मराठा आरक्षण आंदोलन : आंदोलनात राजकीय बोलाल, तर जशास तसं उत्तर देऊ, नितेश राणेंचा मनोज जरांगेंना इशारा - Nitesh Rane Slams Manoj Jarange

Nitesh Rane Slams Manoj Jarange : मराठा आंदोलक मनोज जरांगे हे आपल्या आंदोलनात भाजपा आणि देवेंद्र फडणवीस यांच्यावर टीका करत आहेत. त्यावरुन भाजपा आमदार नितेश राणे यांनी मनोज जरांगे यांना चांगलंच सुनावलं आहे. मनोज जरांगे यांनी राजकीय बोललं, तर आपण जशास तसं उत्तर देऊ, असा इशारा नितेश राणे यांनी दिला आहे.

मुंबई Nitesh Rane Slams Manoj Jarange : राज्यात ओबीसी आणि मराठा आंदोलनावरुन चांगलाच वाद पेटलेला आहे. त्यावरुन आता भाजपा आमदार नितेश राणे यांनी पुन्हा एकदा मराठा आंदोलक मनोज जरांगे यांना इशारा दिला आहे. मराठा समाजाच्या हिताचं बोलाल तर समर्थन, परंतु राजकीय बोलाल, तर जशास तसं उत्तर दिलं जाईल," असा इशारा नितेश राणे यांनी दिला आहे. नितेश राणे हे आज मुंबईत बोलत होते.

भाजपा आमदार नितेश राणे (ETV Bharat Reporter)

जर भाषा राजकीय आणि निवडणुकीची असेल : याप्रसंगी बोलताना नितेश राणे म्हणाले की, "दोन दिवसापूर्वी मी मनोज जरांगे यांना मोहम्मद अली जिन्नाची उपमा दिली. तेव्हा महाविकास आघाडीतील आणि त्याला समर्थन करणाऱ्या ब्रिगेडी लोकांना ते फार झोंबलं. पण, या मागची कारण आहेत. आम्ही पहिल्या दिवसापासून एकच बोलत आहोत, आमचा मराठा समाजाला पाठिंबा आहे. आम्ही पण मराठा आहोत. जिन्ना ने हिंदू - मुस्लिमांमध्ये फूट पाडली. तीच भूमिका मनोज जरांगे घेत असतील, तर आमचा विरोध आहे. आज मनोज जरांगे यांची भाषा एका राजकीय नेत्यांची आहे. ते फक्त देवेंद्र फडणवीस आणि भाजपावर टीका करत आहेत. महाविकास आघाडीवर ते काहीच बोलत नाहीत. मनोज जरांगे तुम्ही मराठा समाजाच्या हिताचं बोलाल तर समर्थन देऊ, मात्र राजकीय बोललं तर विरोधच असेल," असा इशाराही नितेश राणे यांनी दिला आहे. नितेश राणे पुढे म्हणाले की, "मराठा आरक्षणावरून सुरु झालेलं आंदोलन आता पाडापाडीवर गेलंय. मनोज जरांगे तुम्ही समाजावर बोला, राजकारण नको. जर भाषा राजकीय आणि निवडणुकीची असेल, तर निवडणुकीच्या माध्यमातून उत्तर दिलं जाईल," असा सज्जड इशारा सुद्धा नितेश राणे यांनी दिला आहे.

शांतता रॅलीत मराठा किती? : नितेश राणे पुढं बोलताना म्हणाले की, "मनोज जरांगे तुमच्या आंदोलनाचा फायदा हा मराठ्यांना होत नाही. तुमची शांतता रॅली अल्पसंख्यांक समाजानं हायजॅक केली आहे का? तुमच्या शांतता रॅलीत मराठा किती आहेत, ते तपासलं पाहिजे. आम्हाला विरोध करणारे हे मराठा समाजाचे नाहीत. मराठा समाजानं हे लक्षात घ्यावं, अन्यथा हे ओबीसी आणि मराठा वादात गुंतून ठेवतील," असंही नितेश राणे म्हणाले.

हेही वाचा :