मुंबई Ghatkopar Hoarding Accident : घाटकोपर होर्डिंग प्रकरणात एक महत्वाची अपडेट समोर आलीय. मुंबई पोलिसांच्या गुन्हे शाखेच्या विशेष तपास पथकानं नुकतेच इगो मीडिया प्रायव्हेट लिमिटेडची माजी संचालिका जान्हवी मराठे आणि तिचा साथीदार सागर कुंभार उर्फ सागर पाटील या दोघांना गोव्यातील मांडरेम येथील एका हॉटेलमधून अटक केली. यानंतर आरोपी जान्हवी मराठे हिच्या चौकशीत 40 लाख रुपये सिक्युरिटी डिपॉझिट घाटकोपर होर्डिंगसाठी जीआरपीला भरलं नसल्याचं उघडकीस आल्याचं एका वरिष्ठ पोलीस अधिकाऱ्यानं सांगितलं.
अनेक प्रश्न उपस्थित : धक्कादायक बाब म्हणजे 13 मे रोजी ही घटना घडली, त्याच दिवशी पालिकेकडून भावेश भिंडेला नोटीस बजाविण्यात आली. त्या नोटीसमध्ये 6 कोटी 13 लाख 84 हजार 464 रुपयांची दंडाची रक्कम भरण्याबाबतचे आदेश जारी करण्यात आले होते. या नोटीसप्रमाणे पालिकेच्या म्हणण्यानुसार, महाराष्ट्र राज्य पोलीस हौसिंग वेलफेअरच्या जागेवर भिंडेनं कुठलीही परवानगी न घेता 8 एप्रिल 2022 पासून 8 होर्डींग्ज उभारल्याचं म्हटलं आहे. जाहिरात फलक बाबतच्या महानगरपालिका अधिनियम 1888 कलम 328 नुसार जाहिरात शुल्क, विलंब आणि दंड अशी एकूण 6 कोटींची रक्कम भरण्याच्या सूचना दिल्या आहे. हे यापूर्वी का दिले नाही? याबाबत आता प्रश्नचिन्ह उपस्थित होत आहे.
