महायुतीच्या वेगळ्या जाहीरनाम्याची शक्यता नाही; मंत्री दीपक केसरकर यांची माहिती - Lok Sabha Election 2024

Lok Sabha Election 2024 : लोकसभा निवडणुकांच्या पहिल्या टप्प्यातील मतदान शुक्रवारी होत आहे. तर अद्याप राज्यात महायुतीचा जाहीरनामा जाहीर झालेला नाही. आता महायुतीचा वेगळा जाहीरनामा प्रसिद्ध होण्याची शक्यता नसल्याचे संकेत महायुतीचे नेते आणि मंत्री दीपक केसरकर (Deepak Kesarkar) यांनी आज मुंबईत दिले. भाजपाचा जाहीरनामा (BJP Manifesto) हाच महायुतीचा जाहीरनामा असल्याचं त्यांनी स्पष्ट केलंय. तर शरद पवारांच्या दुटप्पी भूमिकेबाबत त्यांनी यावेळी जोरदार टीका केली.

मुंबई Lok Sabha Election 2024 : लोकसभा निवडणुकांच्या पहिल्या टप्प्यात शुक्रवारी पाच लोकसभा मतदारसंघांमध्ये मतदान होणार आहे. मात्र, असं असलं तरी महायुतीतील घटक पक्ष असलेल्या शिवसेनेचे नेते आणि मंत्री दीपक केसरकर (Deepak Kesarkar) यांनी अद्याप आम्ही प्रचाराला सुरुवातच केली नसल्याचं पत्रकार परिषदेत म्हटलंय. तर यावेळी बोलताना त्यांनी महायुतीमध्ये कोणताही जागा वाटपाचा तिढा नसल्याचं स्पष्ट केलंय.

शरद पवारांची दुटप्पी भूमिका : राष्ट्रवादी काँग्रेसचे नेते शरद पवार यांनी 2014 मध्ये भाजपाला बिनशर्त पाठिंबा दिला होता. त्यानंतर त्यांनी 2019 मध्ये जर शिवसेनासोबत असेल तर आम्ही येणार नाही अशी आदी भूमिका घेतली होती. शिवसेना संपवून राष्ट्रवादी काँग्रेस वाढवण्याचा शरद पवार यांचा प्रयत्न सातत्यानं दिसून आला आहे. त्यामुळं अजित पवार यांना व्हिलन ठरवून शरद पवार यांच्या भूमिकेला सहानुभूती देण्यात काहीही अर्थ नाही. शरद पवार यांनी नेहमीच दुटप्पी भूमिका घेतली आहे आणि त्यांनी जाणून-बुजून शिवसेना संपवण्याचा प्रयत्न केला आहे. अजित पवार यांच्या भूमिकेचं समर्थन करताना आणि त्यांना मतदारांनी कशी मदत केली पाहिजे, असं आवाहन करताना त्यांनी आपली भूमिका मांडली आहे.

शिवसेना बॅकफूटवर नाही : शिवसेनेने पालघर, ठाणे आणि नाशिक, रत्नागिरी सिंधुदुर्ग या जागांवर दावा सांगितला आहे. मात्र, यापैकी रत्नागिरी-सिंधुदुर्गची जागा भाजपाचे उमेदवार नारायण राणे यांना जाहीर करण्यात आली आहे. पालघर आणि नाशिकमध्येही भारतीय जनता पक्षाकडं उमेदवारी जाण्याची शक्यता आहे. या निमित्तानं शिवसेना बॅक फुटवर गेली आहे का? असं विचारलं असता केसरकर म्हणाले की, जागा वाटपामध्ये बॅलन्स साधावा लागतो. काही जागा मागेपुढे होतात याचा अर्थ आम्ही बॅक फुटवर गेलो असा होत नाही, असं सांगून त्यांनी सारवासारव करण्याचा प्रयत्न केलाय.

महायुतीचा राज्यात वेगळा जाहीरनामा नाही : पहिल्या टप्प्यातील निवडणुका होत असतानाही अद्याप महायुतीचा जाहीरनामा प्रसिद्ध झाला नसल्याबद्दल विचारलं असता केसरकर म्हणाले की, भाजपा हा आमचा मोठा भाऊ आहे आणि भाजपाचा जाहीरनामा प्रसिद्ध झालाय. ही निवडणूक देशाची आणि नरेंद्र मोदी यांच्यासाठीची आहे. मोदींनी केलेल्या विकास कामांमुळं आता परदेशामध्ये भारतीयांची मान उंचावत असल्याचं त्यांनी यावेळी सांगितलं. त्यामुळं महायुती राज्यात वेगळा जाहीरनामा प्रसिद्ध करणार नाही याचे संकेतच त्यांनी यावेळी बोलताना दिले.

केसरकर म्हणतात, शेतकऱ्यांना बँक खाते कळतच नाही : राज्य सरकारनं शेतकऱ्यांना थेट त्यांच्या खात्यामध्ये पैसे पाठवण्याची सोय केली आहे. शेतकऱ्यांना दुधाच्या फरकाचे पैसे सरकारकडून त्यांच्या खात्यामध्ये पाठवलं जात आहेत. मात्र, शेतकऱ्यांना ते कळतच नाही खात्यात पैसे कसले येत आहेत. तसेच कांद्याच्या अनुदानाचे पैसेही शेतकऱ्यांच्या खात्यात थेट जात आहेत. मात्र, शेतकऱ्यांना हे पैसे कशाबद्दल येत आहेत हे कळत नाही, शेतकऱ्यांना खात्यात आलेले पैसे कळत नसल्याची अजब माहिती केसरकर यांनी यावेळी बोलताना दिली.

हेही वाचा -