सिंधुदुर्गसह रत्नागिरीत ऑरेंज अलर्ट; मुसळधार पावसाचा इशारा, शाळा-महाविद्यालयांना सुट्टी जाहीर - Ratnagiri Weather Forecast

Ratnagiri Rain Updates : रत्नागिरी आणि सिंधुदुर्गात मुसळधार पाऊस सुरू असून खबरदारीसाठी आज (8 जुलै) शाळा आणि कॉलेजला सुट्टी जाहीर करण्यात आली आहे.

रत्नागिरी Ratnagiri Rain Updates : रत्नागिरी आणि सिंधुदुर्ग जिल्ह्यात तुफान पर्जन्यवृष्टी सुरू आहे. खबरदारीचा उपाय म्हणून रत्नागिरी आणि सिंधुदुर्ग जिल्हा प्रशासनानं महाविद्यालय आणि शाळांना आज (8 जुलै) सुट्टी जाहीर केली आहे. तसंच जगबुडी, कोदवली नदी इशारा पातळीच्यावर असून आजही मुसळधार पाऊस होऊ शकतो. हवामान विभागानं आज रत्नागिरी जिल्ह्यासाठी ऑरेंज अलर्ट जारी केलाय.

चिपळूणमध्ये प्रशासन सतर्क, रात्री केली नदीकाठाच्या भागाची पाहणी : चिपळूणमध्ये वाशिष्टी नदीपात्रातील पाण्यात रविवारी (7 जुलै) रात्री सातत्यानं वाढ होत होती. त्यामुळं प्रशासनदेखील अलर्ट मोडवर आहे. चिपळूण पोलीस आणि महसूल प्रशासनाबरोबरच चिपळूण मध्ये दाखल झालेल्या NDRF च्या टीमनं नदी काठाच्या भागाची रात्री पाहणी केली. यावेळी पाणीपातळीचा अंदाज घेण्यात आला. सध्या पाणी ओसरलं असलं तरी, धोका मात्र कायम आहे. त्यामुळं प्रशासनही अलर्ट मोडवर आहे.

रायगड जिल्हयातील #नदी #पाणीपातळी अहवाल, वेळ सकाळी ८.०० वा. pic.twitter.com/MFzkusiSVi

— जिल्हा माहिती कार्यालय,रायगड-अलिबाग (@InfoRaigad) July 8, 2024

शाळा, महाविद्यालयांना आज सुट्टी : रत्नागिरी जिल्ह्यातील सर्व शाळा आणि महाविद्यालयातील (अंगणवाडी, पूर्व प्राथमिक आणि प्राथमिक, माध्यमिक, महाविद्यालय) विद्यार्थ्यांना आज सुट्टी जाहीर करण्यात येत असल्याचे आदेश जिल्हाधिकारी एम देवेंद्र सिंह यांनी दिला. आदेशात म्हटलंय की, प्रादेशिक हवामान विभागाच्या पूर्वसूचनेवरून जिल्ह्यातील त्या-त्या भागातील स्थानिक परिस्थितीचा आढावा घेण्यात आला. संपूर्ण जिल्ह्याकरिता अथवा जिल्ह्यातील ठराविक स्थानिक क्षेत्रातील शाळांना सुट्टी जाहीर करण्याचे जिल्हाधिकारी यांना सक्षम प्राधिकारी म्हणून प्रदान करण्यात आले आहेत. आपती व्यवस्थापन अधिनियम 2005 मधील कलम 25 अन्वये जिल्हाधिकारी हे आपत्ती व्यवस्थापन प्राधिकरणाचे अध्यक्ष आहेत. शासन परिपत्रकानुसार शाळांना सुट्टी जाहीर करण्याचे अधिकार संबंधित जिल्ह्याच्या जिल्हाधिकाऱ्यांना देण्यात आलेत.

पूर परिस्थिती निर्माण होण्याची शक्यता : हवामान विभागानं दिलेल्या पूर्वसूचनेनुसार रत्नागिरी जिल्ह्यात आज ऑरेंज अलर्ट देण्यात आलेला आहे. जिल्ह्यात मुसळधार ते अतिमुसळधार पाऊस पडण्याची शक्यता वर्तविण्यात आलीय. खेड तालुक्यातील जगबुडी नदीनं धोका पातळी ओलांडली आहे. संगमेश्वर येथील शास्त्री आणि बावनदी, लांजा येथील मुचकुंदी आणि काजळी नदी, राजापूर येथील कोदवली नदीनं इशारा पातळी ओलांडली आहे. त्यामुळं जिल्ह्यात अनेक भागात पूर परिस्थिती निर्माण होण्याची शक्यता नाकारता येत नाही.

हेही वाचा -