घर सांभाळणाऱ्या महिलांना कामामुळं गावातल्या चौकात जायला वेळ मिळत नसे. मात्र, आता पाववडा थेट घरासमोरच मिळत असल्यानं या महिला समाधान व्यक्त करत आहेत.

बेरोजगार तरुणांसाठी प्रेरणा : राजेंद्र रसाळ हा रोज सकाळी, संध्याकाळ पाववडा विक्रीचा व्यवसाय करतो. या व्यवसायातून त्याला दररोज जवळपास सातशे ते आठशे रुपये मिळतात. आठवडा बाजाराच्या दिवशी त्याला आणखीनच फायदा होतो. राज्यातील मोठमोठ्या वडापाव ब्रँडच्या फ्रँचायझींना भरावं लागणारं शुल्क किंवा एकाच ठिकाणी हजारोंच भाडं भरून ग्राहकांची वाट पाहण्यापेक्षा खवय्यांना कुठं, कोणता खाद्यपदार्थ हवा याबाबत राजेंद्र यानं घातलेला मेळ अनेक बेरोजगार तरुणांना नक्कीच प्रेरणा देईल.

हेही वाचा