ज्येष्ठ गायिका उषा उथुप यांनी पद्मभूषण पुरस्कार मिळाल्याबद्दल केला आनंद व्यक्त - Usha Uthup

Usha Uthup Padma Bhushan: ज्येष्ठ गायिका उषा उथुप यांनी पद्मभूषण पुरस्कार मिळाल्याबद्दल आनंद व्यक्त केला. 22 एप्रिल रोजी त्यांना पद्मभूषण पुरस्कारानं सन्मानित करण्यात आलं.

मुंबई - Usha Uthup Padma Bhushan : राष्ट्रपती द्रौपदी मुर्मू यांनी सोमवारी 22 एप्रिल रोजी राष्ट्रपती भवनात एका समारंभात ज्येष्ठ गायिका उषा उथुप यांना कला क्षेत्रातील पद्मभूषण देऊन सन्मानित केलं. उषा उथुप यांनी प्रतिष्ठित पद्मभूषण पुरस्कार मिळाल्याबद्दल आनंद व्यक्त केला आहे. उषा यांनी एका मुलाखतीदरम्यान सांगितलं, "मी खूप आनंदी आहे, माझ्या डोळ्यात अश्रू दिसत आहेत तुम्ही सर्व पाहू शकता. माझ्यासाठी हा माझ्या आयुष्यातील सर्वात मोठा क्षण आहे. देशाकडून आणि अर्थातच आपल्या सरकारकडून यापेक्षा आणखी काय मागता येईल?"

उषा उथुप यांनी व्यक्त केल्या भावना : पुरस्काराचं महत्त्व सांगताना उषा यांनी म्हटलं, "मला खूप छान वाटलं, कारण तुम्ही शास्त्रीय गायक असाल किंवा शास्त्रीय नृत्यांगना असाल आणि तुमच्या कलेत तुम्ही प्रविण असल्यास तुम्हाला अखेरीस पुरस्कार मिळणं स्वाभाविक आहे. लोकांसाठी आम्ही सामान्य माणसं आहोत, त्यामुळे पद्म पुरस्कारासाठी निवड होणं ही खूप मोठी गोष्ट आहे. माझा फक्त शांतता आणि बंधुभावावर विश्वास आहे. माझ्या संगीताद्वारे त्यांना हसवणं, एवढंच मला स्वारस्य आहे." पाच दशकांच्या कारकिर्दीत उषा उथुपनं 'रंबा हो हो', 'कोई यहाँ', 'एक तो चा चा चा' 'हरी ओम हरी'आणि 'डार्लिंग' यांसारख्या हिट गाण्यांनी प्रेक्षकांचे मनोरंजन केले आहेत.

पद्म पुरस्कारांची घोषणा करण्यात आली : उषा यांनी अनोख्या आणि दमदार आवाजामुळे संगीत जगतात एक वेगळे स्थान निर्माण केलं आहे. याशिवाय त्यांनी काही चित्रपटातही काम केलं आहे.75 व्या प्रजासत्ताक दिनाच्या पूर्वसंध्येला पद्म पुरस्कारांची घोषणा करण्यात आली होती. अभिनेता, राजकारणी मिथुन चक्रवर्ती आणि संगीतकार प्यारेलाल शर्मा यांनाही पद्मभूषण पुरस्कारानं सन्मानित करण्यात आलं आहे. दरम्यान उषा यांच्या वर्कफ्रंटबद्दल बोलायचं झालं तर अगदी पॉप आणि रॉकपर्यंत, उषा यांनी हिंदी, आसामी, मल्याळम, तमिळ, बांगला, आणि गुजराती यासह अनेक भाषांमध्ये गाणी गायली आहेत. त्यांनी एकूण 17 भारतीय आणि आठ परदेशी भाषांमध्ये गाणी गायली आहेत, हा एक विक्रम आहे.

हेही वाचा :