मुंबई - Kushiyaan Bator lo Song : हिंदी चित्रपटसृष्टीचा 'सिंघम' अजय देवगण, अभिनेता आर. माधवन आणि साऊथ अभिनेत्री ज्योतिका यांच्या भूमिका असलेला हॉरर थ्रिलर-सस्पेन्स चित्रपट 'शैतान'मधील पहिलं गाणं 'खुशियां बटोर लो' लवकरच रिलीज होणार आहे. आता 'शैतान'मधील पहिल्या गाण्याच्या टीझर रिलीजची डेट निर्मात्यांनी जाहीर केलीय. 'खुशियां बटोर लो'चा टीझर हा 'व्हॅलेंटाईन्स डे'च्या दिवशी म्हणजेच 14 फेब्रुवारी प्रदर्शित होणार आहे. हा चित्रपट काळ्या जादूवर आधारित आहे. दरम्यान, 'खुशियां बटोर लो' हे गाणं जुबिन नौटियालनं गायलं आहे. याशिवाय या गाण्याला संगीत अमित त्रिवेदी यांनी दिलंय. 'खुशियां बटोर लो' गाण्यात अजय देवगण आणि ज्योतिका त्यांच्या मुलांसोबत दिसत आहेत.
'शैतान'चा टीझर थरारक : काही दिवसापूर्वी 'शैतान'चा 1.31 मिनिटांचा टीझर रिलीज करण्यात आला. हा टीझर थरकाप उडवणारा आहे. या टीझरच्या सुरुवातीपासून तर शेवटपर्यंत आर. माधवन भीतीबद्दल सांगताना दिसला. अजय देवगण फिल्म्स आणि पॅनोरमाच्या बॅनरखाली निर्मित 'शैतान' चित्रपटाचे दिग्दर्शन विकास बहल यांनी केलंय. या चित्रपटाची घोषणा केल्यानंतर प्रदर्शित झालेल्या पोस्टरवरुन हा चित्रपट रहस्यप्रधान असल्याचं सहज लक्षात येतं. 'शैतान'मध्ये अजयबरोबर साऊथची दिग्गज अभिनेत्री ज्योतिका मुख्य भूमिकेत दिसणार आहे. या चित्रपटाचे पहिलं पोस्टर शेअर करताना अजयनं पोस्टवर लिहिलं की, ''शैतान' हा चित्रपट लवकरच येत आहे.'' या चित्रपटाची कथा अद्यापही गुलदस्त्यात ठेवण्यात आलीय.
अजय देवगणचे आगामी चित्रपट : अजय 'सिंघम अगेन' चित्रपटात दिसणार आहे, जो बॉक्स ऑफिसवर 15 ऑगस्ट रोजी थिएटरमध्ये प्रदर्शित होईल. अजयबरोबर या चित्रपटामध्ये दीपिका पदुकोण, रणवीर सिंग, अक्षय कुमार, अर्जुन कपूर, करीना कपूर, टायगर श्रॉफ, विक्की कौशल, जॅकी श्रॉफ आणि इतर कलाकार दिसणार आहेत. याशिवाय अजय ' रेड 2', 'मैदान', 'औरों में कहाँ दम था', 'सन ऑफ सरदार 2', 'गोलमाल 5', 'दे दे प्यार दे 2' आणि 'वश' चित्रपटांमध्ये दिसणार आहेत.
हेही वाचा :
