'असावा सुंदर चॉकलेटचा बाप्पा', मुंबईतील तरुणीच्या घरी चॉकलेटचे बाप्पा विराजमान, 'असं' केलं जाणार विसर्जन - Ganeshotsav 2024

Mumbai Chocolate Ganpati : शनिवारी (7 सप्टेंबर) गणेश चतुर्थीनिमित्त सर्वत्र गणरायांचं थाटामाटात आगमन झालंय. यंदा अनेक ठिकाणी इको फ्रेंडली गणपतीच्या मूर्तीला प्राधान्य देण्यात आल्याचं बघायला मिळालं. तर मुंबईतील एका तरुणीच्या घरी चक्क चॉकलेटचे बाप्पा विराजमान झालेत. त्यामुळं या बाप्पांची सध्या सर्वत्र चर्चा होत आहे.

मुंबई Mumbai Chocolate Ganpati : गणपती मूर्ती प्लॅस्टर ऑफ पॅरिस (पीओपी) ची असू नये ती मातीची असावी असा आग्रह आणि नियम असला तरी अद्यापही पीओपीच्या मूर्ती बहुसंख्य ठिकाणी बघायला मिळतात. सांताक्रुझ येथे राहणाऱ्या रिंतु राठोड नेहमी जुहू चौपाटीवर जात असत. मात्र, गणेश विसर्जनानंतर या ठिकाणी गणेश मूर्ती विद्रुप अवस्थेत असल्याचं पाहणे त्यांच्या अनेकदा नशीबी येत असे. त्यामुळं त्यांनी हा प्रकार थांबण्यासाठी काय करता येईल, याचा विचार सुरु केला.

चॉकलेटची मूर्ती बनवण्यास सुरुवात : सन 2011 पासून त्यांनी या संकल्पनेप्रमाणे गणेश मूर्ती बनवण्यास सुरुवात केली. प्रारंभी दोन तीन वर्षे त्यांनी केवळ त्यांच्या घरच्या गणेशाची मूर्ती चॉकलेटपासून बनवली. हळुहळु त्यांच्या या चॉकलेट मूर्तीची कीर्ती आजूबाजुच्या परिसरातील नागरिकांना कळू लागली. त्यानंतर त्यांनी देखील आपापल्या घरातल्या गणेश मूर्ती साठी रिंतु यांना विनंती करण्यास सुरुवात केली. सुरुवातीला रिंतु यांनी त्याला नकार दिला. मात्र, मागणी वाढू लागल्यानं त्यांनी ग्राहकांच्या ऑर्डरप्रमाणे चॉकलेटच्या गणेश मूर्ती बनवण्यास प्रारंभ केला. यंदा रिंतु यांनी गणेश भक्तांच्या ऑर्डरप्रमाणे सुमारे 100 चॉकलेटच्या गणेश मूर्ती बनवल्या आहेत.

चॉकलेट गणेश नेमका कसा? : पूर्ण चॉकलेटपासून या गणेश मूर्ती तयार केल्या जातात. भक्तांच्या सांगण्याप्रमाणे त्यामध्ये आवश्यक ते बदल केले जातात. धार्मिक शास्त्राचे पूर्ण पालन करुन या मूर्तीचं पूजन केलं जातं. गणेशोत्सवात मातीच्या किंवा पीओपीच्या मूर्तीप्रमाणे या मूर्तीला देखील तितकंच महत्त्व दिलं जातं. विसर्जनावेळी देखील धार्मिक प्रथा परंपरांचं आणि शास्त्राचं पूर्ण पालन करुन नियमित मूर्तीप्रमाणे या मूर्तीचं विसर्जन केलं जातं. केवळ फरक इतकाच आहे की, इतर मूर्तींचं विसर्जन नैसर्गिक स्त्रोत असलेल्या पाण्यामध्ये किंवा कृत्रिम तलावात केलं जातं. तर या मूर्तींचं विसर्जन पाण्याऐवजी दुधामध्ये केलं जातं. त्यानंतर ते चॉकलेटचे दूध कुठेही न वाया घालवता अनाथाश्रमातील मुलांना, गरीब मुलांना दिलं जातं.

घरचा गणपती 25 इंचांचा : रिंतु यांच्या घरात यंदा विराजमान झालेला गणपती 25 इंचांचा आहे. तर त्यांनी बनवलेला चॉकलेटचा गणपती सर्वात छोटा म्हणजे 3 इंचांचा तर सर्वात मोठा म्हणजे 3 फुटांचा आहे. रिंतु राठोड या स्वतः या सर्व मूर्ती बनवण्याचं काम करतात. पीओपी गणेश मूर्तीमुळं प्रदूषण होतं. मूर्तीचं विसर्जन झाल्यानंतर त्या पाण्यात लवकर विरघळत नाही. त्यामुळं अनेकदा किनाऱ्यावर त्याचे अवशेष पडलेले दिसतात. मात्र, चॉकलेटच्या गणपतीमुळं या समस्या उद्भवत नाहीत. रिंतु या विविध व्यक्तिमत्वांच्या चॉकलेटचे प्रतिरुप (रेप्लिका) बनवतात. चॉकलेटद्वारे बनवलेली ही प्रतिरुपं सुमारे महिनाभर टिकतात. चॉकलेट गणपतीच्या विसर्जनानंतर हे दूध मुलांच्या पोटात जातं. त्यामुळं त्या माध्यमातून मुलांमध्ये गणेशाची दिव्यता कायम राहते, अशी भावना रिंतु राठोड यांनी व्यक्त केली.

हेही वाचा -