मुंबई : 'मुख्यमंत्री माझी लाडकी बहीण' योजनेला (Mukhyamantri Majhi Ladki Bahin Yojana) राज्यात उदंड प्रतिसाद मिळत आहे. 'मुख्यमंत्री माझी लाडकी बहीण' योजनेमुळे राज्यात पुन्हा एकदा महायुतीचं सरकार आलंय. त्यामुळे ही योजना महायुतीसाठी क्रांतीकारी योजना ठरली आहे. दरम्यान, या योजनेचा सहावा हफ्ता डिसेंबर महिन्याचा शेवटच्या आठवड्यापासून यायला सुरुवात झाली आहे. पण या योजनेचा महिलांनी चुकीच्या पद्धतीने लाभ घेतला आहे. याबाबत काही सरकारला तक्रारी प्राप्त झाल्या आहेत. यावर सरकारकडून लवकरच कारवाई केली जाणार असल्याची माहिती महिला व बालकल्याण मंत्री अदिती तटकरे यांनी दिलीय.
तक्रारी प्राप्त झालेल्या अर्जांची पडताळणी : 'मुख्यमंत्री माझी लाडकी बहीण' योजनेबाबत पाच प्रकारच्या तक्रारी महिला व बालकल्याण विभागाला प्राप्त झाल्या आहेत. त्यामुळं विविध आणि वेगवेगळ्या निकषांवर त्या अर्जांची छाननी होणार आहे. काही तक्रारी स्थानिक प्रशासनाकडून आल्या आहेत, तर काही लाभार्थी महिलांनी पत्र लिहून या योजनेचा लाभ घेत आहेत, मात्र आता त्या महिला पात्र नसल्याची माहिती समोर आली आहे. दरम्यान, तक्रारी प्राप्त झालेल्या अर्जांची पडताळणी केली जाणार आहे. पण हे करत असताना, कुठेही मूळ जीआरमध्ये बदल होणार नसल्याचं अदिती तटकरे यांनी सांगितलं.
कोणत्या अर्जांची पडताळणी होणार
1) ज्या महिलांचे उत्पन्न अडीच लाखापेक्षा जास्त आहे, तरी योजनेचा फायदा घेत आहे अशा अर्जांची छाननी करण्यात येईल.
2) ज्या महिला या योजनेचा लाभ घेतात. पण त्यांच्या घरी चारचाकी वाहन आहे. अशा अर्जांची पडताळणी करणार.
3) एकाच महिलेने दोन अर्ज दाखल केले आहेत, अशा अर्जांची देखील छाननी करण्यात येणार आहे.
4) लग्न झाल्यानंतर महाराष्ट्र राज्यातून इतर राज्यात स्थलांतरित झालेल्या अर्जांची पडताळणी आणि छाननी करणार.
5) आधार कार्डवर आणि इतर कागदपत्रांवरील नावामध्ये तफावत असलेल्या अर्जांची पडताळणी करण्यात येणार.
हेही वाचा -
- लाडकी बहीण योजनेचा अर्ज रिजेक्टेड की अप्रूव्हड?; 'नारीशक्ती दूत ॲप'वर असा तपासा अर्ज, पाहा व्हिडिओ - Ladki Bahin Yojana
- महिलांमध्ये गोंधळाची परिस्थिती; राज्यात 'मुख्यमंत्री माझी लाडकी बहीण' योजनेची वस्तुस्थिती काय? - Mukhyamantri Ladki Bahin Yojana
- चार बायका असणाऱ्यांना लाडकी बहीण योजनेचा लाभ देणार का - मनसे - Mazi Ladki Bahin Yojana
