मुंबई Ashish Shelar Fake PA : आमदार आशिष शेलार यांचा स्वीय सहाय्यक आणि मंत्रालय लाईन सेक्रेटरी असल्याचं भासवून एक भामटा अनेक वकिलांकडून बंदिवान असलेल्या आरोपींची माहिती घेत होता. हा प्रकार जुलै 2023 पासून सुरू होता. आरोपींची माहिती घेवून त्यांच्या नातेवाईकांना फोन करून पैसे उकळण्याचं काम हा आरोपी करायचा. आमीर बेंद्रेकर असं आरोपीचं नाव आहे. या आरोपीला रविवारी अटक करण्यात आली असून, त्याच्यावर याआधीही आठ ते दहा गुन्हे दाखल असल्याची माहिती वांद्रे पोलीस ठाण्याचे वरिष्ठ पोलीस निरीक्षक संजय मराठे यांनी दिली.
आशिष शेलारांच्या PA नं दिली तक्रार : आमदार आशिष शेलार यांचे खासगी स्वीय सहाय्यक नवनाथ सातपुते यांनी या प्रकरणी वांद्रे पोलीस ठाण्यात तक्रार दाखल केली होती. या तक्रारीवरून वांद्रे पोलीस ठाण्यात कलम 204, 318 (4), 319 (2) आणि 356(2) अन्वये गुन्हा दाखल करण्यात आलाय. हा गुन्हा शनिवारी (24 ऑगस्ट) दाखल करण्यात आला असून, आरोपीला रविवारी नालासोपारा येथून अटक करण्यात आली.
आशिष शेलारांना दिली माहिती : वकील इरम सय्यद, रईस खान आणि आफरीन यांना जुलै 2024 पासून आतापर्यंत एका मोबाईल क्रमांकावरून कॉल येत आहेत. शर्मा अशी ओळख सांगून तो आमदार आशिष शेलार यांचा पीए तसेच मंत्रालयीन कार्यालयातील सेक्रेटरी असल्याची बतावणी करत आहे. काही आरोपींना मुक्त करण्यासाठी सरकारतर्फे योजना बनवली जात आहे. त्यासाठी हायकोर्टात प्रलंबित असलेल्या आरोपींच्या केसेसची आणि त्यांच्या नातेवाईकांची माहिती हा संबंधित शर्मा वकिलांकडं मागत आहे, अशी माहिती वकील विजेंद्र राय, वकील यास्मिन वानखेडे यांनी आशिष शेलार यांना दिली.
कसा करायचा फसवणूक? : पोलिसांनी दिलेल्या माहितीनुसार, वरील वकिलांकडून शर्मा असे आडनाव सांगून आरोपी आमिर यानं वकिलांचे क्लाइंट असलेल्या आरोपींचे तसेच त्यांच्या नातेवाईकांची माहिती आणि संपर्क क्रमांक घेतला. या वकिलांना त्याने जेलमध्ये बंदिवान असलेल्या आरोपींना मुक्त करण्यासाठी सरकार योजना बनवत असून तुमचा क्लाइंट असलेल्या आरोपीला मुक्त करणार असल्याची बतावणी करून आरोपीची माहिती घेतली. आरोपीच्या नातेवाईकांची माहिती मिळाल्यानंतर आरोपीने जेलमध्ये बंद असलेल्या एका आरोपीच्या नातेवाईकाला फोन करून, तो पडून जखमी झाला असल्यानं उपचाराकरिता रुग्णालयात दाखल करण्यासाठी पैशाची गरज असल्याचे सांगून आठ हजार रुपये उकळले.
आठ हजार रु. उकळले : त्यामुळे इतर वकिलांची आणि आरोपींच्या नातेवाईकांची अशा प्रकारे फसवणूक होऊ शकते. म्हणून वकिलांनी आशिष शेलार यांना याबाबत माहिती दिली. अधिक माहिती अशी की, वकिलांचा आरोपीने केलेल्या बतावणीवर विश्वास बसावा म्हणून आरोपीने हुबेहूब आशिष शेलार यांचा आवाज काढून स्वतः ते बोलत असल्याचे भासवून वकिलांना आरोपींची माहिती देण्यास भाग पाडले. वकील आफरीन यांचा क्लाइंट असलेल्या आरोपीची आणि त्याच्या नातेवाईकांची माहिती घेतली. नंतर आरोपीच्या नातेवाईकाला फोन करून आरोपी कारागृहात पडल्याने त्याच्या उपचाराकरता रुग्णालयात दाखल करण्यासाठी पैशाची मागणी करून आठ हजार रुपये उकळले.
हेही वाचा - जरांगे राजकीय भूमिका मांडाल तर खबरदार; आशिष शेलार यांचा थेट इशारा - Ashish Shelar On Jarange Patil
