Aloe Vera Gel Benefits For Skin: त्वचेचं सौंदर्य टिकून रहावं यासाठी बाजारात अनेक सौंदर्य प्रसाधनं उपलब्ध आहेत. मात्र, ते रासायनिक घटकांपासून तयार होत असल्यामुळे त्वचेसाठी अपायकारक ठरू शकतात. त्या ऐवजी घरगुती साधनं आणि वनस्पतिंचा उपयोग करण्याचा सल्ला अनेक ब्युटिशियन देतात. त्या साधनांपैकी त्वचा टवटवीत ठेवणाऱ्या एका वनस्पती बाबत आम्ही तुम्हाला सांगणार आहोत.
तेलकट, कोरडी आणि संवेदनशील त्वचेवर ब्युटी प्रोडक्ट्सचा विपरीत परिणाम होण्याची दाट शक्यता असते. मात्र, कोरफड या वनस्पतीचा गर अशा त्वचेला फायद्याचा ठरू शकते. त्याचा वापर जाणून घेऊया.
चमकणाऱ्या चेहऱ्यासाठी : चमकणाऱ्या चेहऱ्यासाठी चिमूटभर हळद, एक चमचा दूध, थोडं गुलाबजल आणि एक चमचा मध घेऊन ते चांगलं मिक्स करून घ्या. त्यानंतर या मिश्रणात कोरफडचा लगदा घाला आणि परत मिक्स करा. त्यानंतर ते चेहऱ्यावर आणि मानेवर लावा आणि वीस मिनिटे तसंच राहू द्या. ब्युटीशियनच्या मते, यामुळे तुमचा चेहरा मुलायम आणि चमकदार दिसेल.
तेलकट त्वचेसाठी: तेलकट त्वचा असलेल्या लोकांना मुरुमांचा त्रास होतो. अशा लोकांनी कोरफडीची पाने पाण्यात थोडा वेळ उकळून त्याचा पेस्ट तयार करावा. पेस्टमध्ये मधाचे काही थेंब टाकून चेहऱ्यावर लावा. पंधरा मिनिटांनी थंड पाण्यानं स्वच्छ धुवा. आठवड्यातून एक दिवस हे केल्यानं चांगले परिणाम मिळतील, असं तज्ज्ञांचं म्हणणे आहे.
मुरुमांवर परिणाम: मुरुम ही मुलींसाठी सर्वात मोठी समस्या आहे. पिंपल्स होण्याची चिंता त्यांना नेहमी सतावत असते. पिंपल्सचे डागसुद्धा चेहरा खराब करतात. तज्ज्ञांच्या मते, हे कमी करण्यासाठी कोरफड उत्तम पर्याय आहे. ज्या ठिकाणी मुरुमांची समस्या असेल अशा ठिकाणी एलोवेरा पल्पमध्ये गुलाब जलाचे दोन थेंब मिसळून चेहऱ्याला लावावं. यामुळे त्वचेला पोषण आणि आराम मिळते.
डागांवर उपयुक्त : जखमांमुळे त्वचेवर पडलेल्या डागांपासून सुटका मिळवण्यासाठीही कोरफडीचा लगदा उपयुक्त असल्याचं तज्ज्ञांचं म्हणणे आहे. यासाठी कोरफडीच्या लगद्यामध्ये थोडे गुलाबजल टाकून चांगले मिसळा. हे मिश्रण शरीरावरील डागांवर लावावे आणि 20 मिनिटे ठेवावे, त्यानंतर ते थंड पाण्याने स्वच्छ धुवावे.
कोरड्या त्वचेवर: कोरडी त्वचा निस्तेज दिसते. त्वचेतील आर्द्रता कमी होणे हे त्यामागील कारण असल्याचं तज्ज्ञांचं म्हणणे आहे. जर तुम्हाला स्किनचा मॉइश्चर लेव्हल वाढवायचा असेल, तर ऑलिव्ह ऑइल कोरफडीच्या लगद्यामध्ये घालून त्याचा पेस्ट बनवा. हे मिश्रण चेहऱ्यासह मानेवर लावा. वीस मिनिटांनी थंड पाण्यानं स्वच्छ धुतल्यावर त्याचा परिणाम मिळेल, असं तज्ज्ञांचं म्हणणे आहे.
टॅनिंगवर एक उत्तम पर्याय: त्वचेवर टॅन होणे खूप सामान्य आहे. थोडा कोरफडाचा लगदा घ्या आणि त्यात एक चमचा हळद आणि लिंबाचा रस घाला आणि चांगलं मिसळा. नंतर टॅनिंग पडलेल्या भागावर हे मिश्रण लावा. दहा मिनिटांनी स्वच्छ धुवा. यामुळे टॅन तर कमी होतेच, पण चेहऱ्यावरील मुरुमेही कमी होतात, असं तज्ज्ञांचं म्हणणे आहे.
(डिस्क्लेमर: ही सामान्य माहिती केवळ वाचनासाठी दिलेली आहे. ईटीव्ही भारत या माहितीच्या वैज्ञानिक मान्यतेबाबत कोणतीही पुष्टी करत नाही. अधिक माहितीसीठी डॉक्टरांकडून सल्ला घ्यावा.)
