मुंबई - कुर्ल्यात बस अपघातात 7 निष्पाप लोकांचा बळी गेलाय. कुर्ल्याची घटना ताजी असतानाच बुधवारी सीएसएमटी इथेही बस अपघातात एकाचा मृत्यू झालाय. सोमवारी 9 डिसेंबर रोजी कुर्ल्यातील एलबीएस रोडवर एका इलेक्ट्रिक बसने कित्येक जणांना फरफटत नेले असून, यात मोठी दुर्घटना घडलीय. त्यात 7 जणांचा मृत्यू झाला तर कित्येक जण गंभीर जखमी झालेत. त्यांच्यावर अजूनही रुग्णालयात उपचार सुरू आहेत. या बस अपघातानंतर राज्य सरकारने मृतांच्या नातेवाईकांना 5 लाख रुपयांची मदत जाहीर केली होती. तसेच जखमींवर सरकारकडून उपचार केले जातील, अशी घोषणा करण्यात आली होती. मात्र सरकारी मदत ही कागदावरच राहिली आहे. अजूनही जखमी रुग्णांवर उपचार हे त्यांच्याच कुटुंबाच्या खर्चातून होत आहेत. कोणतीही सरकारी मदत, बेस्ट प्रशासन किंवा पालिकेची मदत पोहोचली नसल्याचा आरोप शिवसेना (ठाकरे गटाचे) कलिना मतदारसंघाचे आमदार संजय पोतनीस यांनी केलाय.
चालकांना प्रशिक्षण दिले पाहिजे : पुढे बोलताना आमदार संजय पोतनीस म्हणाले की, जो चालक होता, तो नऊ दिवसांपूर्वी कामावर रुजू झाला होता. त्याला साध्या बस चालवण्याचा अनुभव होता. मात्र इलेक्ट्रिक बस चालवण्याचा अनुभव नव्हता. त्यामुळे हा एवढा मोठा अपघात झाला, पण आता बेस्ट प्रशासनाने इथून पुढे जे चालक-वाहक असतील, त्यांना योग्य प्रकारे प्रशिक्षण दिले पाहिजे. त्यानंतरच त्यांना कामावरती घेतले पाहिजे, अशी मागणी आमदार संजय पोतनीस यांनी केलीय. मुंबईतील सर्वात अरुंद रस्ता म्हणजे कुर्ला एलबीएस हा परिसर आहे. येथे नेहमी हा रस्ता बिझी असतो. इथे मोठ्या प्रमाणात छोटे-मोठे फेरीवाले आहेत. त्यामुळे येथे जे अनाधिकृत फेरीवाले आहेत, त्यांना हटवण्याची गरज आहे. अनधिकृत फेरीवाल्यांना हटवण्याच्या मी सूचना पालिका प्रशासनाला दिल्यात, असं संजय पोतनीस म्हणालेत.
5 लाखांची मदत कागदावरच : अपघात झाल्यानंतर येथे 7 जणांना जीव गमवावा लागलाय, तर कित्येक जण गंभीर जखमी आहेत. ही घटना घडल्यानंतर राज्य सरकारने मृतांच्या नातेवाईकांना 5 लाखांची सरकारी मदत जाहीर केली होती. परंतु ही मदत अद्यापपर्यंत पोहोचलेली नाही. तसेच जखमींच्या उपचारासाठी सुद्धा संपूर्ण सरकारी मदत केली जाणार, असं शासनाने म्हटलं होतं. परंतु आतापर्यंत कुठलीही सरकारी मदत रुग्णांपर्यंत पोहोचली नाही. उलट रुग्णांच्या नातेवाईकांना स्वतःच्या खिशातील पैसे खर्च करून उपचार घ्यावे लागत आहेत. या अपघातातून सावरण्याऐवजी रुग्ण या उपचारामुळं कर्जबाजारी होतील, अशी भीती संजय पोतनीस यांनी व्यक्त केलीय. तसेच हा अपघात एवढा भीषण आहे की, जर योग्य उपचार झाले नाही, तर जखमी व्यक्तीला कायमचं अपंगत्व येण्याचीही शक्यता आहे. भविष्यात ते काम करू शकतील की नाही, याचीही शाश्वती नाही. त्यामुळे सरकारने याची गंभीर दखल घेऊन त्वरित त्यांच्यापर्यंत आर्थिक मदत पोहोचवली पाहिजे, असंही आमदार संजय पोतनीस म्हणालेत.
7 रुग्णांना केली मदत : या अपघातातील अनेक रुग्ण हे खासगी रुग्णालयात उपचार घेताहेत. तिथे उपचार होऊन आता तीन-चार दिवस झाल्यानंतर त्यांना डिस्चार्ज देण्याची वेळ आलीय. मात्र त्यांचे बिल भागवण्यासाठी त्यांच्याकडे पुरेसे पैसे नसल्यामुळं रुग्णालयातून त्यांना घरी सोडण्यात येत नाही. त्यामुळं मी व्यक्तिश: काही रुग्णांना मदत केलीय. यातील सात रुग्णांचा खर्च मी उचललाय, असं संजय पोतनीस म्हणालेत. परंतु जे रुग्ण उपचार घेताहेत, त्यांच्याकडे लाखो रुपयांचं बिल देण्यासाठी पैसे नाहीत. या बाबीकडे सरकारने गंभीरपणे लक्ष घालून किमान त्यांच्या उपचारासाठी तरी खर्च उचलावा, अशी अपेक्षा आहे.
बेस्टचे खासगीकरण बंद व्हावे : बेस्ट बसेसमध्ये खासगीकरण झाल्यानंतर अपघाताचे प्रमाण वाढले आहे, असा आरोप विरोधकांनी शिवसेना (ठाकरे) आणि खासकरुन आदित्य ठाकरेंवर केला आहे, असा प्रश्न संजय पोतनीस यांना विचारला असता, बेस्टमध्ये खासगीकरण हे बंद झाले पाहिजे. कारण खासगीकरणांमध्ये चालक-वाहक यांना योग्य प्रकारे प्रशिक्षण दिले जात नाही. तसेच त्यांचा अनुभव याचा विचार केला जात नाही. त्यामुळं बेस्टमधील खासगीकरण बंद करून चालक वाहकांना योग्य प्रकारे प्रशिक्षण दिले पाहिजे. त्यामुळे अपघाताच्या घटना कमी होतील, असा विश्वास यावेळी आमदार संजय पोतनीस यांनी व्यक्त केलाय.
हेही वाचा :
