ठाणे Akshay Shinde Encounter Case : अक्षय शिंदे एन्काउंटर प्रकरण वेगानं पुढं सरकताना दिसत आहे. या प्रकरणाचा तपास सीआयडीकडं सोपवण्यात आलाय. तपास सोपवण्यात आल्यानंतर सीआयडी पथक तातडीनं कामाला लागलंय. या प्रकरणाचा तपास करण्यासाठी मंगळवारी एसआयटी आणि सीआयडीचे पथक मुंब्रा येथील घटनास्थळी दाखल झालं. ज्या ठिकाणी चकमक झाली त्या ठिकाणी एसआयटी आणि सीआयडी पथक तपास करत आहे.
सीआयडी आणि एसआयटी चौकशीचा ससेमिरा : मंगळवारी एसआयटी पथकानं मुंब्रा येथील घटनास्थळी पोहोचून घटनास्थळाची पाहणी केली. यावेळी व्हॅनमध्ये चार राउंडच्या पुंगळ्या सापडल्या. सीआयडीचे पथक दुपारी मुंब्रा पोलीस ठाण्यात दाखल झालं होतं. त्यामुळं आता या प्रकरणात सीआयडी आणि एसआयटी चौकशीचा ससेमिरा सुरू झाल्याचं स्पष्ट झालं.
गोळीबाराचा आवाज आला नाही? : राजकीय आरोप-प्रत्यारोपांच्या फैरी झाडल्या गेल्यानं सोमवारी घडलेल्या या घटनेचा गंभीर परिणाम होऊन नागरिकांमध्ये चर्चेला उधाण आलंय. अक्षय शिंदेच्या एन्काउंटरमुळं विविध चर्चा रंगत आहेत. मुंब्रा बायपासवर सोमवारी सायंकाळी झालेला एन्काऊंटर वादाच्या भोवऱ्यात सापडला. यात एकूण चार गोळ्या झाडण्यात आल्या. आरोपी अक्षय शिंदेनं एक राऊंड फायर केली. त्यानंतर स्वसंरक्षणार्थ पोलीस अधिकाऱ्यानं अक्षय शिंदेच्या दिशेनं एक राऊंड फायर केला. यात अक्षय शिंदेचा मृत्यू झाला. ही घटना मुंब्रा बायपासवर घडली. मात्र, गोळीबाराचा आवाज आसपासच्या लोकांना ऐकू आला नाही. त्यामुळं या घटनेमागचं नेमकं सत्य काय? याबाबत मुंब्रावासीयांमध्ये चर्चा सुरू होती.
एसआयटी पथकाची स्थापना आणि कारवाई : बदलापूर परिसरात घडलेली अत्याचाराची घटना, गुन्हा दाखल करण्यास झालेला विलंब, बदलापुरातील आंदोलन या सर्व प्रकरणाच्या तपासासाठी एसआयटी पथकाची स्थापना करण्यात आली होती. याच पथकातील संजय शिंदे यांनी अक्षय शिंदेवर गोळी झाडली. अक्षय शिंदेनं केलेल्या गोळीबारात सहायक पोलीस निरीक्षक नीलेश मोरे जखमी झाले. त्यानंतर स्वसंरक्षणार्थ संजय शिंदे यांनी अक्षयवर गोळीबार केला, त्यात अक्षय शिंदेचा मृत्यू झाला.
पत्रकारांच्या प्रश्नांना उत्तर देण्यास नकार : सोमवारी झालेल्या घटनेबाबत पोलीस अधिकारी माध्यमांनाही माहिती देण्यास तयार नाहीत. दुसरीकडे, मंगळवारी ठाणे पोलिसांच्या वतीनं जनसंपर्क पोलीस अधिकारी शैलेश साळवी यांनी पत्रकार परिषद घेऊन पोलिसांनी स्वसंरक्षणार्थ केलेल्या गोळीबारात अक्षय शिंदे ठार झाल्याचं जाहीर केलं. अक्षय शिंदेनं गोळीबार केल्याप्रकरणी मुंब्रा पोलीस ठाण्यात गुन्हा दाखल करण्यात आल्याची माहिती देण्यात आली. मात्र, पत्रकारांच्या प्रश्नांना शैलेश साळवी यांनी उत्तर देण्यास नकार दिला.
शिवसेनेच्या वतीनं जल्लोष : आरोपी अक्षय शिंदे पोलीस एन्काऊंटरमध्ये ठार झाल्यानंतर बदलापूरसह अन्य ठिकाणी लोकांनी जल्लोष केला. मंगळवारी ठाण्यातील धर्मवीर आनंद दिघे यांच्या शक्ती पीठावर शिवसेनेच्या वतीनं फटाक्यांच्या आतषबाजीत पोलिसांच्या कारवाईचं समर्थन केलं. यावेळी शिवसैनिकांनी "संजय शिंदे आगे बढो, हम तुम्हारे साथ है" अशा घोषणा दिल्या.
जखमींना पाहण्यासाठी नेते मंडळी रुग्णालयात : खासदार नरेश मस्के, भाजपाचे आमदार संजय केळकर, मनसेचे नेते अविनाश जाधव अशा अनेक नेत्यांनी जखमींना भेटून त्यांची विचारपूस केली.
वाहनाची तपासणी : पोलिसांच्या ज्या वाहनात चकमक झाली ते वाहन पोलीस मैदानात ठेवण्यात आलंय. वाहनाच्या भोवती बेरिकेटिंग देखील करण्यात आलं असून पुढील काही दिवस चौकशी पूर्ण होईपर्यंत हे वाहन पोलीस मैदानातच राहणार आहे. मुंब्रा पोलीस आणि सीआयडीचं पथक संध्याकाळच्या सुमारास भर पावसातही या वाहनाची तपासणी करत होतं.
हेही वाचा
- बदलापूर घटनेतील आरोपीच्या एन्काऊंटरवर उदयनराजे म्हणाले; "गोळ्या घालून मारण्यापेक्षा...." - Akshay Shinde Encounter
- बदलापूर प्रकरणातील संस्थाचालकांची अटकपूर्व जामिनासाठी उच्च न्यायालयात धाव, 'या' दिवशी सुनावणी होणार - AKSHAY SHINDE ENCOUNTER
- "अक्षय शिंदे एन्काऊंटर संपूर्णपणे फेक तसेच स्क्रिप्टेट; कोर्टात जाणार" - Akshay Shinde Encounter
