T20 World Cup 2024 NZ vs AFG : टी-20 विश्वचषक 2024 च्या 14 व्या सामन्यात अफगाणिस्तान आणि न्यूझीलंडचे संघ आमनेसामने होते. या सामन्यात अफगाणिस्ताननं न्यूझीलंडचा 84 धावांच्या मोठ्या फरकानं पराभव केलाय. कर्णधार राशीद खान, फजल हक फारुकी आणि रहमानउल्ला गुरबाज यांनी अफगाणिस्तानला विजय मिळवून देण्यात महत्त्वपूर्ण योगदान दिलं. गयाना प्रोव्हिडन्स स्टेडियमवर खेळल्या गेलेल्या या सामन्यात अफगाणिस्ताननं प्रथम फलंदाजी करताना 20 षटकात 6 गडी गमावून 159 धावा केल्या. रहमानउल्ला गुरबाजनं संघासाठी सर्वात मोठी खेळी केली. त्यानं 56 चेंडूत 5 चौकार आणि 5 षटकारांच्या मदतीनं 80 धावा केल्या.
न्यूझीलंडनं नाणेफेक जिंकून गोलंदाजी करण्याचा निर्णय घेतला, ही त्यांची सर्वात मोठी चूक ठरली. प्रथम फलंदाजी करताना रहमानउल्ला गुरबाज आणि इब्राहिम झद्रान यांनी अफगाणिस्तानला चांगली सुरुवात करुन दिली. या दोघांनी पहिल्या विकेटसाठी 103 धावांची (87 चेंडू) भागीदारी केली. ज्यामुळं संघाला चांगली धावसंख्या उभारता आली. त्यानंतर लक्ष्याचा पाठलाग करताना किवी संघ 15.2 षटकात अवघ्या 75 धावांवर सर्वबाद झाला.
अफगाणिस्तानची धडाकेबाज फलंदाजी : अफगाणिस्तानसाठी रहमानुल्ला गुरबाज आणि इब्राहिम झद्रान सलामीला आले. या दोघांनी पहिल्या विकेटसाठी चांगली भागीदारी केली आणि 87 चेंडूत 103 धावा केल्या. ही भागीदारी 15 व्या षटकाच्या तिसऱ्या चेंडूवर संपुष्टात आली. इब्राहिम झद्रान 41 चेंडूत 3 चौकार आणि 2 षटकारांच्या मदतीनं 44 धावा काढून बाद झाला. त्यानंतर 17व्या षटकाच्या शेवटच्या चेंडूवर अजमतुल्ला उमरझाईच्या रुपानं संघाला दुसरा धक्का बसला. उमरझाईनं 13 चेंडूत 1 चौकार आणि 2 षटकारांच्या मदतीनं 22 धावांची खेळी केली. त्यानंतर 18व्या षटकात गोल्डन डकवर पॅव्हेलियनमध्ये परतलेल्या मोहम्मद नबीच्या रुपानं संघानं तिसरी विकेट गमावली. यानंतर संघाला 20 व्या षटकाच्या पहिल्या चेंडूवर राशीद खानच्या रुपानं चौथा धक्का बसला. राशीदला 5 चेंडूत 1 चौकाराच्या मदतीनं 6 धावा करता आल्या. त्यानंतर पुढच्याच चेंडूवर रहमानउल्ला गुरबाज 80 धावांवर बाद झाला.
न्यूझीलंडची खराब फलंदाजी : 160 धावांच्या लक्ष्याचा पाठलाग करताना न्यूझीलंडची सुरुवात खूपच खराब झाली. डावाच्या पहिल्याच चेंडूवर संघाला पहिला धक्का बसला. फझलहक फारुकीनं फिन ऍलनला बोल्ड करुन गोल्डन डकवर पॅव्हेलियनमध्ये पाठवलं. त्यानंतर किवी संघानं तिसऱ्या षटकाच्या चौथ्या चेंडूवर डेव्हॉन कॉनवेच्या रुपानं दुसरी विकेट गमावली. कॉनवेनं 10 चेंडूत 1 चौकाराच्या मदतीनं 8 धावा केल्या. यानंतर संघाला चौथा धक्का डॅरिल मिशेलच्या रुपानं बसला. मिशेलला 5 चेंडूत 1 चौकार मारुन केवळ 5 धावा करता आल्या. त्यानंतर 7व्या षटकाच्या पहिल्या चेंडूवर केन विल्यमसनच्या रुपानं संघानं चौथी विकेट गमावली. त्यानंतर मार्क चॅम्पमन 9व्या षटकाच्या पहिल्या चेंडूवर बाद झाला. त्यानंतर 10व्या षटकाच्या चौथ्या चेंडूवर न्यूझीलंडला सातवा धक्का ग्लेन फिलिप्सच्या रुपानं बसला. यानंतर किवी संघानं मिचेल सँटनरच्या (04) रुपानं 8वी विकेट गमावली. त्यानंतर संघाची नववी विकेट 13व्या षटकाच्या शेवटच्या चेंडूवर लॉकी फर्ग्युसननं आणि दहावी विकेट 16व्या षटकाच्या दुसऱ्या चेंडूवर गेली. फर्ग्युसननं 2 धावा आणि हेन्रीनं 17 चेंडूत 1 षटकाराच्या मदतीनं 12 धावा केल्या.
दोन्ही संघ
- न्यूझीलंडचा संघ : फिन ऍलन, डेव्हॉन कॉनवे (यष्टीरक्षक), केन विल्यमसन (कर्णधार), डॅरिल मिशेल, ग्लेन फिलिप्स, मार्क चॅपमन, मायकेल ब्रेसवेल, मिचेल सँटनर, मॅट हेन्री, ट्रेंट बोल्ट, लॉकी फर्ग्युसन.
- अफगाणिस्तानचा संघ: रहमानउल्ला गुरबाज (यष्टीरक्षक), इब्राहिम जद्रान, नजीबुल्ला झद्रान, मोहम्मद नबी, गुलबदिन नायब, अजमतुल्ला उमरझाई, राशीद खान (कर्णधार), करीम जनात, नूर अहमद, नवीन-उल-हक, फजलहक फारुकी.
हेही वाचा
- अमेरिकेतही नितीश कुमारांचाच दबदबा; भारताच्या कट्टर प्रतिस्पर्धी संघाचा केला पराभव - ICC T20 Worls Cup
- पाकिस्तानला पराभवाची धूळ चारणारा सौरभ नेत्रावलकर आहे तरी कोण? - Saurabh Netravalkar Biography
- सुनील छेत्रीचा आंतरराष्ट्रीय फुटबॉलला अलविदा! कारकीर्दीतील सुवर्ण क्षणांवर टाकूया एक नजर... - Sunil Chhetri Retirement
