मुंबई - अल्लू अर्जुनच्या 'पुष्पा २: द रुल'ची आतुरतेने वाट पाहणाऱ्या चाहत्यांसाठी मोठी बातमी आहे. मैत्री मुव्हीज मेकर्सनं चित्रपटाचे नवीन गाणे 'किसीक' चा प्रोमो रिलीज केला आहे. या गाण्यात आयकॉन स्टार अल्लू अर्जुन आणि श्रीलीला यांचा जबरदस्त परफॉर्मन्स पाहायला मिळणार आहे. रिलीज होण्यापूर्वीच या गाण्यानं इंटरनेटवर खळबळ उडवून दिली आहे.
गाण्याचा प्रोमो रिलीज करताना, मैत्री मुव्हीज मेकर्सने लिहिले की, "आयकॉन स्टारची सिझलिंग केमिस्ट्री तुम्हाला थक्क करेल." 'किसिक'ने देवी श्री प्रसाद यांनी संगीतबद्ध केलेल्या हाय एनर्जीच्या डान्स मूव्ह आणि आकर्षक साउंडट्रॅकसाठी आधीच चर्चेत आलं आहे. या गाण्याला चाहत्यांचा उदंड प्रतिसाद मिळत आहे, चाहत्यांचे म्हणणे आहे की अल्लू अर्जुन आणि श्रीलीला यांच्या जोडीने गाण्याला जीवदान दिलं आहे.
यापूर्वी 'पुष्पा 2' मधील 'अंगारों से लगता है मेरा स्वामी' हे गाणं रिलीज करण्यात आलं होतं. या गाण्यामुळं चाहत्यांना वेड लागणं केवळ बाकी राहिलं होतं. या गाण्याचे लाखो रील्स सोशल मीडियावर तयार झाले आहेत. या गाण्यात अल्लू अर्जुन आणि रश्मिका मंदान्ना यांची जबरदस्त केमेस्ट्री पाहायला मिळाली होती. यातील गाण्याच्या हुक स्टेप्स अनेकांना नाचायला प्रवृत्त करतात. त्यामुळे या चित्रपटातील पुढील किसिक या आयटम साँगकडे चाहत्यांसह तमाम लोकांचं लक्ष लागून राहिलंय.
'पुष्पा' फ्रँचायझीचा पहिला भाग ब्लॉकबस्टर ठरला होता आणि आता 'पुष्पा २: द रुल'कडून प्रेक्षकांच्या अपेक्षाही गगनाला भिडल्या आहेत. 'किसिक' हे गाणे चित्रपटाचे खास आकर्षण मानले जात असून, ते नक्कीच चार्टबस्टर ठरणार आहे. किसिक गाणे उद्या 24 नोव्हेंबर रोजी संध्याकाळी 7.02 वाजता रिलीज होणार आहे.
सुकुमार दिग्दर्शित या चित्रपटात अल्लू अर्जुन व्यतिरिक्त रश्मिका मंदान्ना आणि फहद फासिल देखील मुख्य भूमिकेत आहेत. मैत्री मुव्हीज मेकर्स आणि सुकुमार रायटिंग्ज या बॅनरखाली या चित्रपटाची निर्मिती करण्यात आली आहे, तर संगीत T-Series ने सांभाळले आहे.
