मुंबई Ramakant Achrekar Memorial : महान फलंदाज सचिन तेंडुलकरचे प्रशिक्षक दिवंगत रमाकांत आचरेकर यांना मध्य मुंबईतील दादर येथील शिवाजी पार्कची विशेष आवड होती. हेच शिवाजी पार्क होतं जिथं आचरेकर यांनी केवळ तेंडुलकरलाच नव्हे तर प्रवीण आमरे, विनोद कांबळी आणि चंद्रकांत पंडित यांसारख्या इतर अनेक खेळाडूंना क्रिकेट प्रशिक्षण दिलं, ज्यांनी नंतर भारताचं प्रतिनिधित्व केलं. आता महाराष्ट्र सरकारनं द्रोणाचार्य पुरस्कार विजेत्या प्रशिक्षकांच्या स्मरणार्थ स्मारक बांधण्यास मान्यता दिली आहे. सर्वोत्तम प्रशिक्षकांपैकी एक असलेल्या आचरेकर यांचं 2 जानेवारी 2019 रोजी मुंबईत निधन झालं.
Achrekar Sir has had an immense impact on my life and several other lives. I am speaking on behalf of all his students.
— Sachin Tendulkar (@sachin_rt) August 29, 2024
His life revolved around cricket in Shivaji Park. Being at Shivaji Park forever is what he would have wished for.
I am very happy with the government’s… pic.twitter.com/NIyVeYOy56
काय आहे आदेशात : राज्य शासनाच्या नगरविकास विभागानं जारी केलेल्या शासकीय प्रस्तावानुसार, शिवाजी पार्कच्या गेट क्रमांक 5 इथं रमाकांत आचरेकर यांचं स्मारक बांधण्यास राज्य सरकारनं मान्यता दिली आहे. मुंबईच्या पालकमंत्र्यांच्या अध्यक्षतेखालील समितीनं स्मारकाच्या बांधकामाची शिफारस केली होती. या स्मारकाचं बांधकाम वेळेत पूर्ण करण्याची जबाबदारी बृहन्मुंबई महानगरपालिकेच्या (MCGM) आयुक्तांची असेल, असंही या जीआरमध्ये नमूद करण्यात आलं आहे. तसंच स्मारकाच्या आराखड्याला मंजुरी देताना एकही झाड तोडू नये आणि गरज पडल्यास संबंधित प्राधिकरणाची परवानगी घ्यावी लागेल, असंही त्यात म्हटलं आहे. पुतळ्याच्या देखभालीची जबाबदारी बी.व्ही.कामथ मेमोरियल क्लबची असेल आणि त्यासाठी महाराष्ट्र सरकारकडून वेगळा निधी दिला जाणार नाही, असंही या जीआरमध्ये स्पष्ट करण्यात आले आहे.
सचिन तेंडुलकरनं व्यक्त केला आनंद : भारताचा महान फलंदाज सचिन तेंडुलकरनं याबाबत सोशल मीडियावर पोस्ट केली आहे. तेंडुलकर म्हणाला, 'आचरेकर सरांचा माझ्या आणि इतर अनेकांच्या आयुष्यावर खूप प्रभाव आहे. मी त्यांच्या सर्व विद्यार्थ्यांच्या वतीनं बोलतो. त्यांचं आयुष्य शिवाजी पार्कमधील क्रिकेटभोवती फिरलं. शिवाजी पार्कमध्ये नेहमीच राहण्याची त्यांची इच्छा असायची. आचरेकर सरांचा पुतळा त्यांच्या जन्मस्थानी उभारण्याच्या सरकारच्या निर्णयामुळं मला खूप आनंद झाला आहे.'
कधीपर्यंत होणार स्मारक : शिवाजी पार्क जिमखान्याचे सहाय्यक सचिव सुनील रामचंद्रन यांनी 'ईटीव्ही भारत'सोबत बोलताना याबाबत सांगितलं की, "आचरेकर सरांच्या विद्यार्थ्यांना त्यांच्यासाठी शिवाजी पार्कमध्ये एक स्मारक बांधायचं होतं. जिथं त्यांनी आयुष्य घालवलं. ही माझीही इच्छा होती आणि महाराष्ट्र सरकारनं मंजूर केल्याचा मला आनंद आहे. या स्मारकासाठी महाराष्ट्र नवनिर्माण सेनेचे अध्यक्ष राज ठाकरे यांनी आम्हाला मदत केली." रामचंद्रन यांच्या मते, या स्मारकात दोन बॅट, एक चेंडू आणि आचरेकर सरांची आयकॉनिक कॅप असेल. तसंच आचरेकर सरांनी प्रशिक्षण घेतलेल्या सर्व 13 भारतीय खेळाडूंपैकी एक बॅटवर स्वाक्षरी करण्याचा आमचा प्रयत्न आहे. या वर्षी डिसेंबरपर्यंत स्मारक पूर्ण करण्याचा आमचा प्रयत्न असल्याचं सुनील रामचंद्रन यांनी सांगितलं.
निर्णयानं आनंद : या निर्णयावर आनंद व्यक्त करताना रमाकांत आचरेकर यांची मुलगी विशाखा आचरेकर-दळवी यांनी 'ईटीव्ही भारत'सोबत बोलताना सांगितलं की, "आम्ही सर्वजण याची वाट पाहत होतो. माझ्या वडिलांनी त्यांचं संपूर्ण आयुष्य शिवाजी पार्कमध्ये घालवलं आणि ते पहाटे 4 वाजता मैदानात (पार्क) जात असत. त्यांना फक्त देण्याची कला अवगत होती आणि त्यांनी आपलं संपूर्ण आयुष्य क्रिकेटला समर्पित केलं."
हेही वाचा :
