पावसाळ्यात पडणारे खड्डे २४ तासांत दुरुस्त करण्यात येणार-बृहन्मुंबई महानगरपालिकेचा दावा - Mumbai Potholes

Mumbai Roads Potholes : दरवर्षी पावसाळ्यात मुंबईतील रस्त्यांवर मोठ्या प्रमाणावर खड्डे पडतात. मात्र, यंदा पावसाळ्यात पडणाऱ्या या खड्ड्यांचा 24 तासात निपटारा होणार असल्याचा दावा बृहन्मुंबई महानगरपालिकेनं केला.

मुंबई Mumbai Roads Potholes : मान्सून वेळेपूर्वीच महाराष्ट्रात दाखल झाल्यानं मुंबईत बृहन्मुंबई महानगरपालिकेकडून उपाययोजना सुरू झाल्या आहेत. दरवर्षी पावसाळ्यात रस्त्यांवरील खड्ड्यांमुळे मुंबईकरांना त्रासाला सामोरे जावे लागते. या पार्श्वभूमीवर महापालिकेकडून रस्त्यावरील खड्ड्यांचा 24 तासात निपटारा करण्याचं नियोजन करण्यात आले.

पावसामुळं रस्त्यांवर तयार होणाऱ्या खड्ड्यांच्या तक्रारींचा निपटारा शक्यतो 24 तासांमध्ये करणं ही यंत्रणा म्हणून जबाबदारी घ्यावी, असे निर्देश महानगरपालिका आयुक्त अभिजीत बांगर यांनी बैठकीत दिले. तसंच पावसाळ्यात मुंबईतील खड्डेमुक्त रस्त्यांसाठी रस्ते विभाग आणि इतर सर्व संबंधित यंत्रणा सक्षमपणे आणि एकसंघपणे कार्यरत आहे, याचा अनुभव आपल्या कामकाजातून नागरिकांना आला पाहिजे. त्यासाठी सर्व संयंत्रे आणि साहित्याची उपलब्धता राहील याची खातरजमा करा, असे निर्देश अतिरिक्त महानगरपालिका आयुक्तांनी दिले. या संदर्भातील बैठक बृहन्मुंबई महानगरपालिकेच्या मुख्यालयात गुरुवारी पार पडली. या बैठकीत मुंबईतील रस्त्यांच्या कामांचा आढावा घेण्यात आल्याची माहिती पालिकेनं दिली.

चौकोनी आकारात मास्टिकद्वारे खड्डे व्यवस्थित भरावेत- पालिकेनं दिलेल्या माहितीनुसार, रस्त्यांवरील खड्डे बुजवण्यासाठी विभागनिहाय प्रत्येकी तीन याप्रमाणे एकूण 72 मास्टिक कुकर उपलब्ध ठेवण्याच्या सूचना दिल्या आहेत. या सर्व मास्टिक कुकर संयंत्रांवर जीपीएस लावून त्याआधारे संयंत्रांच्या उपलब्धततेवर लक्ष ठेवलं जाईल. त्यासाठी डॅशबोर्डची निर्मिती करण्यात येत आहे. तसंच संपूर्ण मुंबईत जास्त पावसाच्या कालावधीत रस्त्यांवरील खड्डे बुजविताना प्राप्त तक्रारी लक्षात घेऊन कमीत कमी वेळेत खड्डे बुजविता येतील अशारितीनं मार्गांचा क्रम आखण्यात येणार आहे. खड्डे बुजविताना चौकोनी आकारात मास्टिकद्वारे खड्डे व्यवस्थित भरावेत. खड्डा भरताना वेड्यावाकड्या आकारात भरला जाणारा नाही, यादृष्टीनं खबरदारी घेण्याची दक्षता घ्यावी, असे निर्देश सहआयुक्त अभिजीत बांगर यांनी दिलेत.

जीपीएस यंत्रणा बसवण्याची कार्यवाही करावी-प्रत्येक विभागात 9 मीटरपेक्षा अधिक रूंदीच्या रस्त्यासाठी 2 मास्टिक कुकर आणि 9 मीटरपेक्षा कमी रूंदीच्या रस्त्यांसाठी 1 मास्टिक कुकर याप्रमाणे 24 विभागांमध्ये 72 मास्टिक कुकरचा वापर करावा. नोंदणी प्रक्रिया करून मास्टिक कुकरसह सर्व संयंत्रांची यादी तयार करावी. तसंच सर्व विभागातील मास्टिक कुकर हे सुस्थितीत आणि वापरासाठी उपलब्ध असावेत, याची खातरजमा विभागीय पातळीवर करण्यात यावी. तसंच सर्व मास्टिक कुकरला लवकरात लवकर जीपीएस यंत्रणा बसवण्याची कार्यवाही पूर्ण करण्याच्या सूचनाही बांगर यांनी दिल्यात.

आपआपसात समन्वय आणि नियोजन राखावं- सर्व संबंधित कंत्राटदारांना सूचना करून मास्टिकचे उत्पादन आणि उपलब्धतता, आवश्यक तेव्हा आणि आवश्यक त्या प्रमाणात पुरवठा होईल. यासाठी आत्तापासूनच खातरजमा करून ठेवावी. खड्डे बुजवण्याची कामं करताना विविध विभागांनी आपआपसात समन्वय आणि नियोजन राखावं. एखाद्या विशिष्ट विभागात अतिरिक्त मास्टिक कुकर आवश्यक असल्यास अन्य विभागातून मास्टिक कुकरपासून वापर करण्याची मुभा असेल, असंही बांगर यांनी सांगितलंय.

रस्त्यांवरील खड्ड्यांमुळे न्यायालयानं ओढले होते ताशेरे- मुंबई महानगरपालिकेच्या हद्दीमध्ये दरवर्षी रस्त्यांवर पडलेल्या खड्ड्यांमुळे अनेक दुर्घटना होतात.त्यामुळे दुर्घटना होऊन काही व्यक्तींचे मृत्यूदेखील झालेले आहेत. याबाबत राज्य सरकारला दिलेल्या आदेशाचे पालनदेखील शासन आणि सर्व महानगरपालिकांकडून झाले नसल्यानं मुंबई उच्च न्यायालयानं गेल्या वर्षी ताशेरे वाढले होते.

हेही वाचा -