शरद पवार महायुतीला धक्का देण्याच्या तयारीत? भाजपा नेते संजय काकडे पवारांच्या भेटीला - Sanjay kakade Meet Sharad Pawar

Sanjay kakade Meet Sharad Pawar : आगामी विधानसभा निवडणुकीच्या तयारीला राज्यातील राजकारणी लागले आहेत. पुण्यात राजकीय हालचालींना वेग आला आहे. भाजपाचे नेते संजय काकडे यांनी शरद पवार यांची भेट घेतली आहे. शरद पवारांच्या निवासस्थानी ही भेट झाल्यानं चर्चांना उधाण आलं आहे.

पुणे Sanjay kakade Meet Sharad Pawar : राज्यात दोन ते तीन महिन्यांमध्ये विधानसभा निवडणूक होणार असून या निवडणुकीसाठी सर्वच पक्षांनी तयारी सुरू केली आहे. राज्यात महाविकास आघाडी विरुद्ध महायुती अशी लढत होणार आहे. लोकसभेत महाविकास आघाडीला मिळालेलं यश पाहता विविध पक्षातील नेते हे राष्ट्रवादी काँग्रेस पक्षाचे अध्यक्ष शरद पवार यांची भेट घेत आहेत. आज प्रहार संघटनेचे अध्यक्ष आमदार बच्चू कडू यांनी शरद पवारांची भेट घेतली. तर दुसरीकडे भाजपा नेते संजय काकडे यांनी देखील शरद पवारांची भेट घेतली आहे. या भेटीमुळे राजकीय वर्तुळात चर्चांना उधाण आलं आहे.

भेटीनंतर संजय काकडे काय म्हणाले : आजच्या बैठकीबाबत संजय काकडे यांना विचारलं असता ते म्हणाले, "माझे मित्र शंकर पवार यांचं वैयक्तिक काम होतं त्यासाठी मी याठिकाणी आलो होतो. या भेटीत कोणतीही राजकीय चर्चा झाली नसून या भेटीत वैयक्तिक कामाबाबत चर्चा झाली. माझ्या पक्षातील लोकांना माझावर विश्वास आहे. मला पक्षांनं याबाबत प्रश्न विचारल्यास मी त्यांना उत्तर देईल."

बच्चू कडू कोणत्याही पक्षात जाणार नाहीत : बच्चू कडू यांनी शरद पवारांची भेट घेतली यावर बोलताना संजय काकडे म्हणाले, "बच्चू कडू गेले वीस वर्ष माझे चांगले मित्र आहेत. त्यांनी शरद पवारांची भेट घेतलीय. मात्र, ते कोणत्याही पक्षात जाण्याची रिस्क घेणार नाहीत. त्यांचा स्वतंत्र पक्ष आहे. दोन आमदार त्यांचे आहेत. येत्या काळात त्यांच्या पक्षाचे दोन ते तीन आमदार सहज होऊ शकतात."

विधानसभा निवडणुकीबाबत प्रतिक्रिया : आगामी विधानसभा निवडणुकीबाबत संजय काकडे यांना विचारलं असता ते म्हणाले, "आमचा पक्ष भारतातला मोठा पक्ष आहे. भाजपाचे जे आमदार पुण्यात आहेत ते राहतीलच. तसेच ज्यांची निवडून येण्याची पात्रता नसेल तर त्यांची अदलाबदली होऊ शकते. पाच जागा आमच्या आहेत या जागा हलणार नाहीत. कसबा, वडगावशेरी, हडपसर या जागांबाबत फेरविचार होऊ शकतो."

हेही वाचा