नवी दिल्ली NCP Political Crisis : राष्ट्रवादी काँग्रेस पक्षातील वादावर निवडणूक आयोगानं आपला निर्णय दिला असला, तरी शरद पवार गटाला तो मान्य नाही. या प्रकरणी न्यायालयात दाद मागणार असल्याचं त्यांनी स्पष्ट केलं आहे. दुसरीकडं, अजित पवार गटानं सर्वोच्च न्यायालयात धाव घेतली आहे. त्यांच्या वतीनं कॅव्हेट दाखल करण्यात आलंय. याचाच अर्थ न्यायालय जेव्हा जेव्हा या खटल्याची सुनावणी करेल, तेव्हा त्यांची बाजू जाणून घेऊनच निकाल देईल.
निवडणूक आयोगाचा शरद पवारांना दणका : काल (6 फेब्रुवारी) निवडणूक आयोगानं शरद पवार गटाला दणका देत अजित पवार गटच खरी राष्ट्रवादी काँग्रेस असल्याचा निकाल दिला. या निर्णयामुळे अजित पवार गटाला पक्षाचं निवडणूक चिन्हही मिळालं आहे. याला उत्तर देताना शरद पवार म्हणाले की, "ते पक्षाचे नाव आणि निवडणूक चिन्ह हिसकावून घेऊ शकतात, मात्र माझं मनोबल नाही. आपण आपला लढा सुरूच ठेवणार असून पुन्हा पक्षाला आणखी उंचीवर नेणार आहे," असं त्यांनी सांगितलं.
आयोगाच्या निर्णयाचा विरोध : निवडणूक आयोगाच्या या निर्णयाविरोधात शरद पवार गटाच्या समर्थकांनी बुधवारी राष्ट्रवादीच्या मुंबई कार्यालयाजवळ अनेक पोस्टर्स लावले. या पोस्टर्सच्या माध्यमातून अजित पवार आणि त्यांच्या समर्थकांना टोला लगावलाय. राष्ट्रवादी काँग्रेसमध्ये अनेक दिवसांपासून अंतर्गत वाद सुरू होता. गेल्या वर्षी 2 जुलैला अजित पवार यांनी पक्षाविरोधात बंडखोरी केली. त्यानंतर राष्ट्रवादीचे बहुतांश आमदार त्यांच्यासोबत आले. अजित पवार गट आता एनडीएचा भाग झाला आहे आणि तो राज्यातील सत्ताधारी पक्षाचा भागीदार आहे.
हे वाचलंत का :
