घाटकोपर होर्डिंग प्रकरण: फरार आरोपी जान्हवी मराठेसह आणखी एकास गोव्यातून अटक - Ghatkopar Hoarding Case

Ghatkopar Hoarding Case : मुंबईतील घाटकोपर होर्डिंग प्रकरणातील फरार आरोपी जान्हवी मराठे हिला गोव्यातून आज (8 जून) गुन्हे शाखेच्या विशेष तपास पथकानं अटक केली आहे. जान्हवी मराठे उर्फ जान्हवी सोनाळकर हिच्यासोबत सागर पाटील याला देखील गोव्याहून मुंबई पोलिसांनी बेड्या ठोकल्या आहेत. सत्र न्यायालयाने अटकपूर्व जामीन फेटाळल्यानंतर जान्हवी मराठे फरार झाली होती आणि तपास पथकाच्या रडारवर होती.

मुंबई Ghatkopar Hoarding Case : गुन्हे शाखेच्या रडारवर असलेली जान्हवी मराठे ही तिचा साथीदार सागर पाटीलसोबत गोव्यात हॉटेलमध्ये लपून बसली होती. मात्र, पोलीस तिचा माग काढतच होते. पोलिसांची चाहूल लागताच मराठे हॉटेल वारंवार बदलत होती. अखेर आज जान्हवी मराठे पोलिसांच्या जाळ्यात आपल्या साथीदारासोबत अडकली. पोलिसांचे पथक या दोन्ही आरोपींना गोव्याहून मुंबईत घेऊन येत असून उद्या कोर्टात दोघांना हजर केले जाणार आहे.

सागरला दिले होते बांधकामाचे कंत्राट : घाटकोपर होर्डिंग प्रकरणातील जान्हवी मराठे ही तिसरी आणि सागर पाटील हा चौथा आरोपी आहे. याआधी मुख्य आरोपी भावेश भिंडे याला अटक करण्यात आली होती. नंतर पालिकेचा अभियंता मनोज संघू याला अटक करण्यात आली. हे दोघे देखील न्यायालयीन कोठडीत आहेत. जान्हवी मराठे इगो मीडिया प्रायव्हेट लिमिटेडची संचालिका असताना घाटकोपर होर्डिंगबाबत सर्व कागदपत्र तयार करून परवानगी मिळवण्यात आली होती. त्यानंतर मराठे हिच्या सांगण्यावरून होर्डिंगच्या बांधकामाचे कंत्राट सागर पाटील याला देण्यात आले होते.

मराठेचा जामीन अर्ज न्यायालयाने फेटाळला: घाटकोपर होर्डिंग दुर्घटनेप्रकरणी इगो मीडिया प्रायव्हेट लिमिटेड कंपनीची माजी संचालिका जान्हवी मराठेचा अटकपूर्व जामीन अर्ज सत्र न्यायालयाने फेटाळल्यानंतर तिला अटक करण्यात आहे. तसेच महापालिकेचे अधिकारी आणि जीआरपीच्या लिपिकांना चौकशीला बोलावणार असल्याची माहिती गुन्हे शाखेचे सहपोलीस आयुक्त लखमी गौतम यांनी दिली होती. तसेच जीआरपीचे एसीपी शहाजी निकम यांची देखील दोन दिवस चौकशी करण्यात आली आहे.