विशाळगड अतिक्रमण मुद्दा; हसन मुश्रीफांनी मला पुरोगामीत्व शिकवू नये, संभाजीराजेंनी पिळले कान - Sambhaji Raje Warns Hasan Mushrif

Sambhaji Raje Warns Hasan Mushrif : विशाळगडावरील अतिक्रमण मुक्तीसाठी माजी खासदार संभाजीराजे छत्रपती यांनी पुढाकार घेतलाय. यावर कोल्हापूरचे पालकमंत्री हसन मुश्रीफ यांनी टीका केली. हा मुद्दा न्यायप्रविष्ट असताना संभाजीराजेंनी ही भूमिका का घेतली? असा प्रश्न त्यांनी विचारला. यावर हसन मुश्रीफांनी मला पुरोगामीत्व शिकवू नये, असा हल्लाबोल संभाजीराजेंनी केलाय.

कोल्हापूर Sambhaji Raje Warns Hasan Mushrif : घोटाळे करून महायुतीची वाट धरणाऱ्या पालकमंत्री हसन मुश्रीफांनी मला पुरोगामीत्व शिकवू नये, असा हल्लाबोल स्वराज्य पक्षाचे संस्थापक अध्यक्ष माजी खासदार संभाजीराजे छत्रपती यांनी केलाय. रविवारी विशाळगडावर अतिक्रमण मुक्त मोहीम राबवण्यात आली. यावेळी झालेल्या हिंसाचारावर बोलताना पालकमंत्री हसन मुश्रीफ यांनी विशाळगड अतिक्रमण प्रकरण न्यायप्रविष्ट असताना संभाजीराजेंनी अशी भूमिका का घेतली? असा सवाल उपस्थित केला होता. त्याला संभाजीराजेंनी प्रत्युत्तर दिलं.

विशाळगडावर बंदोबस्त न केल्याचा आरोप : विशाळगड अतिक्रमण हा विषय गेल्या अनेक वर्षांपासून सुरू आहे. मी तर गेले दीड वर्षांपासून या प्रकरणाचा पाठपुरावा करत आहे. प्रशासनाला माहीत होतं शिवभक्त येणार आहेत. मग त्यांनी आधिच निर्णय का दिला नाही? मी विशाळगडावर जाणार आहे हे माहीत होतं तर पालकमंत्र्यांनी पुढाकार घ्यायला हवा होता. शिवभक्तांचा आक्रोश होता हे प्रशासनाला माहीत होतं. मी तिथे येणार आहे हे देखील प्रशासनाला माहीत होतं; मग प्रशासनाने बंदोबस्त का लावला नाही? तत्कालीन जिल्हाधिकारी राहुल रेखावार यांनी अतिक्रमण काढण्याचा धाडसी आदेश दिला. अतिक्रमण काढण्यासाठी सुरुवात झाली; मात्र ते पुन्हा थांबवण्यात आले. ते कोणी थांबवलं? एक पुढारी नेता या गडकोट किल्ल्यांबद्दल काही बोलत नाही. छत्रपती शिवरायांच्या साडेतीनशेव्या शिवराज्याभिषेक सोहळ्यावेळी 350 कोटी रुपये गड संवर्धनासाठी जाहीर केले होते. याच पुढं काय झालं? विशाळगडावरील अतिक्रमण काढावं हा एकच माझा प्रामाणिक हेतू आहे, अशी षडयंत्र करून मला परिणाम करण्याचा प्रयत्न जाणीवपूर्वक होत असेल तर मी गडसंवर्धन मोहिमेचे काम थांबवतो, असं उद्विग्नपणे संभाजीराजे छत्रपती म्हणाले.

संभाजीराजे शाहुवाडी पोलीस ठाण्याकडे रवाना : रविवारी अतिक्रमणमुक्त मोहिमेला हिंसक वळण लागल्यानंतर जमावाकडून विशाळगडाच्या पायथ्याशी असलेल्या गजापूरमधील काही घरांना लक्ष करण्यात आलं. या हिंसाचाराचं मी कधीही समर्थन करणार नाही असंही संभाजीराजे म्हणाले; मात्र शाहुवाडी पोलीस ठाण्यात अनेक शिवभक्तांवर गुन्हे दाखल करण्यात आले अशी प्राथमिक माहिती समोर आल्यानंतर संभाजीराजे छत्रपती यांनी शाहूवाडी पोलीस ठाण्याकडे निघण्याचा निर्णय घेतला. शिवभक्तांवर गुन्हे दाखल करण्यापेक्षा मला अटक करा अशी भूमिका संभाजी राजेंनी घेतली आहे. त्यामुळे विशाळगड परिसरात तणावाचं वातावरण निर्माण झालं आहे. दरम्यान या हिंसाचार प्रकरणी शाहूवाडी पोलीस ठाण्यात 21 जणांवर गुन्हा दाखल करण्यात आला आहे.

हेही वाचा: