कोल्हापूर Navratri 2024 : करवीर निवासिनी श्री अंबाबाई देवीच्या (Karveer Nivasini Ambabai) दर्शनासाठी देशभरातून दररोज हजारो भाविक कोल्हापुरात येत असतात. अनेक भक्तांकडून देवीला वेगवेगळ्या स्वरुपात वस्तू-अलंकार दान केले जातात. शारदीय नवरात्रोत्सवाच्या (Navratri Festival 2024) पूर्वसंध्येला, खासदार धनंजय महाडिक यांच्या अध्यक्षतेखाली कार्यरत असणार्‍या, करवीर निवासिनी श्री अंबाबाई सुवर्ण पालखी ट्रस्टच्या पुढाकारातून, अंबाबाई देवीसाठी सोन्याचा मुलामा असलेली 'प्रभावळ' (Prabhaval) अर्पण करण्यात आली.
यापूर्वी श्री अंबाबाईला सुवर्ण पालखी अर्पण : 45 तोळे वजनाचे सोने प्रभावळसाठी वापरण्यात आले आहे. त्याची किंमत 35 लाख रुपये इतकी आहे. 3 ऑक्टोबरपासून सुरू होणार्‍या शारदीय नवरात्रोत्सवापासून, ही प्रभावळ करवीर निवासिनी अंबाबाईच्या सालंकृत पूजेच्या सौंदर्यात भर घालणार आहे. खासदार धनंजय महाडिक यांच्या अध्यक्षतेखाली कार्यरत असणार्‍या करवीर निवासिनी श्री अंबाबाई सुवर्ण पालखी ट्रस्टच्या वतीनं यापूर्वीच देवीला सुवर्ण पालखी अर्पण करण्यात आली होती. त्यानंतर देवीची सुवर्ण प्रभावळ घडवण्याचा संकल्प करण्यात आला होता. आज हा संकल्प पूर्ण झाला.
श्री अंबाबाईला सुवर्ण प्रभावळ : 80 वर्षापूर्वीच्या देवीच्या चांदीच्या प्रभावळीवर, ट्रस्टच्यावतीनं सोन्याचा मुलामा देण्यात आला. त्यासाठी 24 कॅरेटचे 450 ग्रॅम म्हणजेच 45 तोळे सोने वापरण्यात आले. चांदीच्या प्रभावळीला सोन्याचा मुलामा देण्याची कामगिरी गणेश चव्हाण आणि कारागिरांनी पूर्ण केली. शारदीय नवरात्रोत्सवाच्या पूर्वसंध्येला आज सायंकाळी भागीरथी संस्थेच्या अध्यक्षा अरूंधती महाडिक यांच्याहस्ते आणि महेंद्र ज्वेलर्सचे संचालक भरत ओसवाल यांच्यासह मान्यवरांच्या उपस्थितीत ही सुवर्ण प्रभावळ देवस्थान समितीकडं सुपूर्द करण्यात आली. यावेळी देवस्थान समितीच्यावतीनं सचिव शिवराज नाईकवाडे यांनी या प्रभावळीचा स्वीकार केला.
9 दिवस अशी असणार अंबाबाईची सालंकृत पूजा : गुरुवार, सिंहासनारूढ महालक्ष्मी (घटस्थापना), शुक्रवार-गजेंद्रलक्ष्मी, शनिवार-चंद्रलांबा परमेश्वरी, रविवार-गायत्री माता, सोमवार-सरस्वती देवी, मंगळवार-गजारुढ अंबारीतील (पंचमी त्र्यंबोली भेट), बुधवार महाप्रत्यांगीरा, गुरुवार-दुर्गा माता, शुक्रवार-महिषासुर मर्दिनी (अष्टमी नगर प्रदक्षिणा), शनिवार रथारुढ (नवमी दसरा सीमोल्लंघन)
यंदा एआय कॅमेऱ्याची विषेश नजर : श्री अंबाबाई मंदिर परिसरात नवरात्र उत्सवकाळात भाविकांच्या सुरक्षेसाठी सीसीटीव्ही नियंत्रण कक्ष सुरू करण्यात आला आहे. पाचही मुख्य प्रवेशद्वाराजवळ तब्बल 120 कॅमेरे, 5 डोअर फ्रेम मेटल डिटेक्टर, हॅण्ड हेल्ड मेटल डिटेक्टर, 10 बिनतारी यंत्रणा कार्यरत केल्या आहेत. तर यंदा प्रायोगिक तत्त्वावरील आर्टिफिशल इंटेलिजन्स (एआय) कॅमेराची विशेष नजर राहणार आहे. यामुळं गर्दीतील कोणाचाही चेहरा टिपता येणार आहे. क्षमतेपेक्षा अधिक भाविक आल्यास त्यावर नियंत्रण ठेवता येणार आहे. तर चोरीच्या पार्श्वभूमीवर मंदिरात मुखदर्शन आणि गणपती चौक येथे 'फिश आय' कॅमेराही बसविण्यात आला आहे. शिवाय पालखी सोहळा आणि इतर कार्यक्रमांच्या थेट प्रक्षेपणासाठी मंदिर परिसरात टीव्ही आणि एलईडी स्क्रीन बसवण्यात आल्या आहेत. एक्स-रे बॅगेज स्कॅनर अशा यंत्रणाही प. महाराष्ट्र देवस्थान व्यवस्थापन देवस्थान समितीकडून कार्यान्वित केली आहे.
हेही वाचा -
