ताडोबात वाघांची सुरक्षा धोक्यात; जिप्सीचा वाघिणीला घेराव, वनमंत्री धरणार अधिकाऱ्यांना धारेवर? - Tigress Surrounded By Gypsy Drivers

Tigress Surrounded By Gypsy Drivers : चंद्रपूर जिल्ह्यातील ताडोबा अंधारी व्याघ्र प्रकल्पामध्ये वाघिणीला चारही जिप्सी चालकांनी चारही बाजूने घेरण्यात आल्याचा गंभीर प्रकार समोर आला आहे. 17 मे ला हा प्रकार घडला होता. हा प्रकार समोर आल्यानंतर प्रशासन जागे झाले. या प्रकरणात दहा जिप्सी वाहने, वाहनचालक आणि गाइड यांना एक महिन्याकरिता निलंबित करण्यात आले आहे.

चंद्रपूर Tigress Surrounded By Gypsy Drivers : ताडोबा अंधारी व्याघ्र प्रकल्पामध्ये वाघिणीला जिप्सी चालकांनी घेरल्याच्या प्रकाराची गंभीर दखल वनमंत्री सुधीर मुनगंटीवार यांनी घेतली आहे. उद्या त्यांनी या संबंधी ताडोबातील अधिकाऱ्यांची बैठक बोलावली असून यात संबंधित अधिकाऱ्यांना जाब विचारणार असल्याची माहिती आहे.

वाघ दिसावा यासाठी पर्यटकांचा अट्टहास : ताडोबा अंधारी व्याघ्रप्रकल्पात वाघांच्या दर्शनासाठी जिप्सीचालकांमध्ये जीवघेणी स्पर्धा लागते. जिप्सीवर बसणाऱ्या पर्यटकांना कुठल्याही परिस्थितीत वाघ दिसायला हवा असा यामागचा अट्टाहास असतो. हा दबाव दोन्ही बाजूने असतो. पर्यटकांचा दबाव हा वाघ दिसायलाच हवा असा असतो तर गाईड आणि वाहनचालक देखील वाघ दिसला तर आपल्याला बक्षीस मिळणार या प्रयत्नात असतात. यामुळे वाघांना याचा नाहक त्रास होतो आणि पर्यायाने माणसाला याचा धोका निर्माण होतो.

म्हणून ताडोबात मोबाईलवर बंदी? : ताडोबा-अंधारी व्याघ्रप्रकल्पात मोबाईलवर बंदी आहे. मोबाईलवर बंदी आणणारा महाराष्ट्रातील हा एकमेव प्रकल्प आहे. यापूर्वी देखील अशा अनेक घटना घडल्या जिथे प्रकल्पात असलेल्या नियमांचे उल्लंघन करण्यात आले. मोबाईलची मुभा असल्याने ह्या घटना लवकर समोर यायच्या. एकदा एका बछड्याने जिप्सीचा पाठलाग केला होता. अनेकदा वाघ दिसला असता त्याची अडवणूक करून जिप्सीनी गराडा घातल्याच्या देखील घटना घडल्या आहेत. मोबाईलमधून ह्याचे चित्रीकरण झाल्याने असे व्हिडिओ व्हायरल व्हायचे आणि यानंतर ताडोबा व्यवस्थापन यावर कारवाई करायचे. मात्र प्रकल्प संचालक एन. आर. प्रवीण असताना अचानक ताडोबा अंधारी व्याघ्रप्रकल्पात मोबाईल बंदी आणण्याचा निर्णय घेण्यात आला. राष्ट्रीय व्याघ्रप्रकल्पात अशी कुठेही बंदी नाही; मात्र ताडोबात यावर निर्बंध लावण्यात आल्याने अनेकांनी यावर नाराजी व्यक्त केली. केवळ व्यावसायिक कॅमेरे वापरण्याची परवानगी देण्यात आली. मोबाईलला परवानगी असताना अशा घटना समोर आल्याने ताडोबा व्यवस्थापनाची डोकेदुखी वाढली होती. त्यामुळे नियमांचे उल्लंघन होणाऱ्या घटना समोर येऊच शकल्या नाहीत. फार क्वचित अशा घटना समोर आल्या. ताडोबा अंधारी व्याघ्रप्रकल्पात होणारे नियमांचे उल्लंघन आणि त्यावर कारवाई करण्याचा ताण यातून मुक्त होण्यासाठी मोबाईलवर बंदी आणण्यात आली का? असा सवाल देखील आता उपस्थित होऊ लागला आहे.

प्रसारमाध्यमांच्या बातम्यामुळे उजेडात आला प्रकार : 17 मे रोजी कोअर झोनमध्ये सकाळी खातोडा ते ताडोबा मार्गावर पर्यटकांना घेऊन एका क्रुझरसह दहा वाहने पर्यटकांना घेऊन सफारी करण्यात आली. वाघीन T-114 ही कोअर झोनमधील सफारी सुरू असलेल्या मार्गाने भ्रमण करीत असताना सदर जिप्सींनी तिचा मार्ग अडवून अडथळा निर्माण केला आणि पर्यटनाचा आनंद लुटला. इतकी मोठी घटना घडली तरी अधिकाऱ्यांनी यावर कुठलीही कारवाई केली नाही. अखेर प्रसारमाध्यमाच्या बातमीनंतर हा प्रकार समोर आला. यानंतर ताडोबा व्यवस्थापनाला जाग आली आणि अखेर त्यांनी दहा जिप्सीवर कारवाई केली. दहा जिप्सींसह मार्गदर्शकावर महिनाभरासाठी निलंबनाची कार्यवाही करण्यात आली आहे. तर हंगामी पर्यटन वाहन चालकांवर कायमची बंदी घालण्यात आली आहे. या वाहन चालकांना महिनाभरासाठी निलंबित करून त्यांच्यावर प्रत्येकी 3 हजार रुपये दंड ठोठावण्यात आला आहे. आठवडाभरानंतर ही कार्यवाही ताडोबा अंधारी व्याघ्र प्रकल्पाचे मुख्य वनसंरक्षक तथा क्षेत्र संचालक कुशाग्र पाठक यांनी केली.

काय म्हणाले वनमंत्री मुनगंटीवार? : या प्रकाराची गंभीर दखल राज्याचे वनमंत्री सुधीर मुनगंटीवार यांनी घेतली आहे. घडलेला प्रकार हा अत्यंत चुकीचा असून यामुळे वाघ आणि पर्यटकांच्या जीवाला धोका निर्माण होतो. अशा घटना घडल्या तर भविष्यात जिप्सीची संख्या देखील कमी करावी लागेल आणि याचा परिणाम पर्यटनावर होईल. याबाबत आपण वनविभागाच्या अधिकाऱ्यांची बैठक बोलावली असून याबाबतची माहिती अधिकाऱ्यांकडून घेणार असल्याचे वनमंत्री मुनगंटीवार म्हणाले. मात्र हा प्रकार गंभीर असून यात हलगर्जीपणा बाळगणाऱ्या अधिकाऱ्यांना धारेवर धरण्यात येणार असल्याची शक्यता वर्तविण्यात येत आहे.

हेही वाचा :