मुंबई State Cabinet Meeting : अठराव्या लोकसभा निवडणुकीच्या (Lok Sabha Election 2024) आचारसंहितेची घोषणा कधीही होऊ शकते. अशा परिस्थितीमध्ये लोकसभा निवडणुकीसाठी जागा वाटपाचा तिढा हा ना महाविकास आघाडीत सुटत आहे, ना महायुतीमध्ये. आज झालेल्या राज्य मंत्रिमंडळाच्या बैठकीत सुद्धा जागा वाटपाबाबत (Lok Sabha Seat Sharing) महायुतीच्या नेत्यांमध्ये चर्चा झाल्याची माहिती सूत्रांकडून मिळाली आहे. त्यासोबत जागावाटप लवकरच घोषित होईल. परंतु महायुतीत जो उमेदवार असेल त्यासाठी काम करावंच लागेल असा सज्जड दम उपमुख्यमंत्री अजित पवार (Ajit Pawar) यांनी महायुतीच्या नेत्यांना दिलाय.
जागा वाटपाचा विषय छेडत नाराजी व्यक्त : देशात 'अबकी बार ४०० पार' आणि राज्यात ४५ पार अशी घोषणा भाजपानं दिल्यानं राज्यात भाजपा सर्वाधिक जागा लढवणार आहे, हे सर्वश्रुत आहे. परंतु अशा परिस्थितीत शिंदे गट त्याचबरोबर अजित पवार गटाला मोजक्यात जागा भाजपाकडून देण्यात येत आहेत. यावरून मंत्रिमंडळ बैठकीत काही नेत्यांनी हा विषय छेडत नाराजी व्यक्त केलीय. यावर मुख्यमंत्री एकनाथ शिंदे (CM Eknath Shinde) त्याचबरोबर उपमुख्यमंत्री अजित पवार यांनी लोकसभा जागावाटप संदर्भात लवकरच अंतिम निर्णय घेणार आहेत. तुम्ही थोडा धीर धरा असा सल्ला मंत्रिमंडळातील सर्व सहकाऱ्यांना दिला. तर महायुतीकडून जो उमेदवार दिला जाईल त्या उमेदवारासाठी प्रत्येकाला काम करावंच लागेल, असा सज्जड दम उपमुख्यमंत्री अजित पवार यांनी सर्व सहकाऱ्यांना दिलाय.
किती दिवस जागा वाटपाचे घोंगडं भिजत ठेवायचं? : विशेष म्हणजे आज मंत्रिमंडळ बैठकीनंतर मुख्यमंत्री, दोन्ही उपमुख्यमंत्री तसेच भाजपाचे आणि राष्ट्रवादी अजित पवार गटाचे काही नेते दिल्लीत भाजपासोबत जागा वाटपा संदर्भात होणाऱ्या बैठकीसाठी जाणार होते. परंतु आज अचानक ही बैठक रद्द करण्यात आल्यानं मंत्रिमंडळातील अनेक नेते नाराज झाले. निवडणुका तोंडावर आल्या असताना अजून किती दिवस जागा वाटपाचं घोंगडं भिजत ठेवायचं? असाही मुद्दा अनेकांनी उपस्थित केला. या मुद्द्यावर बोलताना एकनाथ शिंदे गटाचे प्रवक्ते ॲड. वैजनाथ वाघमारे म्हणाले की, महायुतीत जागा वाटपावरून कुठलेही मतभेद नाही. लवकरच याबाबत योग्य तो निर्णय घेतला जाईल. महायुतीच्या लोकांच्या मनामध्ये याबाबत संभ्रम असण्याचं काही कारण नाही. हा तिढा लवकरच सोडवला जाईल. परंतु एकनाथ शिंदे शिवसेनेला जागा वाटपात १८ जागा भेटायलाच हव्यात. २०१९ च्या लोकसभा निवडणुकीत आम्ही २२ जागा लढवल्या होत्या आणि त्यापैकी १८ जागांवर विजय प्राप्त केला होता. यंदा त्या १८ जागा आम्हाला भेटायलाच हव्यात.
हेही वाचा -
