मुंबई - Ambani Family Hosted A Mass Wedding : उद्योगपती मुकेश अंबानी यांचा मुलगा अनंत अंबानी आणि राधिका मर्चंट 12 जुलैला विवाह करणार आहेत. अंबानी कुटुंबीयांनी अनंत आणि राधिकाच्या लग्नसोहळ्याला सुरुवात केली आहे. मुकेश आणि नीता अंबानी यांनी 50 जोडप्यांच्या सामूहिक विवाहानं या शुभ कामाची सुरुवात केली. दरम्यान या जोडप्याचा विवाह झाल्यानंतर अंबानी आणि त्यांच्या कुटुंबातील सदस्यांनी या जोडप्यांना भावी आयुष्यासाठी शुभेच्छा दिल्या. रिलायन्स कॉर्पोरेट पार्क येथे हा सोहळा आयोजित करण्यात आला होता. या कार्यक्रमात सुमारे 800 लोक उपस्थित होते. 'मानवतेची सेवा हीच ईश्वर सेवा' याला अंबानी कुटुंबानं कायम ठेवत हे काम केलंय.
सामूहिक विवाहात हजारो जणांनी घेतला भाग : या जोडप्याला अंबानी कुटुंबाकडून मंगळसूत्र, अंगठ्या आणि नाकातील नथनीसह सोन्याचे काही दागिने भेट देण्यात आले. याशिवाय नवरी मुलींना चांदीचे पैंजण देखील दिली गेली. प्रत्येक वधूला 1.01 लाख रुपयांचा धनादेश 'स्त्रीधन' म्हणून दिलं गेलं. तसंच प्रत्येक जोडप्याला वर्षभर पुरेल एवढा किराणा सामान आणि घरगुती वस्तू भेट दिल्या गेल्या. घरगुती भेट वस्तूंमध्ये भांडी, गॅस शेगडी, मिक्सर, पंखा यांचा समावेश होता. या विवाह सोहळ्याला वधू-वरांचे कुटुंबीय, सामाजिक कार्यकर्ते देखील उपस्थित होते. मुकेश अंबानी, अनंत अंबानी आणि राधिका मर्चंटसह अंबानी कुटुंबातील इतर सदस्यांनी सुमारे 51,000 गावकऱ्यांना पारंपारिक गुजराती जेवण दिलं.