कोल्हापूर Sanjay Mandlik On Sharad Pawar : लोकसभा निवडणुकीच्या पार्श्वभूमीवर 'ईटीव्ही भारत'नं महायुतीचे उमेदवार संजय मंडलिक यांची खास मुलाखत घेतली. या मुलाखतीमध्ये संजय मंडलिक यांनी विविध मुद्द्यांवर भाष्य केलं. तसंच यावेळी त्यांनी राष्ट्रवादी काँग्रेस शरदचंद्र पवार गटाचे प्रमुख शरद पवार यांना ओपन चॅलेंजही दिलं.
काय म्हणाले संजय मंडलिक? : यावेळी बोलत असताना संजय मंडलिक म्हणाले, "केंद्रातील राष्ट्रीय लोकशाही आघाडी आणि राज्यातील महायुतीकडून राज्यातील सर्व लोकसभा जागांवर लक्ष केंद्रित केलं जातय. प्रत्येक जागा महायुतीसाठी महत्त्वाची आहे. तसंच देशाचे पंतप्रधान नरेंद्र मोदी राज्याचे मुख्यमंत्री एकनाथ शिंदे यांच्यासह मंत्रिमंडळातील अर्धा डझनहून अधिक मंत्री कोल्हापुरात मी आणि धैर्यशील माने निवडून यावेत यासाठी फिल्डिंग लावताय. केंद्र आणि राज्य सरकारनं केलेल्या विकास कामांच्या बळावर जनतेपर्यंत पोहोचण्याचं काम गेल्या पंधरा दिवसांपासून जोमानं केलं जातंय." तसंच अजूनही आठ दिवस बाकी असून या काळात जास्तीत जास्त लोकांपर्यंत पोहोचण्याचा प्रयत्न करणार असल्याचं मंडलिक यांनी सांगितलं.
शरद पवारांना दिलं ओपन चॅलेंज : सातारा लोकसभेचे महाविकास आघाडीचे उमेदवार शशिकांत शिंदे यांच्या प्रचारासाठी शरदचंद्र पवार राष्ट्रवादीचे प्रमुख शरद पवारांनी कंबर कसली आहे. तसंच शशिकांत शिंदे यांच्या प्रचारासाठी साताऱ्यात घेण्यात आलेल्या सभेत बोलत असताना शरद पवारांनी 'मान गादीला मत मात्र शेतकऱ्याला' असं आवाहन केलं होतं. यावरुन हे हेच वाक्य शरद पवार यांनी कोल्हापुरात येऊन म्हणावं, असं ओपन चॅलेंज संजय मंडलिक यांनी पवारांना दिलय.
मंडलिकांचं 'कोल्हापूर व्हिजन' : सध्या उद्योजकांना वीज दरवाढीचा फटका बसतोय. या वीज दरवाढीत सवलत मिळावी यासाठी केंद्र सरकारकडं पाठपुरावा करणार असल्याचं सांगत सौर ऊर्जेच्या माध्यमातून औद्योगिक वसाहतींना वीजपुरवठा कसा करता येईल याबाबत केंद्राशी पाठपुरावा करणार असल्याचं मंडलिकांनी सांगितलं. तसंच कोल्हापुरात आयटी पार्क व्हावा, कोल्हापुरात आंतरराष्ट्रीय दर्जाचं क्रीडा संकुल व्हावं यासाठी प्रयत्न करणार असल्याचं मंडलिक यांनी सांगितलं.
संभाजीराजे, सतेज पाटलांनी किती निधी दिला : कोल्हापूर विधान परिषद मतदार संघातून काँग्रेसचे जिल्हाध्यक्ष आमदार सतेज पाटील प्रतिनिधित्व करत आहेत. सतेज पाटील यांनी आतापर्यंत कागल आणि मुरगुडला किती निधी दिला, असा सवाल संजय मंडलिक यांनी यावेळी उपस्थित केला. तर राज्यसभेचे माजी खासदार संभाजीराजे यांनी आपल्या 6 वर्षांच्या खासदारकीमध्ये जिल्ह्यातील किती गड किल्ल्यांचा विकास केला? याचं उत्तर द्यावं. तसंच आम्ही संभाजीराजेंना प्रश्न विचारल्यावर तो गादीचा अपमान कसा काय ठरतो? असंही मंडलिक म्हणाले.
हेही वाचा -
- 'गादी विरुद्ध मोदी'! प्रचाराचा धुरळा, कोल्हापुरात कुणाची हवा? सोशल मीडियावर रंगलं 'वॉर' - Lok Sabha Election 2024
- महायुतीचे शक्ती प्रदर्शन; मुख्यमंत्री, उपमुख्यमंत्र्यांच्या उपस्थितीत संजय मंडलिक, धैर्यशील माने यांनी भरला उमेदवारी अर्ज - Lok Sabha Election 2024
- "शाहू महाराज खरे वारसदार नाहीत"; संजय मंडलिक यांच्या वादग्रस्त वक्तव्याचा सतेज पाटलांनी घेतला समाचार - lok sabha election 2024
