कस्टम विभागाची मोठी कारवाई! मुंबई विमानतळावर तब्बल 1.45 कोटी रुपयांचे अमली पदार्थ जप्त

मुंबईच्या कस्टम विभागानं छत्रपती शिवाजी महाराज आंतरराष्ट्रीय विमानतळावर मोठी कारवाई केली आहे. या कारवाईत 1.45 कोटी रुपयांचे अमली पदार्थ जप्त करण्यात आले आहेत.

मुंबई : मुंबईतील छत्रपती शिवाजी महाराज आंतरराष्ट्रीय विमानतळावर बँकॉकमधून आलेल्या एका प्रवाशाकडून एक दोन नाही तर तब्बल 1.45 कोटी रुपयांचे अमली पदार्थ जप्त करण्यात आले आहे. या अमली पदार्थात 1.45 कोटी रुपयांचा गांजा असल्याची माहिती समोर आली आहे. तर, या प्रवाशानं मोठ्या चतुराईनं कोणालाही संशय येऊ नये, याकरिता व्हॅक्यूम-शीलबंद पॅकेटमध्ये गांजा लपवला होता, अशी माहिती कस्टम विभागानं दिली आहे.

कस्टम विभागाची कारवाई : मुंबई आंतरराष्ट्रीय विमानतळावर मागील महिन्यात कोट्यावधी रुपयांचे अमली पदार्थ जप्त करण्यात आले होते. ही घटना ताजी असतानाच आता शनिवारी (19 ऑक्टोबर) बँकॉकमधून आलेल्या एका प्रवाशाकडून 1.45 कोटी रुपयांचा गांजा जप्त करण्यात आलाय. 1962 सीमाशुल्क कायदा आणि 1985 एनडीपीएसनुसार अमली पदार्थ कायद्याअंतर्गत आरोपीवर कारवाई करण्यात आली आहे. पुढील तपास कस्टम विभागाचे अधिकारी करत आहेत. तर अमली पदार्थ तस्करीला आळा घालण्यासाठी कस्टम विभागानं मोठ्या हालचाली सुरू केल्या आहेत. त्यांच्या प्रयत्नांना काही प्रमाणात यश येताना दिसत आहे.

सुरक्षा वाढवली : 14 ऑक्टोबर रोजीदेखील मुंबई विमानतळावर अशीच घटना घडली होती. यावेळी सीमा शुल्क विभागानं पाच किलो गांजा जप्त केला होता. खाद्यपदार्थाच्या पाकीटमध्ये हा गांजा लपवला होता. परंतु, तपासादरम्यान हे सीमाशुल्क विभागाच्या निदर्शनास आल्यामुळं त्या प्रवाशावर कारवाई करण्यात आली होती. दरम्यान, छत्रपती शिवाजी महाराज आंतरराष्ट्रीय विमानतळावर तस्करीच्या घटनांमध्ये सातत्यानं वाढ होत आहे. त्यामुळे विमानतळावर मोठ्या प्रमाणात सुरक्षा यंत्रणा आणि कस्टम विभागाचे अधिकारी तैनात करण्यात आले असल्याची माहिती कस्टम विभागानं दिली आहे.

हेही वाचा -