दक्षिण मुंबई शिंदे गटाकडं जाण्याची शक्यता; भाजपा कार्यकर्त्यांमध्ये नाराजी - Lok Sabha Election 2024

South Mumbai Lok Sabha Constituency : आगामी लोकसभा निवडणुकीसाठी (Lok Sabha Election 2024) मुंबईसह राज्यातील 16 जागांवर मुख्यमंत्री एकनाथ शिंदे (Eknath Shinde) यांनी घोषणा केली होती. त्यामुळं मुंबईतील दक्षिण मुंबई या मतदारसंघात आता भाजपा ऐवजी शिवसेनेकडून संधी दिली जाणार असल्याचं सांगण्यात येतंय. यावरुन आता भाजपा नेत्यांमध्ये नाराजीचं वातावरण पाहायला मिळतंय.

मुंबई South Mumbai Lok Sabha Constituency : देशात आणि महाराष्ट्रात शुक्रवारी (25 एप्रिल) लोकसभेसाठी दुसऱ्या टप्प्याचं मतदान होणार असताना महायुतीत अद्यापही काही जागांवर तिढा कायम आहे. त्यातच मुंबईतील प्रतिष्ठित अशा दक्षिण मुंबई लोकसभा मतदारसंघावर आता एकनाथ शिंदे गटाकडून उमेदवार देण्याचं जवळपास निश्चित झालंय. मात्र, यामुळं आता मागील महिना, दोन महिन्यांपासून या मतदारसंघासाठी बांधणी करणाऱ्या भाजपा कार्यकर्त्यांमध्ये प्रचंड नाराजी बघायला मिळत आहे.

यामिनी जाधव यांच्या नावाची चर्चा : दक्षिण मुंबई लोकसभा मतदारसंघात विद्यमान खासदार अरविंद सावंत यांना शिवसेना उबाठा गटाकडून उमेदवारी देण्यात आलीय. हा मतदारसंघ महायुतीत शिवसेना एकनाथ शिंदे गटाकडं असल्यानं एकनाथ शिंदे या मतदारसंघात उमेदवार देण्यास ठाम आहेत. राज ठाकरेंची मनसे महायुतीत सामील झाल्यास हा मतदारसंघ राज ठाकरे यांच्यासाठी सोडण्याचं महायुतीकडून ठरवण्यात आलं होतं. परंतु, राज ठाकरे यांनी लोकसभा निवडणूक न लढण्याचा निर्णय घेत पंतप्रधान नरेंद्र मोदी यांना बिनशर्त पाठिंबा जाहीर केला. या कारणानं या मतदारसंघातून एकनाथ शिंदे गटाकडून उमेदवार दिला जाण्याची शक्यता वर्तवली गेली. त्यानंतर आता भायखळा विधानसभा मतदार संघाच्या शिंदे गटाच्या आमदार यामिनी जाधव यांना या मतदारसंघातून उमेदवारी देण्याचं जवळपास निश्चित झालंय. त्यामुळं या मतदारसंघातून भाजपाकडून इच्छुक असलेले उमेदवार नाराज झाले असून कार्यकर्त्यांमध्ये सुद्धा मोठ्या प्रमाणामध्ये नाराजीचं वातावरण आहे.

मतदारसंघात भाजपाकडून मोर्चे बांधणी : दक्षिण मुंबई लोकसभा मतदारसंघातून भाजपा नेते, विधानसभा अध्यक्ष राहुल नार्वेकर त्याचप्रमाणे कौशल्य विकास मंत्री मंगल प्रभात लोढा हे निवडणूक लढवण्यास इच्छुक आहेत. उपमुख्यमंत्री देवेंद्र फडणवीस यांच्यासोबत झालेल्या बैठकीनंतर या दोघांनाही या मतदारसंघातून तयारी करण्यास सांगण्यात आलं. त्या पद्धतीनं या दोन्ही नेत्यांनी आणि भाजपाच्या कार्यकर्त्यांनी मतदारसंघात बांधणी करायला सुरुवात केली. याकरिता मंत्री मंगल प्रभात लोढा यांनी मनसे अध्यक्ष राज ठाकरे यांची भेट घेतली तर राहुल नार्वेकर यांनी भायखळ्यात अरुण गवळी यांची मुलगी गीता गवळीची भेट घेत आपण अरुण गवळी यांच्या अखिल भारतीय सेनेचे एक सदस्य असल्याचंही जाहीर केलं. परंतु या मतदारसंघावर आता मुख्यमंत्री एकनाथ शिंदे यांनी दावा केला असल्यानं भाजपात नाराजी पसरली आहे. महाराष्ट्र भाजपा प्रभारी दिनेश शर्मा यांनी यामध्ये लक्ष घालावं यासाठी भाजपा कार्यकर्ते प्रयत्नात आहेत. तसंच यामिनी जाधव यांना उमेदवारी दिल्यास त्या या मतदारसंघातून निवडून येण्याची शक्यता फारच कमी असल्याचंही भाजपा कार्यकर्त्यांकडून सांगण्यात येतंय.

आमच्या हक्काची जागा : याबाबत बोलताना एकनाथ शिंदे गटाचे प्रवक्ते वैजनाथ वाघमारे म्हणाले की, दक्षिण मुंबई लोकसभा मतदारसंघासाठी मुख्यमंत्री एकनाथ शिंदे हे पूर्वीपासून आग्रही होते. याचं कारण या जागेवर विद्यमान खासदार हे उबाठा गटाचे आहेत. 2019 मध्ये ज्या 18 जागा शिवसेनेनं जिंकल्या होत्या, त्या सर्व जागांवर एकनाथ शिंदे यांचा अधिकार आहे. परंतु, भाजपाकडून आमच्या हक्काच्या काही जागा घेण्यात आल्या. काही जागांवर तडजोड झाली. परंतु ठाणे, पालघर, दक्षिण मुंबई या शिवसेनेच्या बालेकिल्ला असलेल्या जागा आहेत. त्या जागा आम्ही सोडणार नाहीत. दक्षिण मुंबईत आम्हाला योग्य उमेदवार भेटत नसल्याने येथे उशीर झाला. तसंच राज ठाकरे यांच्या मनसेचा महायुतीत समावेश होणार असल्यानं या जागेबाबत संभ्रम होता. परंतु, आता ही आमची जागा असून एक-दोन दिवसात या जागेबाबत उमेदवाराची घोषणा केली जाईल, असंही वाघमारे म्हणाले.

भाजपाचं वर्चस्व : दक्षिण मुंबई लोकसभा मतदारसंघात उबाठाकडून विद्यमान खासदार अरविंद सावंत यांना उमेदवारी जाहीर करून त्यांनी प्रचारात आघाडीही घेतली आहे. तर दुसरीकडं एकनाथ शिंदे गटाकडं भायखळा मतदारसंघातील आमदार यामिनी जाधव या एकमेव आमदार आहेत. तर उबाठा गटाचे शिवडीमध्ये अजय चौधरी आणि वरळीमध्ये आदित्य ठाकरे हे दोन आमदार आहेत. भाजपाचे कुलाबामध्ये राहुल नार्वेकर आणि मलबार हिलमध्ये मंगल प्रभात लोढा हे दोन आमदार आहेत. तर मुंबादेवी मतदार संघात अमीन पटेल हे काँग्रेसचे एकमेव आमदार आहेत. तसंच मागच्या 2019 च्या लोकसभा निवडणुकीत या मतदारसंघांमध्ये भाजपाला शिवसेनेपेक्षा जास्त मतं मिळाली होती. या कारणानं भाजपा या मतदारसंघासाठी आग्रही असून तशी तयारीही चालू केली असताना, आता एकनाथ शिंदे यांनी या मतदारसंघातून आपला उमेदवार देण्याचे निश्चित केल्यानं भाजपची कोंडी झाली आहे.

हेही वाचा -